Վրաստանում ձերբակալել են «Իսլամական պետության»-ը միացած 2 անձի
Իսլամական պետության ահաբեկիչներ Վրաստանում
Վրաստանի Պետական անվտանգության ծառայությունը (ՊԱԾ) հաղորդում է, որ երկրի տարբեր շրջաններում իրականացրած հատուկ գործողության արդյունքում Բաթումիում ձերբակալվել են «Իսլամական պետության» հետ կապերի մեջ կասկածվող երկու անձինք։ Ձերբակալվածներից մեկն օտարերկրացի է, իսկ մյուսը՝ Վրաստանի քաղաքացի։
ՊԱԾ-ի տվյալներով՝ գործողությունը կատարվել է Գարդաբանիի մունիցիպալիտետում և Աջարիայի շրջանում կազմակերպված միջոցառումների շրջանակում։ Հակաահաբեկչական կենտրոնը նախապես տեղյակ է եղել նշված անձանց, այդ թվում՝ նրանց Վրաստան մուտք գործելու և նպատակների մասին։
Քննությամբ ի հայտ եկած տվյալների համաձայն՝ կասկածյալները Վրաստան են ժամանել առանձին և բնակություն են հաստատել վարձակալված բնակարաններում։ Դատարանի համապատասխան որոշումների հիման վրա նրանք գտնվել են օպերատիվ հսկողության ներքո։
Պարզվել է նաև, որ ձերբակալվածները «Իսլամական պետություն» ահաբեկչական կազմակերպության անդամներ են։ Նրանք հավատարմության երդում են տվել, որը հայտնի է որպես «բայաթ»։ Այն տեսագրվել է և ուղարկվել կազմակերպության ղեկավարներին։ ՊԱԾ-ը հայտարարել է, որ ձերբակալվածները պատրաստ են եղել կատարել կազմակերպության ղեկավարների հրահանգները։
Հետաքննության համաձայն՝ կասկածյալները պլանավորել էին լքել Վրաստանը և մեկնել այլ երկիր՝ միանալու «Իսլամական պետության» զինյալներին։
Իրավապահ մարմինների աշխատակիցներն առգրավել են էլեկտրոնային սարքեր, բջջային հեռախոսներ, չգրանցված SIM քարտեր, կազմակերպության խորհրդանիշներով իրեր, դիմակներ, անձնական փաստաթղթեր և գործին առնչվող այլ նյութեր։
Քննություն է ընթանում Վրաստանի Քրեական օրենսգրքի 328-րդ հոդվածի հատկանիշներով, դրանք են օտարերկրյա պետության ահաբեկչական կազմակերպությանն անդամակցելը և ահաբեկչական գործունեությանն օժանդակելը։ Այս հանցագործության համար նախատեսված է 10-17 տարվա ազատազրկում։
Հետևեք մեզ — Facebook | Youtube
Իսլամական պետության ահաբեկիչներ Վրաստանում
