Եվրամիությունն արդեն օգնություն է տրամադրում և պատրաստ է հետագայում էլ ձեռք մեկնել

Եվրոպական միության անունից հանդես է եկել արտաքին գործերի եւ անվտանգության քաղաքականության հարցերով բարձր ներկայացուցիչ Ժոզեպ Բորելը։ Նա ասել է․

«Պետք է հավելյալ ջանքեր գործադրվեն հակամարտության բանակցային, համապարփակ և կայուն կարգավորման համար, որը կներառի Լեռնային Ղարաբաղի կարգավիճակը։ […]

Եվրամիությունը կոչ է անում բոլոր կողմերին շարունակել խստորեն պահպանել հրադադարի ռեժիմը` կանխելու մարդկային կյանքերի կորուստը: ԵՄ-ն նաև կոչ է անում տարածաշրջանից դուրս բերել բոլոր օտարերկրյա զինյալներին»:

Հայտարարության մեջ ասվում է, որ Եվրամիությունը լիակատար աջակցություն է հայտնում ԵԱՀԿ Մինսկի խմբի միջազգային ձևաչափին և պատրաստ է նպաստել իրավիճակի կայունացմանը, հետկոնֆլիկտային վերականգնմանը:

«Եվրամիությունն ընդգծում է Լեռնային Ղարաբաղում և դրա շրջակայքում մշակութային և կրոնական ժառանգության օբյեկտների պահպանման և վերականգնման կարևորությունը», — ասվում է ուղերձում:

Ժոզեպ Բորելը նաև ընդգծել է, որ Եվրոպական միությունն, ինչպես նաև միության անդամ պետություններն արդեն զգալի հումանիտար օգնություն են տրամադրում, որը պետք է ուղղվի հակամարտությունից տուժած քաղաքացիական բնակչության կարիքները հոգալու գործին։ Նա հավաստիացրել է, որ եվրոպական գործընկերները պատրաստ են հետագայում ևս տրամադրել օգնություն: