"თქვენი ევროინტეგრაციის ყველაზე ერთგული მხარდამჭერი ვარ" - მომავალ კვირაში თბილისში ორბანი ჩამოვა

ვიქტორ ორბანი საქართველოში

გრანადაში ევროკავშირის ლიდერების შეხვედრის დაწყებამდე ვიქტორ ორბანმა ჟურნალისტებთან კომენტარი გააკეთა და განაცხადა, რომ საქართველოს ევროინტეგრაციის ყველაზე ერთგული მხარდამჭერია. მისივე თქმით, საქართველოს მხარდაჭერის სადემონსტრაციოდ, მომავალ კვირაში საქართველოში ჩამოვა.

“სრულიად უსამართლოა, რომ არ გპირდებიან, რომ [ევროკავშირის წევრი] გახდებით რაც შეიძლება მალე, იმიტომ, რომ კარგად იმუშავეთ. ძალიან გვჭირდებით”. – თქვა ორბანმა.

ჟურნალისტის კითხვაზე, რა გახდა გასულ წელს საქართველოსთვის კანდიდატის სტატუსის არმინიჭების მიზეზი, ორბანმა აღნიშნა, რომ ეს ევროკავშირის ლიდერების “ეგოიზმით” იყო განპირობებული:

“ლიდერები ეგოისტები არიან. მათ არ უნდათ, რომ შეგიშვან და მოგცენ ფინანსური რესურსები, რაც გჭირდებათ. ისინი ამას დაღლილობას უწოდებენ, გაფართოებით დაღლილობას, რაც თქვენი ქვეყნის მიმართ აბსოლუტურად უსამართლოა, ასე რომ, უნდა გაგიზიაროთ რაც გვაქვს, იმიტომ, რომ გვჭირდებით, სტრატეგიული პოზიცია გაქვთ.

მომავალ კვირას თქვენს ქვეყანაში ვარ. თბილისში სამთავრობო შეხვედრა გვექნება. უნგრეთის მთავრობა იქ იქნება. ყველა მინისტრი ჩემთან ერთად იქნება”. – თქვა ორბანმა.

გრანადაში ევროკავშირის ქვეყნების ლიდერების არაოფიციალურ შეხვედრაზე ბლოკის გაფართოების, მიგრაციისა და 2024-2029 წლების სტრატეგიულ დღის წესრიგს განიხილავენ.

● პაატა ზაქარეიშვილის კომენტარი: ხელისუფლებაში ყველაფერს აკეთებენ, რათა კანდიდატის სტატუსის მიღების ყოველგვარი შანსი მოანგრიონ
● მოლდოვის ყოფილი პრორუსი პრეზიდენტი ქვეყანას მოუწოდებს, საქართველოს ხელისუფლებას მიბაძოს
● ადამ ჰოლოვეი: „ქართული ოცნება“ პროპუტინისტური და პრორუსული ჯგუფია, რომელიც საქართველოს რისკის ქვეშ აყენებს

შეგახსენებთ, რომ მიმდინარე წლის მაისში, საქართველოს პრემიერმინისტრმა ირაკლი ღარიბაშვილმა ბუდაპეშტში კონსერვატიული პოლიტიკური მოქმედების ყოველწლიურ კონფერენციაზე სიტყვით გამოსვლისას განაცხადა, რომ უნგრელ ხალხს ძალიან გაუმართლა, რომ “ასეთი ბრძენი და შორსმჭვრეტელი” ლიდერი ჰყავს. მისივე თქმით, სიმართლესთან დაპირისპირებული ძალები მიზნების მიღწევას ლგბტ პროპაგანდით ცდილობენ.

ღარიბაშვილის განმარტებით, საქართველოს საზოგადოების უდიდესი უმრავლესობა ტრადიციულ, კონსერვატიულ ოჯახურ ღირებულებებს იზიარებს და ეს ფასეულობები მხოლოდ წარსული მემკვიდრეობა არ არის. ღარიბაშვილის თქმით, იგი ცოცხალი დღევანდელობაა – გარემო, რომელშიც “ჩვენ გავიზარდეთ და გვსურს ჩვენი შვილები აღვზარდოთ.”

უნგრეთში ირაკლი ღარიბაშვილის გამოსვლა დაგმო “ევროპელი სოციალისტების” პარტიამ, რომლის წევრიც “ქართული ოცნება” იყო და მოგვიანებით საქართველოს მმართველი პარტია თავის რიგებიდან გარიცხა.