Գուդաուրիում ծեծել են ռուս պարապլաներիստների

Վրաստանի ՆԳՆ աշխատակիցները ձերբակալել են Գուդաուրիի Դաբա բնակավայրի 4 բնակչի Ռուսաստանի քաղաքացիների խմբակային ծեծի ենթարկելու և նրանց գույքը փչացնելու համար:

Ձերբակալվածները մեղադրվում են ՌԴ քաղաքացիներ Ֆյոդոր Չելիշովին և Սերգեյ Դեմենտևին ծեծի ենթարկելու համար: Բժիշկների խոսքով՝ Չելիշովն ուղեղի ցնցում է ստացել, կոտրվել է քիթը: Նա հիվանդանոցում է: Ձերբակալվածները կոտրել են Դեմենտևի մեքենան:

ՆԳՆ տվյալներով՝ ռուս և վրացի պարապլաներիստների միջև հունիսի 9-ին տեղի ունեցած կռվին նախորդել է ռուս և ուկրաինացի պարապլաներիստների միջև հունիս 8-ին տեղի ունեցած կոնֆլիկտը: Ուկրաինացիների դժգոհությունն է առաջացրել այն հանգամանքը, որ վրացի պարապլաներիստները պատահաբար հայտնվել են նրանց վարձակալած տարածքում: Իսկ Դեմենտևն ու Չելիշովն իրենց ուրաինացի գործընկերների հետ են եղել: Սոցցանցերում տարածվել է ծեծկռտուքի տեսագրությունը՝ որը նկարահանել է տուժածների ավտոմեքենայի տեսագրանցող սարքը:

https://www.facebook.com/www.Reginfo.ge/videos/1793180044053685/

Վրացի պարապլաներիստների ձերբակալությունը տեղի բնակիչների դժգոհությունն է առաջացրել:

Ըստ «Ռեգինֆոյի» տվյալների՝ մեկ ժամվա ընթացքում նրանք արգելափակել են Մծխեթա-Ստեփանծմինդա-Լարս ավտոճանապարհը: Ակցիայի մասնակիցները ռուս և ուկրաինացի պարապլաներիստներին մեղադրում են սադրանքի համար:

«Մեր տղաներն իրենց պատիվն են պահել: Նախօրեին ռուսները կոնֆլիկտի սրացման էին գնացել: Մերոնք պատասխանել են: Այդ ամենի տեսագրությունը կա: Ֆյոդոր Չելիշովը թռիչքի ժամանակ, չնայած վրացի ոստիկանների նախազգուշացմանը, հասել է այն վայր, որտեղ հավաքվել էին վրացիները, և վերևից բալոնով սկսել է նրանց վրա ինչ-որ նյութ փչել, ինչին էլ, բնականաբար, արձագանքել են մեր պարապլաներիստները: Այդ ամենը տեսագրված է», — հունիսի 10-ին «Ռեգինֆոյին» հայտարարել է Վակո Զակաիձեն՝ ակցիայի մասնակիցներից մեկը:

Մծխեթա-Ստեփանծմինդա-Լարս ավտոճանապարհն ապաարգելափակվել է այն բանից հետո, երբ տեղի բնակիչները ստացել են Մծխեթա-Մթիանեթիի ոստիկանական բաժանմունքի պետ Դիմիտրի Զուրաբիշվիլիի հավաստիացումներն առ այն, որ բոլոր ձերբակալվածները 48 ժամվա ընթացքում գրավով ազատ կարձակվեն կամ թեթև պատիժ կստանան: