Դրախտի թխթապանակ. անգամ Բրիտանիայի թագուհին է օգտվում երրորդ աշխարհի երկրների աղքատությունից
Օֆշորների գործունեության հետ կապված ավելի քան 13 մլն փաստաթուղթ է հայտնվել Suddeutsche Zeitung թերթի տնօրինության տակ: Այնպես, ինչպես «պանամայի արխիվի» դեպքում էր, թերթը փաստաթղթերը փոխանցել է հետաքննող լրագրողների միջազգային կոնսորցիումին: Արտահոսքն արդեն ստացել է «Paradise papers» անվանումը:
Այս շաբաթվա ընթացքում հրապարակվելու են նոր տվյալներ օֆշորային ծառայություններից օգտվող հայտնի մարդկանց մասին: Բի-Բի-Սին ընդգծում է, որ ֆինանսների հետ կապված մանիպուլյացիաների մեծ մասը, որոնց մասին խոսք է գնում հետաքննության մեջ, չի հակասում օրենքին, սակայն կասկածելի է էթիկայի տեսանկյունից:
Կիրակի հրապարակվել է հետաքննության առաջին մասը, որը կապված է Մեծ Բրիտանիայի թագուհի Եղիսաբեթ II-ի ներդրումների հետ: Այդ նութերից պարզ է դառնում, որ թագուհին անձնական միջոցները (մոտ 13մլն դոլար) ներդրել է Կայմանյան և Բերմուդյան կղզիների օֆշորային հիմնադրամներում: Նա նաև ներդրումներ է կատարել BrightHouse և Threshers ընկերություններում: Առաջինին մեղադրում էին երրորդ աշխարհի երկրներում ցածր վարձատրվող աշխատանքի օգտագործման համար, իսկ երկրորդը սնանկացել է՝ 6 հազար մարդու զրկելով աշխատանքից:
Եվս մեկն, ում ներդրումների վրա ուշադրություն են դարձրել լրագրողներն, ԱՄՆ առևտրի նախարար Ուիլբուր Ռոսն է:
Բի-Բի-Սիի տվյալներով՝ Ռոսը պահպանել է իր մասնաբաժինը մի ընկերությունում, որը սերտորեն համագործակցում է ռուսական «Սիբուր» հոլդինգի հետ, որն ԱՄՆ պատժամիջոցների տակ է Ուկրաինայի հանդեպ Ռուսաստանի քաղաքականության պատճառով:
«Սիբուրի» բաժնետերերի մեջ կան մարդիկ Ռուսաստանի նախագահ Վլադիմիր Պուտինի շրջապատից, այդ թվում՝ նրա փեսան:
Դոնալդ Թրամփի նախագահության ողջ ընթացքում նրա և նրա թիմի անդամների կապերը Ռուսաստանի հետ ամենաքննարկվող թեման է ամերիկյան լրատվամիջոցներում: Ամեն անգամ, երբ նոր տեղեկատվություն է հայտնվում ռուսների հետ Թրամփի շրջապատի մարդկանց հանդիպումների կամ բանակցությունների մասին, ԱՄՆ նախագահն ու նրա ողջ թիմը լրջագույն քննադատության են արժանանում:
