Հայաստանի բնակիչները երկրի հաջորդ ղեկավարի դերում տեսնում են գործող վարչապետին և նախագահին
Հայաստանի բնակիչները երկրի ապագա ղեկավարի դերում իշխանական կուսակցության թեկնածուներից նախընտրում են գործող նախագահ Սերժ Սարգսյանին և գործող վարչապետ Կարեն Կարապետյանին: Այս մասին է վկայում Հայաստանում GALLUP International ասոցիացիայի լիիրավ անդամ ԷՄ ՓԻ ՋԻ ընկերության անցկացրած սոցիոլոգիական հարցումը:
2018թ.-ի ապրիլին Հայաստանը վերջնականպես անցում կկատարի խորհրդարանական կառավարման: Երկիրն այսուհետ կղեկավարի ոչ թե նախագահը, այլ՝ վարչապետը: Ապրիլի 9-ին ավարտվում են գործող նախագահի լիազորությունները, և հետազոտության ընթացքում մարդկանց ուղղվել է հետևյալ հարցը. «Ո՞ւմ կուզենայիք տեսնել վարչապետի պաշտոնում ապրիլի 9-ից հետո»:
Հարցման մասնակիցների ձայները, մեծ հաշվով, կիսվել են երկու թեկնածուների միջև: Եվ փոքր-ինչ ավելի շատ ձայներ է ստացել գործող վարչապետը.
- 27,3 տոկոսը ձայն կտար Կարեն Կարապետյանին,
- 24,8 տոկոսը՝ Սերժ Սարգսյանին,
- 8,1 տոկոսը՝ Վիգեն Սարգսյանին [ՀՀ պաշտպանության նախարար],
- 17,2 տոկոսը այս պաշտոնում որևէ մեկին չի տեսնում
Հարցման արդյունքներով, Սերժ Սարգսյանը առավել բարձր վարկանիշ ունի որպես երկրի ներքին և արտաքին քաղաքական հարցեր լուծող, իսկ Կարեն Կարապետյանն առավել բարձր է դիրքավորվում սոցիալ-տնտեսական բնույթի հիմնահարցերի լուծման տեսանկյունից:
Քաղտեխնոլոգ Արմեն Բադալյանը JAMnews-ի հետ զրույցում նախ ասաց, որ Հայաստանում վստահություն ներշնչող սոցոլոգիական կազմակերպություն չկա, դրանք զբաղվում են «սոցիոնկարչությամբ»:
«Նման կազմակերպությունների կողմից հրապարակած որևէ հարցման արդյունքի մի հավատացեք: Դրանք քաղաքական ուղերձներ են, ոչ ավելին: Հարցման տվյալներով Սերժ Սարգսյանը զիջում է Կարեն Կարապետյանին, բայց ասվում է, որ նա մարդկանց կողմից ընկալվում է որպես առաջատար մի շարք կարևոր հարցերում. երկրի անվտանգության ապահովում, պաշտպանություն, ղարաբաղյան հակամարտության կարգավորում: Իսկ Կարեն Կարապետյանը առաջատար է տնտեսական ոլորտում, որը երկրորդ ֆոն է անվտանգության հետ համեմատ: Այսպիսով ցույց է տրվել, որ Սերժ Սարգսյանն ավելի կարևոր հարցեր է լուծում», — ասում է քաղտեխնոլոգը:
Ըստ Արմեն Բադալյանի, իրականում Հայաստանի բնակչությունն ընդհանրապես հետաքրքրված չէ այս փոփոխությամբ: Սահմանադրության համաձայն էլ քաղաքացիները չեն այլևս ընտրելու երկրի ղեկավարին:
