ԼՂ պաշտպանության նախկին նախարարին մեղադրում են փողերի լվացման մեջ

Լեռնային Ղարաբաղի Պաշտպանության բանակի նախկին հրամանատար Սամվել Բաբայանի մեղադրանքը փոխվել է։ Նրան այս անգամ մեղադրում են փողերի լվացման մեջ:

Ավելի վաղ Սամվել Բաբայանի նկատմամբ առաջադրվել էր ՀՀ Քրեական օրենսգրքի մեկ այլ հոդված՝ մաքսանենգ ճանապարհով զինամթերքի տեղափոխում, որը վերացվել է:

Ինչպես նախորդ, այնպես էլ այս նոր մեղադրանքը Սամվել Բաբայանը չի ընդունում: Գործի նախաքննությունն ավարտվել է: Պաշտպանական կողմը նախաքննական մարմնից 15 աշխատանքային օր ժամանակ է խնդրել գործի նյութերին ծանոթանալու համար:

Բաբայանի կողմնակիցները հայտարարում են, որ սա քաղաքական հետապնդում է, որը պայմանավորված է Հայաստանի քաղաքական գործընթացներին նրա մասնակցությամբ: Բաբայանը հրապարակայնորեն աջակցություն էր հայտնել «Օհանյան-Րաֆֆի-Օսկանյան» դաշինքին, որը կազմված էր նախկին երեք նախարարներից և  իրեն ձերբակալելուց մի քանի օր անց պետք է մասնակցեր ապրիլի 2-ին Հայաստանում տեղի ունենալիք խորհրդարանական ընտրություններին:

Հոդվածում արտահայտած կարծիքները փոխանցում են հեղինակի տերմինաբանությունն ու հայացքները և պարտադիր չէ համընկնեն խմբագրության դիրքորոշման հետ