უკრაინის სოლიდარობის აქცია თბილისში: "საქართველოს ხელისუფლებისგან უკრაინის მხარდაჭერას ვერ ვხედავთ"
უკრაინის მხარდასაჭერი აქცია
თბილისში, უკრაინის საელჩოსთან უკრაინის მხარდამჭერი აქცია გაიმართა.
აქციაში მონაწილეობა მიიღეს სამოქალაქო აქტივისტებმა და ორგანიზაციებს, საჯარო პირებმა და პოლიტიკური პარტიებმა. აქციის ორგანიზატორი იყო მოძრაობა “სირცხვილია”.
აქციის მონაწილეები მიიჩნევენ, რომ რუსეთი საფრთხეს უქმნის როგორც უკრაინას, ისე საქართველოს.
აქციის ორგანიზატორებმა საქართველოში უკრაინის საელჩოს სახელზე ღია წერილი გაავრცელეს, სადაც გამოთქმულია მხარდაჭერა უკრაინელი ხალხის მიმართ და გაკრიტიკებულია საქართველოს ხელისუფლება უკრაინასთან დაკავშირებით პოზიციის გამო:
“ჩვენ ვერ ვხედავთ ოფიციალური თბილისისგან უკრაინელი ხალხისადმი გამოხატულ ხელშესახებ მხარდაჭერას, რაც განსაკუთრებით გულდასაწყვეტია,” – წერია განცხადებაში.
● მოსკოვს „მოთმინება ამოეწურა“: როგორ მოიქცევა დასავლეთი უკრაინასათან და საქართველოსთან?
● პოლიტიკური კრიზისი და პრორუსული განწყობები. როგორ ხედავენ საქართველოს უკრაინელი ჟურნალისტები
● სერგეი ლავროვი: საქართველოს NATO-ში ძალით შეყვანას ცდილობენ
უკრაინაში განვითარებულ მოვლენებთან დაკავშირებით საქართველოს ხელისუფლების პასიური პოზიცია დღევანდელ აქციაზე ქართველი ანალიტიკოსების და პოლიტიკოსების განხილვის მთავარი საგანი იყო.
პოლიტიკური მოძრაობა „დროა“-ს ლიდერმა, ელენე ხოშტარიამ უკრაინის საელჩოსთან აქციაზე განაცხადა, რომ “ქართული საზოგადოება უნდა შეთანხმდეს, რომ უკრაინის საკითხი არის საქართველოს ეროვნულ უსაფრთხოებასთან დაკავშირებული”.
„პუტინს სურს, რომ ჰქონდეს აბსოლუტურად ურყევი კონტროლი კონკრეტულად ევროპის ნაწილზე, რომელშიც ჩვენც ვხვდებით. როდესაც საქართველოს ხელისუფლება არ მოქმედებს, ეს ის კი არ არის, რომ ვინმეს მიმართ სოლიდარობას აკლებს, არამედ ჩვენივე ინტერესებს არ იცავს. როდესაც ხელისუფლება ქვეყნის ინტერესებს არ იცავს, საზოგადოება და ოპოზიცია უნდა იყოს ძალიან აქტიური. ჩვენ არ ვთმობთ ამ ქვეყანას! „ქართულ ოცნებას“ როგორც უნდა, ისე ხომ არ იქნება?! სწორედ ამიტომ, მსგავსი აქციები ძალიან მნიშვნელოვანია, რათა უკრაინელებს გავაგონოთ ჩვენი ხმა. ასევე მსოფლიოსაც უნდა გავაგონოთ, რომ საქართველო არის იმ ქვეყნების რიგში, რომლისთვისაც მიუღებელია რუსეთის დღევანდელი ქმედებები“, – აღნიშნა ხოშტარიამ.
მან ასევე ისაუბრა იმ კონკრეტულ ნაბიჯებზე, რომელიც, მისი აზრით, საქართველოს ხელისუფლებამ უნდა გადადგას.
ხოშტარიას აზრით, საქართველოს ხელისუფლება აქტიურად უნდა მუშაობდეს საქართველოს მეგობარ ქვეყნებთან, პირველ რიგში – აშშ-თან. ხელისუფლებამ – უკრაინასთან ერთად, რუსული საფრთხის კოტექსტში საქართველო უფრო მეტად უნდა ახსენოს.
მისი თქმით, საქართველოს მუდმივი, პროაქტიული კავშირი უნდა ჰქონდეს რეგიონის ქვეყნებთან და უშუალოდ უკრაინასთან:
“ბალტიის ქვეყნებთან, პოლონეთთან, თუნდაც დროებით უსაფრთხოების ალიანსზე საუბარი არის საჭირო… უნდა იყოს პირდაპირი და აქტიური კომუნიკაცია უკრაინელებთან – დახმარება, რომელიც შეიძლება იყოს ჰუმანიტარული და ამაზე უნდა იყოს ღია კომუნიკაცია”.
ასევე, ხოშტარიას აზრით, საქართველომ გაცილებით აქტიურად, ყველა ტრიბუნის გამოყენებით უნდა ისაუბროს და “მსოფლიოს გააგებინოს” საოკუპაციო ხაზთან შექმნილ მდგომარეობის შესახებ, პირველ რიგში, ადამიანების გატაცების პრაქტიკაზე.
“პრემიერ-მინისტრი უნდა ადგეს, იქ ჩავიდეს და იქედან ჩაერთოს CNN-ს. ეს არის ელემენტარული, რაც საქართველოს ხელისუფლების წარმომადგენლებს შეუძლიათ, რომ გააკეთონ“, – განაცხადა ხოშტარიამ.
__________
2021 წლის შემოდგომიდან რუსეთმა ასი ათასზე მეტი სამხედრო განათავსა უკრაინის საზღვართან, რის გამოც დასავლეთის ქვეყნები შიშობენ, რომ მოსკოვი ამზადებს უკრაინაზე თავდასხმას. რუსეთის ხელისუფლება უარყოფს შეჭრისთვის მზადებას.
