«Ղարաբաղի հարցն այս փուլում դիվանագիտական լուծում չունի»․ Հայաստանի վարչապետ
Հայաստանի վարչապետը Facebook-յան իր էջում ուղիղ եթերում կոչ է արել բոլորին պաշտպանել հայրենիքն, առաջին հերթին, զենքը ձեռքին, ինչպես նաև աջակցել բանակին գիտելիլքով և հմտություններով․
«Պետք է հստակ գիտակցենք, որ Ղարաբաղի հարցը գոնե այս փուլում դիվանագիտական լուծում չունի»։
Նա պարզաբանել է, որ հայկական իշխանությունները բազմիցս հայտարարել են հարցը փոխզիջումների հիման վրա լուծելու պատրաստակամության մասին։ Սակայն տրամաբանությունը, որն ընդունելի է հայկական կողմի համար, անընդունելի է Ադրբեջանի համար․
«Նրան, ինչին մենք համաձայն ենք կամ համաձայն կլինենք՝ հաշվի առնելով բանակցություններն ու այլ գործոններն, Ադրբեջանը համաձայն չէ»։
Հետևաբար, մնում է հարցի միայն ռազմական լուծումը, որից հետո հնարավոր կլինի անցնել դիվանագիտական բանակցությունների։
Վարչապետի ելույթը տեղի է ունեցել Հայաստանի և Լեռնային Ղարաբաղի նախկին նախագահների, ինչպես նաև խոշոր կուսակցությունների առաջնորդների հետ հանդիպումներից և խորհրդակցություններից հետո, ինչից հետևում է, որ սա Հայաստանի և Արցախի բոլոր քաղաքական ուժերի ընդհանուր մոտեցումն է։
Նիկոլ Փաշինյանի ելույթի բոլոր թեզերը՝ հակիրճ
Ռուսաստանը հակամարտության մեկնարկից մինչև օրս արել է առավելագույնը խնդրի լուծման համար և, վստահություն կա, որ սրանից հետո էլ կանի առավելագույնը:
Հայաստանը գնահատում է Ռուսաստանի՝ որպես Հայաստանի ռազմավարական գործընկերոջ և միևնույն ժամանակ ԵԱՀԿ Մինսկի խմբի համանախագահի ջանքերը, որի միջնորդությամբ էլ բանակցություններ են տարվում հակամարտության կողմերի միջև:
Բոլորի և յուրաքանչյուրի հիմնական խնդիրն այժմ հայ ժողովրդի իրավունքները պաշտպանելն է։ Իսկ դա նշանակում է զենք վերցնել և նվիրվել հայրենքի պաշտպանության գործին: Եվ այդպես հնարավոր կլինի հասնել դիվանագիտական լուծման։
Առանց Արցախի՝ չկա Հայաստան և, հետևաբար, պաշտպանել Արցախի ժողովրդի իրավունքը՝ նշանակում է պաշտպանել հայ ժողովրդի իրավունքը:
Նիկոլ Փաշինյանն իր կոչն ուղղել է Հայաստանի բոլոր քաղաքապետներին, գյուղապետներին, որ նրանք ձևավորեն կամավորական ջոկատներ, որոնք կիրականացնեն հայ ժողովրդի իրավունքի պաշտպանության գործը:
Հայոց ցեղասպանությունը տեղի է ունեցել այն պատճառով, որ ողջ հասարակությունը չէ, որ ներգրավվել է պայքարին։ «Եղել է տրամադրություն, թե «ինչ-որ տեղ կան մարդիկ, որոնք կկանգնեն ժողովրդի իրավունքների պաշտպանության համար, բայց այդ մարդը, երևի, ես չեմ։ Այսօր կան այդպիսի մարդիկ, բայց պետք է նրանց կողքը կանգնել: Մենք բոլորս պետք է կանգնենք: Դո՛ւ ես հենց այն մարդը, որ այսօր պետք է զենք վերցնի ու գնա մեր հերոս տղերքի կողքը կանգնի»:
Կա ընտրություն հաղթանակի և պարտության միջև, այլ տարբերակ չկա։
Իրավիճակը ճակատում բարդ է։ Սակայն այսպիսի դետալ կա․ հակառակորդը մարտի է նետում արդեն իսկ վերջին ռեզերվները: Նրանց ռեսուրսները շատ մեծ են, բայց կորուստներն էլ են մեծ՝ ինչպես սպառազինության, այնպես էլ մարդկային։
Ադրբեջանը հումանիտար հրադադարի չի համաձայնում, քանի որ կբացահայտվի, թե որքան մեծ են կենդանի ուժի կորուստները, և կհայտնաբերվեն վարձկանների և թուրքական բանակի զինծառայողների մարմինները։
90-ականներին իրավիճակը ճակատում ավելի ծանր էր, սակայն ժողովուրդը գտավ այն լուծումը՝ կանգնել նրանց կողքին, ովքեր զենքը ձեռքին պաշտպանում են հայրենիքը։
«Հիմա եկել է մեր ժամը՝ Հայրենիքին տալ ամեն ինչ և չխնայել ոչինչ՝ ամենագնացներ, միկրոավտոբուսներ, ինտելեկտուալ ներուժ, մասնավորապես՝ բարձր տեխնոլոգիաների ոլորտում։
«Եվ Հայաստանի ապագան կախված է մեկ մարդուց, և այդ մեկ մարդը դո՛ւ ես․․․ Մեզ հնարավոր չէ հաղթել, և մենք կհաղթենք», — այս խոսքերով է վարչապետն ավարտել իր ելույթը։
