Բելառուս․ ընդդիմության առաջնորդ Տիխանովսկայան նախագահ Լուկաշենկոյին վերջնագիր է ներկայացրել
Սվետլանա Տիխանովսկայան՝ Բելառուսի նախագահի նախկին թեկնածուն, որին բելառուսական ընդդիմությունը հաղթող է հայտարարել նախագահական ընտրություններում, վերջնագիր է ներկայացրել նախագահ Ալեքսանդր Լուկաշենկոյին՝ մինչև հոկտեմբերի 25 հրաժարական տալու համար ժամկետ սահմանելով։
Տիխանովսկայան դիմել է երկրի քաղաքացիներին և Ալեքսանդր Լուկաշենկոյին, որը չի ցանկանում ընդունել իր պարտությունը։
Իր ուղերձը նա վերջնագիր է անվանել։ Դրա էությունը երեք պահանջ է․
— Ալեքսանդր Լուկաշենկոյի հրաժարական;
— բոլոր քաղբանտարկյալների ազատ արձակում;
— ոստիկանական բռնության լիակատար կասեցում։
•Ռուսաստանը կգնի Բելառո՞ւսը։ Փորձագետների կարծիքը
•Ռուսական պրոպագանդիստական դեսանտը գրավել է Բելառուսը
Այս պահանջները մինչև հոկտեմբերի 25-ը չկատարելու դեպքում բելառուսական ընդդիմության առաջնորդներից մեկը երկրի քաղաքացիներին կոչ է անում․
— համընդհանուր գործադուլ հայտարարել;
— չօգտվել պետական բանկերի ծառայություններից;
— դադարել գնումներ կատարել պետական խանութներից;
— արգելափակել ճանապարհները։
![](https://jam-news.net/app/uploads/2020/10/RTS3JP07-1024x777.jpg)
Տիխանովսկայան ընդգծել է, որ ցույցերը Բելառուսում շարունակում են «խաղաղ և ոչ բռնի» բնույթ կրել, սակայն համբերությունը սպառվում է։
Բելառուսում նախագահական ընտրությունները կայացել են օգոստոսի 19-ին, դրանց արդյունքում հաղթող է հայտարարվել Ալեքսանդր Լուկաշենկոն, որն, ըստ պաշտոնական տվյալների, ստացել է մոտ 80% ձայն։ Սակայն բելառուսական ընդդիմությունն ընտրությունները կեղծված է համարում։ Բելառուսում ընտրություններից հետո շարունակվում են զանգվածային ցույցերը, որոնց դեմ Լուկաշենկոյի ռեժիմն ուժ է կիրառում։ Դրա հետևանքով մի քանի մարդ է զոհվել, հարյուրավոր մարդիկ կալանավորվել են։