Բաքուն պատել է փոշու ամպը, որը եկել է Թուրքմենստանից

Օգոստոսի 23-ի առավոտյան Ադրբեջանը պատել է դեղնավուն գույնի փոշու մառախուղ: Բաքվեցիների հաղորդագրությունների համաձայն՝ քաղաքում և դրա սահմաններից դուրս տեսանելիությունը զգալիորեն նվազել է, տեղ-տեղ ծխախոտի ծխի հոտի նման հոտ է զգացվում:

Բնապահպանության և բնական ռեսուրսների նախարարությունն իր մամուլի հաղորդագրությունում բացատրել է այդ երևույթի պատճառը: Պարզվում է, որ Ապշերոնի թերակղզին պատած փոշին եկել է Կասպից ծովով Թուրքմենստանից:

Նախարարությունում հաղորդել են նաև, որ «Բաքվի և Ապշերոնի թերակղզու հարավ-արևելյան քամին, բարձր խոնավությունն ու օդի բարձր ջերմաստիճանը նպաստում են նրան, որ մինչև օգոստոսի 26-ը օդում պարունակվող փոշու քանակն էլ ավելի շատանա»:

Բնապահպանության և բնական ռեսուրսների նախարարությունը հայտարարել է «աշխատանքի օպերատիվ ռեժիմի» անցնելու մասին:

Շնչառական ուղիների խնդիրներ ունեցող անձանց խորհուրդ է տրվում տնից դուրս չգալ: