ყარაბაღელები, რომელთა სოფლები აზერბაიჯანის კონტროლქვეშ გადადის, საკუთარ სახლებსა და ქონებას წვავენ
მთიან ყარაბაღში, იმ რაიონების მცხოვრებლები, რომელიც აზერბაიჯანის კონტროლქვეშ გადადის, წასვლამდე საკუთარ ქონებას წვავენ.
10 ნოემბერს, სომხეთმა, აზერბაიჯანმა და რუსეთმა ხელი მოაწერეს საომარი მოქმედებების შეწყვეტის შესახებ სამმხრივ განცხადებას. რუსეთმა, როგორც რეგიონის უსაფრთხოების გარანტმა, კონფლიქტის ზონაში სამშვიდობო ძალები შეიყვანა.
სამმხრივი შეთანხმების თანახმად, გარკვეული რაიონები, რომლებიც ადრე აზერბაიჯანული მხარის კონტროლქვეშ იყო, აზერბაიჯანს გადაეცემა. აღდამის რაიონი აზერბაიჯანს 20 ნოემბრამდე დაუბრუნდება, 15 ნოემბრამდე სომხეთი დააბრუნებს ქარვაჭარის (ქალბაჯარის) რაიონს და 1 დეკემბრამდე – ბერძორის (ლაჩინის) რაიონს.
აზერბაიჯანს რჩება ყარაბაღის სამხრეთიც, რომელიც საბრძოლო მოქმედებების დროს დაიკავა და ასევე, ქალაქი შუშა.
ახლა ამ რაიონებიდან ადგილობრივი მცხოვრებლების ევაკუაცია მიმდინარეობს. ავტომაგისტრალზე, რომელიც ყარაბაღსა და სომხეთს აკავშირებს, ყარაბაღიდან მიმავალი უამრავი ავტომობილის გამო, რამდენიმე კილომეტრიანი საცობი წარმოიქმნა. ადამიანებს მიაქვთ ყველაფერი, რისი წაღებაც შეიძლება – ავეჯი, ცხოველები, საოჯახო საქონელი.
ასევე, სოციალურ ქსელებში გამოჩნდა ფოტო და ვიდეომასალა ამ ადგილებიდან, სადაც ჩანს, როგორ ტოვებენ ადამიანები საკუთარ სახლებს.
