Երևանում բացվել է Այվազովսկու ծննդյան 200-ամյակին նվիրված ցուցահանդեսը
Լուսանկարները՝ Լյուսի Սարգսյան, JAMnews
Հայաստանի Ազգային պատկերասրահում բացվել է հայազգի աշխարհահռչակ ծովանկարիչ Հովհաննես Այվազովսկու ծննդյան 200-ամյակին նվիրված «Արարում» ցուցահանդեսը:
Հովհաննես Այվազովսկու հոբելյանն ընդգրկված է ՅՈՒՆԵՍԿՕ-ի 2017 թ.-ի հիշարժան տարեթվերի ցանկում:
Այվազովսկու կտավները պահվում են աշխարհի նշանավոր թանգարաններում, այդ թվում Լուվրում և Էրմիտաժում, և մասնավոր հավաքածուներում։
Ցուցահանդեսին ներկայացվել է Այվազովսկու 6000 կտավներից ընդամենը 52-ը` գրաֆիկական, վավերագիր և դեկորատիվ-կիրառական։
Հայաստանում առաջին անգամ ցուցադրվում է Վենետիկի Մխիթարյան միաբանության հավաքածուի «Քաոս։ Աշխարհի արարում» հռչակավոր կտավը։
Հռոմի պատկերասրահներից մեկում՝ Հովհաննես Այվազովսկու ցուցադրված կտավներից հիացած՝ անգլիացի ծովանկարիչ Ուիլյամ Թյորները գրել է. «Մտա մի նորեկ պատկերասրահ՝ ալեկոծ ծովը խուժեց ինձ վրա՝ հետ-հետ քաշվեցի՝ ասես սարսափած՝ վսեմ վայրկյան՝ արվեստից խաբված»:
Նույն այս ցուցահանդեսի ավարտից առաջ Հռոմի պապ Գրիգոր 16-րդը՝ 26-ամյա Հովհաննես Այվազովսկուն շնորհել է պապական բարձրագույն պարգևը՝ ոսկե շքանշանը և հատուկ կոնդակով « Քաոս» կտավը հռչակել Վատիկանի պատկերասրահի սեփականություն: Անցյալ դարի սկզբին պապ Լեոն 13-ը նվիրել է կտավը Վենետիկի Մխիթարյան միաբանությանը:
Հայաստանի Ազգային պատկերասրահի Այվազովսկու հավաքածուն, որը համարվում է երկրորդը Թեոդոսիայից հետո, ստեղծվել ու համալրվել է բացառապես նվիրատվությունների շնորհիվ: Առաջին 7 նկարները բերվել են Մոսկվայի Լազարյան ճեմարանից: Ընդ որում դրանք ծովանկարիչը անձամբ է նվիրել ժամանակին ճեմարանին:
1925 թ.-ին ճարտարապետ Հակոբ Էքիզյանը պատկերասրահին նվիրել է Այվազովսկու ևս չորս կտավ: 1957-ին Հայաստանի պատկերասրահը հարստացել է Այվազովսկու միանգամից 41 նկարով, որոնց նվիրատուն ֆրանսահայ գործարար Աբրահամ Ջինջյանն էր:
«Այվազովսկին հիանալի ծովանկարիչ էր, որը մասնավոր ներդրումներ էր կատարում մշակույթի զարգացման գործում: Նա երազում էր համախմբել աշխարհի տարբեր երկրներում ստեղծագործող հայ նկարիչներին, որ միասնական ուժերով կարողանային զարկ տալ հայ կերպարվեստի բարգավաճմանը: Ժամանակին դա նրան չհաջողվեց՝ բայց այս ցուցադրությունը գուցե այդ նպատակին ծառայի»,- միջոցառման ժամանակ ասել է մշակույթի նախարար Արմեն Ամիրյանը:
Սեպտեմբերի 15-ից 16-ը Հայաստանում տեղի կունենա նաև Այվազովսկուն նվիրված միջազգային գիտաժողով:
