საქართველოში გრძელდება დაუმორჩილებლობა, გაფიცვა, რეჟიმთან დაპირისპირება. აქ ასეთ შემთხვევებს ვუყრით თავს

ვინ გაიფიცა და ვინ დატოვა სამსახური

აქ თავს ვუყრით საპროტესტო გამოსვლების პარალელურად სხვადასხვა საჯარო მოხელეების, დიპლომატების, ჟურნალისტების თუ კომპანიების მიერ გამოცხადებული დაუმორჩილებლობის, პროტესტის, გაფიცვისა და სოლიდარობის შესახებ ინფორმაციას.

სტატია პერიოდულად ახლდება.

_________________________

საქართველოში საპროტესტო ტალღა აგორდა  პრემიერ-მინისტრის ირაკლი კობახიძის განცხადების შემდეგ, რომ ქვეყანა აჩერებს ევროკავშირთან მოლაპარაკებების გახსნას.

საქართველოს ქალაქებში დაიწყო მასშტაბური საპროტესტო აქციები. პარალელურად, გაჩნდა დაუმორჩილებლობისა და პროტესტის სხვა მცირე კერებიც.

• პროტესტისა და გაფიცვების წინაისტორია

  

  28 ნოემბრიდან საქართველოს დედაქალაქში, თბილისში და სხვა ქალაქებში, მრავალათასიანი საპროტესტო აქციები იმართება მოთხოვნით – ჩატარდეს ახალი საპარლამენტო არჩევნები და დაუბრუნდეს ქვეყანა ევროინტეგრაციის გზას.

  ეს აქციები მოჰყვა საქართველოს პრემიერ-მინისტრის, ირაკლი კობახიძის განცხადებას, რომ 2028 წლამდე საქართველო წყვეტს გაწევრების შესახებ მოლაპარაკებებს ევროკავშირთან. ეს განცხადება პრემიერმა არჩევნებიდან რამდენიმე დღეში გააკეთა.

  თითქმის ყოველ ღამეს  მრავალათასიან აქციას საპოლიციო ძალები სასტიკად შლიან წყლის ჭავლის, ცრემლმდენი გაზისა და წიწაკის სპრეის გამოყენებით.

  “საერთაშორისო გამჭვირვალობა საქართველოს” ინფორმაციით, 28 ნოემბრის შემდეგ დაკავებულია 460-ზე მეტი ადამიანი.

  მათგან, 430 დაკავებული – ადმინისტრაციული წესით, 31 სისხლის სამართლის ბრალდების საფუძველზე.

  300-ზე მეტი პირი დაკავების და დაკავების შემდგომ პერიოდში დაექვემდებარა წამებას, არაადამიანურ და არასათანადო მოპყრობას.

  80-ზე მეტ პირს დასჭირდა საავადმყოფოში გადაყვანა.

  დაახლოებით, პირთა ასაკი მერყეობს 15 წლიდან 60 წლამდე. დაკავებულებს შორის არის ასევე უცხო ქვეყნის 10 მოქალაქე.

  პროტესტის დაწყებიდან პირველი ორი დღის განმავლობაში სამართალდამცავები სასტიკად უსწორდებოდნენ ჟურნალისტებს, რომლებიც აქციას აშუქებდნენ. აქციების დაწყების დღიდან ნაცემი და დაშავებულია 70-ზე მეტი ჟურნალისტი.

  დემონსტრანტებზე  და ჟურნალისტებზე ძალადობის გამო ამ დროისთვის არც ერთ სამართალდამცველზე საქმე აღძრული არ არის.

10 დეკემბერი. ათობით მეწარმე უარს ამბობს მერიის მიერ მოწყობილ „საახალწლო სოფელში" მონაწილეობაზე

● 20-ზე მეტი მეწარმე უარს ამბობს მიიღოს მონაწილეობა თბილისის მერიის მიერ მოწყობილ “საახალწლო სოფელში”.

ამ მეწარმეების სიას BMG აქვეყნებს:

1. ექსპოზიცია
2. დრაკარი.Drakkar;
3. მანსარდი ლილე;
4. Winness•ვაინეს;
5. ალტერსოქსი;
6. Lampino;
7. ნარი კერამიკის სტუდია-Nari Ceramic Studio;
8. Red • წითელი;
9. Buera•ბუერა;
10. Maqmani Wood;
11. comfortable.ge;
12. Kaluka;
13. Geoposter;
14. არადაკი;
15. პარადოქსი;
16. სიო;
17. Katanakata-კატანაკატა;
18. Ubralo. უბრალო;
19. ზიზილა;
20. Cone ceramic;
21. Dedeco;
22. Siba’s Art.

● Fabrika-ში მოქმედი ბიზნეს სუბიექტების გადაწყვეტილებით ყოველწლიური საშობაო ბაზრობა უქმდება.

გადაწყვეტილება ურბანულ სივრცეში მოქმედმა ბიზნესებმა მიიღეს: Tone თონე, CMR, Moulin Electrique, Creative Education Studio, Tsibakha • წიბახა, Popolo, PIPES burger joint at Fabrika • პაიპს ბურგერ ჯოინტი ფაბრიკაში, Saamuri • საამური, MUA – Architecture & Placemaking, Shavikata, Shio Ramen, Fabrika Hostel, Veli Store, Graffiti Dealers, Margo Skate Shop, Jpg, Ceramic Studio 1300, Magnolia Film Lab, Vodkast Records, Impact Hub Tbilisi.

, Fabrika-ში საშობაო ბაზრობის გამართვა 21-22 დეკემბერს იგეგმებოდა.

9 დეკემბერი. თანამშრომლების პროტესტი "რუსთავი 2-ზე", პირველ არხზე, კლინიკების სოლიდარობა

● ტელეკომპანია “რუსთავი 2” დატოვა კიდევ ორმა თანამშრომელმა: ირაკლი კასრაძემ და ნუკა ორჯონიკიძემ, რომელიც გადაცემა “შუადღის” მთავარი პროდუსერი იყო.

● გაიფიცა “საზოგადოებრივი მაუწყებლის პირველი არხის თანამშრომელი, გადაცემა „აკუსტიკის“ ერთ-ერთი წამყვანი სოფო გორელაშვილი.

 „გავიფიცე! ჩემი ყველანაირი საქმიანობა ამჯერად შეჩერებულია, ერთადერთი საქმე რაც გვაქვს დღეს ქვეყნის მომავლის სადარაჯოზე ყოფნაა. დამთავრდეს ტერორი! აღდგეს სამართალი! შეწყდეს ქუჩებში ხოცვა ჟლეტა!!!“- დაწერა მან სოციალურ ქსელში

 ● სამსახური დატოვა მარტვილის კულტურისა და ახალგაზრდობის განვითარების ცენტრის დირექტორმა, გიორგი ყურუამ.

“ქვეყანაში შექმნილი ვითარებიდან გამომდინარე, ჩემთვის როგორც საქართველოს მოქალაქისთვის, კულტურისა და ახალგაზრდობის განვითარების ცენტრის დირექტორის პოზიციაზე დარჩენა მიმაჩნია მიუღებლად… საქართველო გაიმარჯვებს… საქართველოს გარუსება ვერ მოხდება! საქართველო გახდება ევროკავშირის სრულუფლებიანი ოჯახის წევრი” , – დაწერა მან სოციალურ ქსელში

პროევროპული პროტესტის 300-ზე მეტი მონაწილე ნაცემი და დაკავებულია. აქ მათ ისტორიებს ვაგროვებთ. განახლებადი

აქ გიყვებით პროევროპულ აქციაზე სასტიკად ნაცემი, დაკავებული და დაშავებული ადამიანების ისტორიებს

 ● სამი დიდი სამედიცინო დაწესებულება აცხადებს, რომ მზად არის უსასყიდლოდ გაუწიოს დახმარება დაზარალებულ დემონტრანტებს.

ასეთი განცხადებები გამოაქვეყნეს კლინიკა “ინოვამ”, ნ.ბოხუას სახელობის კარდიოვასკულურმა ცენტრმა და ჟორდანიას კლინიკამ.

„კლინიკა ინოვა და მისი სამედიცინო პერსონალი სრულ სოლიდარობას უცხადებს და გვერდით უდგას საქართველოს მოსახლეობას. ჩვენ, მუდმივ რეჟიმში, მზად ვართ უანგაროდ გავუწიოთ საჭირო დახმარება – იქნება ეს ნებისმიერი სამედიცინო ჩარევა თუ გამოკვლევა – ყველა იმ ადამიანს, რომელიც ბოლო დღეებში მომხდარი ძალადობის შედეგად დაშავდა“, — წერს სამედიცინო ცენტრი Innova.

„ნ.ბოხუას სახელობის სამედიცინო ცენტრი და მისი პერსონალი სრულ სოლიდარობას უცხადებს და გვერდით უდგას საქართველოს მოსახლეობას. ჩვენ, მუდმივ რეჟიმში, მზად ვართ უანგაროდ გავუწიოთ საჭირო დახმარება – იქნება ეს ნებისმიერი სამედიცინო ჩარევა თუ გამოკვლევა – ყველა იმ ადამიანს, რომელიც ბოლო დღეებში მომხდარი ძალადობის შედეგად დაშავდა“, – ნათქვამია ნ.ბოხუას სახელობის კარდიოვასკულურმა ცენტრის განცხადებაში.

“ი.ჟორდანიას სახელობის სამედიცინო ცენტრი და მისი სამედიცინო პერსონალი სრულ სოლიდარობას უცხადებს და გვერდით უდგას საქართველოს მოსახლეობას. ჩვენ, მუდმივ რეჟიმში, მზად ვართ უანგაროდ გავუწიოთ საჭირო დახმარება – იქნება ეს ნებისმიერი სამედიცინო ჩარევა თუ გამოკვლევა – ყველა იმ ადამიანს, რომელიც ბოლო დღეებში მომხდარი ძალადობის შედეგად დაშავდა“, – ვკითხულობთ ჟორდანიას კლინიკის განცხადებაში

 ● მინერალური წყალი “ნაბეღლავი” გმობს ძალადობას იმ მოქალაქეების მიმართ, რომლებიც იბრძვიან საქართველოს უკეთესი მომავლისთვის.

სს ,,წყალი მარგებელი” უკვე 27-წლიან ისტორიას ითვლის და დაარსების დღიდან იყო ერთ-ერთი პიონერი ქართულ ეროვნულ ინდუსტრიაში დასავლური კულტურის დამკვიდრების კუთხით.

დღეს ის წარმოადგენს ქართულ-ევროპული ერთობლივი ბიზნესის წარმატებულ ნიმუშს. შესაბამისად, ჩვენთვის კატეგორიულად მიუღებელია ევროპასთან თანამშრომლობის შეჩერება თუნდაც ერთი დღით.

ვგმობთ ძალადობას ნებისმიერი იმ მოქალაქის მიმართ, რომელიც იბრძვის ქვეყნის უკეთესი მომავლისა და დასავლური ღირებულებების დამკვიდრებისთვის! მტკიცედ ვრჩებით საქართველოს კონსტიტუციის 78-ე მუხლით განსაზღვრული კურსის ერთგულნი!” – ნათქვამია “ნაბეღლავის” განცხადებაში.

8 დეკემბერი -TBС ბანკი, "გორგია" და სხვა ამ დღეს მომხდარი შემთხვევები

● „თიბისი ბანკმა“ სოლიდარობა გამოუცხადა მშვიდობიან პროტესტში მონაწილე დაკვებულებს

საქართველოს ერთ-ერთი უმსხვილესი ბანკი, „თიბისი“ აქვეყნებს განცხადებას, რომლითაც ის სოლიდარობას უცხადებს დაკავებულებს და გმობს ძალადობას.

„თიბისელები შევიკრიბეთ თბილისის საქალაქო სასამართლოსთან, რათა მხარი დავუჭიროთ ჩვენი გუნდის ორ წევრს – გიორგი მაისურაძეს და გიორგი ქორქაძეს, რომლებიც საპროტესტო აქციების დროს უსაფუძვლოდ დააკავეს და მოვითხოვთ მათ დაუყოვნებლივ გათავისუფლებას. სოლიდარობას ვუცხადებთ მშვიდობიან პროტესტში მონაწილე ყველა დაკავებულს და ვგმობთ ყველანაირ ძალადობას მშვიდობიანი დემონსტრანტების მიმართ“, – წერია ბანკის განცხადებაში.

პროევროპული საპროტესტო აქციების გამო დაკავებულ 400-ზე მეტ დემონსტრანტს შორის არის “თიბისი” ბანკის ორი თანამშრომელიც: გიორგი მაისურაძეს და გიორგი ქორქაძე.

● სახელისუფლებო არხებზე მომუშავე სამმა ჟურნალისტმა ტელევიზია დატოვა

„რუსთავი 2″-ის გადაცემა „შუადღის” წამყვანებმა – ანა კოშაძემ და ვახო კანდელაკმა დატოვეს ტელევიზია.

ასევე, 8 დეკემბერს სამსახურის დატოვების შესახებ განაცხადა ტელეკომპანია “იმედის” ჟურნალისტმა ლევან მორჩიაშვილმა.

● „ვეღარ ვითანამშრომლებ კომპანიასთან, რომელმაც მოქალაქეებს გადაუმალა სათვალეები და ნიღბები” – ერთ-ერთი ყველაზე დიდი საყოფაცხოვრებო ჰიპერმარკეტის “გორგიას” თანამშრომელმა სამსახური დატოვა

„გთხოვთ, ქვეყანაში არსებული მძიმე პოლიტიკური მდგომარეობიდან და შპს „გორგიას“ მიერ გამოჩენილი მორჩილების გამო რეჟიმისადმი, რაც გამოიხატება ათასობით ცალი პირბადისა და სათვალის გადამალვაში, რის გამოც მე ბოიკოტს ვუცხადებ ამ კომპანიას, გამათავისუფლოთ დაკავებული თანამდებობიდან დაუყოვნებლივ.

საქართველოს გზა ევროპაშია და ამ გზას ვერცერთი რეჟიმი ვერ შეარყევს,“ – „გორგიას“ თანამშრომელმა მერაბ (გიორგი) რომელაშვილმა ამ შინაარსის განცხადებით დატოვა სამსახური.

● “გორგია” დატოვა მარკეტინგის სამსახურის ხელმძღვანელმა გიორგი თურქაძემაც

“მეგობრებო, მე ჩემს სამოქალაქო პოზიციას ყოველ საღამოს ვაფიქსირებ აქციებზე დგომითა თუ აზრის საჯაროდ დაფიქსირებით.

რაც შეეხება კომპანია “გორგიას”, რომლის განვითარებაშიც გარკვეული წვლილი მეც მიმიძღვის, გული მტკივა, რაც მის გარშემო ხდება. წამოსვლის შესახებ განცხადება კი 6 დეკემბერს დავწერე”, – დაწერა მან სოციალურ ქსელში 8 დეკემბერს..

● “ძალადობას არ აქვს გამართლება!” – დაწერა სოციალურ ქსელში საქართველოს გენერალური პროკურატურის პროკურორმა თემურ ცინდელიანმა

“ბოლო დღეების განმავლობაში მშვიდობიანი მომიტინგეების და ჟურნალისტების მიმართ განხორციელებული ძალადობის შემთხვევებზე მყისიერი რეაგირება, მოძალადეთა იდენტიფიცირება და დასჯა არის არსებითად მნიშვნელოვანი, მით უფრო მაშინ, როცა მეორე მიმართულებით არის დაუყოვნებლივი რეაგირება!” – წერს ცინდელიანი.

7 დეკემბერი. გაიფიცნენ "სეტანტა სპორტის" კომენტატორები

● გაიფიცნენ “სეტანტა სპორტის” კომენტატორები.

“Setanta Sports-ზე მაუწყებლობა საქართველოში კომენტირების გარეშე გავა, რადგან ფსიქოლოგიურად, ემოციურად თუ ფიზიკურად გვიჭირს კომენტირება გავაგრძელოთ და მიმდინარე მოვლენებს გვერდი ავუაროთ.

სოლიდარობა თანამოქალაქეებს, მეგობრებსა და კოლეგებს, რომელთაც გულწრფელად სჯერათ და უნდათ საქართველოს დასავლური მომავალი!”– ნათქვამია განცხადებაში

6 დეკემბერი. ორი ადამიანი ტოვებს სახელისუფლებო "იმედსა" და "POSTV"-ს

● 6 დეკემბერს მსახიობმა და ტელეწამყვანმა რუსკა მაყაშვილმა დატოვა ტელეკომპანია „იმედი“

„ვტოვებ ტელეკომპანია „იმედს“. ძალიან ბევრი მიზეზია იმისა, აქამდე ეს რატომ, არ გავაკეთე, თუმცა ყველაფერს აქვს საზღვარი! მორჩა, საკმარისია ამდენი ტყუილი“, – დაწერა რუსკა მაყაშვილმა „ინსტაგრამზე“.

ამ პოსტს წინ უსწრებდა მსახიობ ანდრო ჭიჭინაძის დაკავება. ანდრო ჭიჭინაძე 5 დეკემბერს დააკავეს. მას ბრალად სდებენ ჯგუფური ძალადობის ორგანიზებას, ხელმძღვანელობას, მასში მონაწილეობასა და ძალადობრივი ქმედებისაკენ საჯაროდ მოწოდებას. ეს დანაშაული 9 წლამდე პატიმრობას ითვალისწინებს.

რუსკა ამ დაკავებას გამოეხმაურა. ის წერდა, რომ მისი მეგობარი დააკავეს.

წყლის ჭავლისა და ცრემლსადენი გაზის ნაცვლად მშვიდობიან მომიტინგეებს "ტიტუშკები" არბევენ. პროტესტის მეათე დღე

შავებში ჩაცმული ნიღბიანი პირები აქციის მშვიდობიან მონაწილეებსა და ჟურნალისტებს თავს ესხმოდნენ, დაარბიეს ოპოზიციური პარტიის ოფისი. პოლიციას რეაგირება არ ჰქონია

● 6 დეკემბერს ცნობილი გახდა, მსახიობი და ტელეწამყვანი ნიკო ნანიტაშვილი აღარ მუშაობს პროსახელისუფლებო ტელეკომპანია POSTV-ში.

ჯერ არ ვიცით, მან თავად დატოვა ტელეკომპანია თუ ის სამსახურიდან გაუშვეს კრიტიკული პოსტის გამო.

30 ნოემბერს მან სოციალურ ქსელში კრიტიკული პოსტი დაწერა.

“არ შეიძლება ყოველდღიურად ვიღვიძებდეთ ამ მარაზმში, სისხლში და სიბინძურეში. არ შეიძლება მთელი ეს წლები ვედაროთ წინა სადისტურ მოპყრობებს და ვარკვიოთ, მაშინ უფრო სასტიკად უსწორდებოდნენ ხალხს თუ ახლა. ხალხის უმოწყალოდ ცემა, ეკლესია-მონასტრების ნგრევა, ტელევიზიების დარბევა რომ არ გვინდოდა, შევცვალეთ მთავრობა უკეთესი მომავლის იმედით!!!

მიმიფურთხებია ყველა ჯალათისთვის, ვინც თავის მოქალაქეს ასე ექცევა, ვინც წაქცეულ კაცს, მოხუცს და ქალს ხელს დაარტყამს… მიმიფურთხებია ყველასთვის, ვინც ქვეყნის ჩამონგრევას ცდილობს საკუთარი კეთილდღეობის გამო. მიმიფურთხებია ყველასთვის, ვინც არა რუსეთს ყვირის და რუსული ფულით ცხოვრობდა და ცხოვრობს დღემდე. მიმიფურთხებია ყველასთვის, ვინც საქართველოს დამონებას და განადგურებას ლამობს…

არ შეიძლება განსხვავებული აზრის გამო ერთმანეთი ვლანძღოთ,მიწაში ჩავდოთ და წიხლები ვურტყათ… ეს არაა ევროპა, ეს არ არის დემოკრატია, ეს აღარაა სიყვარული… არა ძალადობას!!! არაააა ძალადობააას!!! საქართველოს გაუმარჯოს!! ერთიანს, კაცთმოყვარეს და ევროპულს…რუსეთი ოკუპანტია…პუტინის დედას შევეცი, ყველგან და ყოველთვის… დიდება გმირებს, ვინც საქართველო და ქართველობა შემოგვინახა. ყველას გაუმარჯოს, ვინც ნამდვილად, გულით და სულით,სამშობლოს სიყვარულისთვის იბრძვის!!!”, – ასეთი იყო  მისი პოსტის შინაარსი.

● “მოძალადე სისტემა უკვე სახლებში გვივარდება!” – დაწერა 6 დეკემბერს ვასო აბაშიძის სახელობის ახალმა თეატრმა.

თეატრი მსახიობ ანდრო ჭიჭინაძის დაკავებას გამოეხმაურა.

“პოლიტიკური ნიშნით ანგარიშსწორება ვრცელდება ყველაზე და მათ შორის არიან ჩვენი თეატრის მსახიობებიც.

სისტემა ჩვენს გასაჩუმებლად ძალას არ იშურებს და საპასუხოდ ჩვენგან გაორმაგებულ წინააღმდეგობას მიიღებს. ჩვენ არ გავჩუმდებით და ამ ბრძოლაში ნამდვილად არ ვართ მარტო, ჩვენ ზურგს გვიმაგრებს ჩვენი მაყურებელი, რომელიც ჩვენთან ერთად რეჟიმს განაჩენს გამოუტანს!

ჩვენი თეატრი სოლიდარულია სისტემის ყველა პატიმრის მიმართ და ვითხოვთ ყველა დაკავებულის გათავისუფლებას.

ძალა ერთობაშია!“, – ნათქვამია თეატრის განცხადებაში.

5 დეკემბერი. პროტესტი საჯარო სამსახურში – პოსტს ტოვებს პარლამენტის IT

● სამსახური დატოვა პარლამენტის აპარატის თანამშრომელმა ალექსანდრე ძაძამიამ.

განცხადება სამსახურის დატოვების შესახებ მან თავად გამოაქვეყნა სოციალურ ქსელ LinkedIn-ზე.

განცხადება 2 დეკემბრით თარიღდება.

„საკუთარი სინდისის ხმა ყველაზე ღირებულია!“ – დაწერა LinkedIn-ზე ალექსანდრე ძაძამიამ.

ალექსანდრე ძაძამია პარლამენტის აპარატის ინფორმაციული ტექნოლოგიებისა და ტელეკომუნიკაციების დეპარტამენტის ინფორმაციული ტექნოლოგიების ინფრასტრუქტურის მართვის განყოფილების მთავარი სპეციალისტი იყო.

4 ოპოზიციური პარტია აქციაზე დაზარალებულებზე და მოძალადეებზე რეესტრს შექმნის

“ასევე, ვიზრუნებთ იმაზე, რომ მოქალაქეებს სწრაფი და კვალიფიციური სამართლებრივი დახმარება ჰქონდეთ”

● გამოქვეყნდა 100-მდე ქართველი მუსიკოსის მანიფესტი. ისინი უარს ამბობენ სახელმწიფო ღონისძიებებში მონაწილეობაზე.

მუსიკოსები წერენ, რომ “ქართული ოცნება” არალეგიტიმური ხელისუფლებაა. ისინი გმობენ პროევროპული აქციის მონაწილეებზე ძალადობას.

“ხელოვნება თავისი არსით მუდამ იყო თავისუფლებისა და თვითგამოხატვის სიმბოლო, შესაბამისად, ხელოვნება შეუძლებელია იყოს ჩუმი და შეზღუდული. ჩვენი, როგორც მუსიკოსების როლი მუდამ იყო, არის და იქნება იმ სათქმელის, ემოციისა და განწყობის გადმოცემა, რომელიც ჩვენს საზოგადოებაში არსებობს. სიტუაცია დღევანდელ საქართველოში, სადაც ადამიანებს ყოველდღიურად დევნიან, სცემენ და უკანონოდ აკავებენ თავისუფლების ერთგულებისა და ევროპული მომავლის დაცვის გამო, შეუძლებელია დარჩეს ჩვენი რეაგირების გარეშე”, – ნათქვამია განცხადებაში.

მუსიკოსები წერენ, რომ დღეს თვითგამოხატვაზე წინ მათი მოქალაქეობრივი პასუხისმგებლობა დგას, რომელიც აუცილებლად უნდა გასცდეს პროტესტს რუსთაველზე და გადაითარგმნოს საერთო გაფიცვაში.

 ერთი მხრივ, მუსიკოსები საზოგადოების კეთილგანწყობით და სიმპათიებით სარგებლობენ, რის გამოც ვალდებულები ვართ, ჩვენი რესურსი არ მოხმარდეს მმართველი პარტიის სოციალური იმიჯის წახალისებასა და პოზიციების გამყარებას. მეორე მხრივ, სახელმწიფო ღონისძიებები იმართება არალეგიტიმური მთავრობის მიერ იმ ხალხისგან შევსებული ბიუჯეტით, რომელიც საკუთარი სიცოცხლისა და თავისუფლების რისკის ქვეშ დაყენების ფასად იცავს სამშობლოს.

აქედან გამომდინარე, ჩვენ, მუსიკოსები, პროტესტს ვუცხადებთ არალეგიტიმურ ხელისუფლებას და უარს ვამბობთ ნებისმიერ სახელმწიფო ღონისძიებაში მონაწილეობაზე. ვგმობთ მათი მხრიდან პროტესტის მონაწილეების მიმართ არაპროპორციული და გადამეტებული ძალის გამოყენებას, მაროდიორობას, უკანონო დაჭერას, დაშინებასა და მრავალ სხვა დანაშაულებრივ მეთოდს, რომელსაც მმართველი პარტია ძალაუფლების შესანარჩუნებლად იყენებს. გვჯერა თქვენი და ჩვენი გამძლეობის. გვჯერა, რომ შევძლებთ დავუბრუნდეთ საქართველოს ისტორიულ, ევროატლანტიკურ გზას. გვჯერა, რომ ამ ომში გავიმარჯვებთ სახელოვნად”, – წერია მანიფესტში.

3 დეკემბერი. გრძელდება ელჩების გადადგომა. მეექვსე ასეთი შემთხვევა

● გადადგა საქართველოს საგანგებო და სრულუფლებიანი ელჩი ჩეხეთის რესპუბლიკაში თეა მაისურაძე.

„დავწერე განცხადება ჩეხეთში საქართველოს ელჩის პოსტიდან გადადგომის შესახებ. დიდი პატივი იყო, მემსახურა ჩემი ქვეყნის ეროვნულ ინტერესებისთვის თითქმის ორი ათწლეულის განმავლობაში, ხელი შემეწყო მისი ევროპულ და ევროატლანტიკურ ინტეგრაციისთვის და დამეცვა მისი სუვერენიტეტი და ტერიტორიულ მთლიანობა. მე საქართველოს ევროპული მომავლის ერთგული ვრჩები“, – დაწერა თეა მაისურაძემ X-ზე.

I’ve submitted my resignation as Ambassador of ??to??

It was a great honor 2serve national interests of my country 4 nearly 2decades, fostering its European&Euro-Atlantic integration, while defending its sovereignty&territorial integrity

I remain committed 2Georgia’s??Future!

— Tea Maisuradze ?????? (@MaisuradzeThea) December 2, 2024

28 ნოემბრიდან, პროტესტის დაწყებიდან დღემდე უკვე ხუთი ელჩი გადადგა.
ესენი არიან:

• საქართველოს ელჩი ბულგარეთში ოთარ ბერძენიშვილი
• საქართველოს ელჩი ნიდერლანდებში დავით სოლომონია
• საქართველოს ელჩის მოვალეობის შემსრულებელი იტალიაში ირაკლი ვეკუა
• საქართველოს ელჩი ლიეტუვაში სალომე შაფაქიძე
• საქართველოს ელჩი აშშ-ში დავით ზალკალიანი

ივანიშვილი “მაგნიტსკის აქტში”? აშშ-ის სენატი საქართველოს კრიზისზე

უილიამ ბრაუდერმა ისაუბრა კორუფციის როლზე საქართველოში მიმდინარე კრიზისში

●  ქართველმა მწერლებმა, მთარგმნელებმა და გამომცემლებმა მწერალთა სახლს მოსთხოვეს, გამოხატოს პოზიცია მიმდინარე მოვლენებზე

მათ მწერალთა სახლს მოთსხოვეს ოფიციალურ ფეისბუკგვერდზე გამოაქვეყნოს შემდეგი განცხადება:

• „სასწრაფოდ გათავისუფლდეს პატიმრობიდან პოეტი ზვიად რატიანი და გადაიყვანონ ის კლინიკაში, რადგან მისი ჯანმრთელობის მდგომარეობა უკიდურესად მძიმეა და სჭირდება გადაუდებელი სამედიცინო დახმარება;
• დაუყოვნებლივ გათავისუფლდეს პატიმრობიდან პოეტი და მასწავლებელი, თორნიკე ჭელიძე;
  სოლიდარობას ვუცხადებთ აქციაზე სასტიკად ნაცემ მთარგმნელს, დათა ხარაიშვილს და საპროტესტო აქციების ყველა მონაწილეს, რომელიც ამ დღეებში საქართველოს თვითგამოცხადებული ხელისუფლების ძალადობის მსხვერპლი გახდა.
• ვგმობთ საქართველოს კონსტიტუციის დარღვევას და ქვეყნის ევროპული კურსის ღალატს.“

მწერლები, მთარგმნელები და გამომცემლები საქართველოს მწერალთა კავშირის შენობაში მივიდნენ. ისინი მწერალთა კავშირის თავმჯომარე ქეთევან დუმბაძესთან ითხოვდნენ შეხვედრას, თუმცა, უშედეგოდ.

კომენტარი: სიტუაცია სერიოზულია, მაგრამ არავითარ შემთხვევაში უიმედო

დავით ზურაბიშვილი: “ამ აქციების გამო ბიძინა ივანიშვილს ხუხულასავით ენგრევა სტაბილურობის გარანტის იმიჯი”

● 90-ზე მეტმა ყოფილმა საჯარო მოხელემ დაგმო სასტიკი ძალადობა ადამიანების თავისუფალ ნებაზე

„ჩვენ მრავალი წელი გავატარეთ საჯარო სამსახურში და ყოველდღიური საქმიანობის ფარგლებში გულწრფელად და თავდაუზოგავად ვემსახურებოდით ქვეყნის განვითარებას და მის ევროპულ და ევრო-ატლანტიკურ მისწრაფებებს.

თითოეული საჯარო მოხელის თავდაუზოგავი მუშაობის შედეგად, ბევრი წარმატება იქნა მიღწეული ქვეყნის ევროინტეგრაციის მიმართულებით. თუმცა, ბოლო პერიოდში ხელისუფლების მიერ მიღებულმა გადაწყვეტილებებმა გააჩინა საფუძვლიანი ეჭვი, რომ საქართველო შორდებოდა მის ისტორიულ ევროპულ კურსს. დღეს კი, ჩვენი აზრით, დადგა მომენტი, როცა კითხვის ნიშნები აღარ არსებობს.

ჩვენ კატეგორიულად ვგმობთ საქართველოს მოსახლეობის თავისუფალ ნებაზე სასტიკ ძალადობას. გვჯერა, რომ ბევრი ჩვენი დღეს მოქმედი კოლეგა ჩვენსავით იზიარებს დემოკრატიულ ღირებულებებს, ჩვენსავით მიაჩნია, რომ ქვეყანა უნდა დაუბრუნდეს ევროატლანტიკურ კურსს და ისინიც შემოგვიერთდებიან, მათი თავისუფალი აზრის გამოხატვით“, – ნათქვამია განცხადებაში.

2 დეკემბერი. შსს-ს ტოვებს ერთი თანამშრომელი

● სამსახური დატოვა შინაგან საქმეთა სამინისტროს აკადემიის პროფესიული მომზადების სამმართველოს უფროსმა ინსტრუქტორმა, გიორგი გაბეხაძემ

“დღეს, 2024 წლის 2 დეკემბერს, მივიღე ერთ-ერთი მძიმე, თუმცა, გონებით და შინაგანი რწმენით ნაკარნახევი გადაწყვეტილება, მივმართე საქართველოს შსს-ს აკადემიის რექტორს პატაკით, დავტოვო შსს-ს აკადემიის ტაქტიკური მომზადების სამსახურის უფროსი ინსტრუქტორის თანამდებობა და დავეთხოვო შსს სამინისტროს სისტემიდან”, – დაწერა გაბეხაძემ სოციალურ ქსელში.

საქართველოს პრეზიდენტმა სალომე ზურაბიშვილმა მას “პირველი მერცხალი” უწოდა.

“შინაგან საქმეთა სამინისტროდან გამოჩნდა პირველი მერცხალი! ეს კი რეპრესიული აპარატის ნგრევის უტყუარი წინამორბედი ნიშანია! სახელმწიფო თქვენ ხართ, ვინც ყველა უწყებაში და რა თანამდებობაზე არ უნდა იყოთ, თქვენს სამშობლოს პირად კარიერულ ინტერესზე მაღლა აყენებთ!”, – ასე გამოეხმაურა საქართველოს პრეზიდენტი გაბეხაძეს.

1 დეკემბერი. საგარეო საქმეთა მინისტრის მოადგილე ტოვებს პოსტს

● სამსახური დატოვა საქართველოს საგარეო საქმეთა მინისტრის მოადგილემ თემურ ჯანჯალიამ

ჯანჯალია საგარეო საქმეთა სამინისტროში სხვადასხვა პოზიციაზე 1998 წლიდან მუშაობდა. 2021 წლის 9 ივნისიდან ის მინისტრის მოადგილე იყო.

ამ ინფორმაციის გავრცელების შემდეგ, საქართველოს პრემიერ მინისტრმა თქვა, რომ ეს დაგეგმილი საკადრო ცვლილება იყო. თუმცა, ამ განცხადებას ჯანჯალიამ დეზინფორმაცია უწოდა და დააზუსტა, რომ მან საკუთარი სურვილით დატოვა პოსტი.

“ჩემი გადაწყვეტილება განპირობებული იყო ბოლოდროინდელი მოვლენებით. ამ საკითხის ნებისმიერი სახით მანიპულირების თუ დამახინჯების მცდელობა მხოლოდ ხელს შეუწყობს მათ მიმართ პატივისცემის ძირის გამოთხრას, რომელიც ამას აკეთებს.

მე ვაფასებ დროს, რომელიც გავატარე საქართველოს საგარეო საქმეთა სამინისტროში. პატივი იყო, მემუშავა თავდადებული პროფესიონალების შესანიშნავ გუნდთან. ძალიან ვამაყობ ჩვენი ერთობლივი წვლილით.

მე კვლავ მჯერა, რომ ჩვენი კოლექტიური ძალისხმევით მივაღწევთ ნამდვილი ევროპული საქართველოს ხილვას, სადაც მომავალი თაობები ევროპული ოჯახის შემადგენლობაში იცხოვრებენ”, – დაწერა პრემიერის განცხადების შემდეგ თეიმურაზ ჯანჯალიამ.

● მეღვინეების ასოციაციამ განაცხადა, რომ აღარ გაიმართება ფესტივალი “ამერიმერი”.

ფესტივალი 7 დეკემბერს უნდა გამართულიყო. მეღვინეების ასოციაციამ დაწერა, რო ეს გადაწყვეტილება მიიღეს სამოქალაქო წინააღმდეგობის და პროტესტის პირობებში. მათ სოლიდარობა გამოუცხადეს საქართველოს ევროპული მომავლისთვის მებრძოლ თითოეულ ადამიანს.

ეს ასოციაცია არის მევენახეთა და მეღვინეთა კავშირი. ისინი წლებია ეწევიან მხოლოდ ორგანულ (ე.ი. ბიო ან ბიოდინამიურ) მევენახეობას და ბუნებრივ (ნატურალურ) მეღვინეობას.

ამ დრომდე იყო არაერთი განცხადება საჯარო უწყებების მოქმედი თანამშრომლებისგან, მოსამართლეებისგან, გაიფიცნენ უნივერსიტეტები და სკოლები.

ყველა ინფორმაცია გაფიცვების შესახებ – 28 ნოემბრიდან პირველ დეკემბრამდე პერიოში – ნახეთ აქ

საქართველოში დაიწყო დაუმორჩილებლობა. ვინ გაიფიცა და ვინ დატოვა სამსახური. 29 ნოემბერი-1 დეკემბრის მონაცემები

გაიფიცა რამდენიმე უნივერსიტეტი, გაჩნდა პროტესტის კერები სკოლებში, სისტემას ემიჯნებიან დიპლომატები, საჯარო უწყებების თანამშრომლები

აქ კი წაიკითხავთ თბილისისა და საქართველოს რეგიონების სკოლების ერთდღიანი პროტესტის შესახებ

თბილისისა და საქართველოს რეგიონების სკოლებში მოსწავლეები გაიფიცნენ

სკოლების სია მზარდია და სტატია პერიოდულად ახლდება