მიხეილ სააკაშვილი უკრაინის პრეზიდენტთან არსებულ რეფორმების საბჭოში დაინიშნება
საქართველოს ყოფილმა პრეზიდენტმა მიხეილ სააკაშვილმა უკრაინაში ახალ თანამდებობაზე მისი მომავალი დანიშვნა დაადასტურა.
როგორც სააკაშვილმა “დოიჩე ველეს” უკრაინული სამსახურისთვის მიცემულ ინტერვიუში განაცხადა, იგი უკრაინის პრეზიდენტთან არსებული რეფორმების ეროვნული საბჭოს აღმასრულებელი კომიტეტის ხელმძღვანელად იმუშავებს.
ამასთან, სააკაშვილს არ დაუზუსტებია ზუსტი თარიღი, როდის დაინიშნება ამ თანამდებობაზე.
”(უკრაინის პრეზიდენტს ვლადიმირ) ზელენსკის სურს გამოიყენოს სააკაშვილი, როგორც კატალიზატორი, იმისთვის, რომ მთავრობამ უფრო სწრაფად იმუშაოს, მეტი კონცენტრირება გააკეთოს რეფორმებზე და გახდეს უფრო ეფექტური,” – განაცხადა უკრაინელმა პოლიტოლოგმა ვლადიმირ ფესენკომ უკრაინული ტელეკომპანიის ჰომადსკოეს ეთერში.
ფესენკოს მიაჩნია, რომ სააკაშვილმა ზელენსკი “ტემპერამენტით” მოხიბლა. ამავე დროს, მისი აზრით, არსებობს მრავალი ვერსია, თუ რატომ სჭირდება ზელენსკის სააკაშვილი.
ერთ-ერთი მათგანია შინაგან საქმეთა გავლენიანი მინისტრის არსენ ავაკოვის „დაბალანსება“. თუმცა, თავად ფესენკოს მიაჩნია, რომ თუ ზელენსკის ასეთი მოტივი მართლაც აქვს, ის მეორეხარისხოვანია.
მანამდე სააკაშვილის კანდიდატურა რეფორმების დარგში ვიცე-პრემიერის პოსტზე განიხილებოდა. თუმცა, უკრაინული მედიის ცნობით, უმაღლეს რადაში წინასწარი მოსმენების დროს ამ გადაწყვეტილებამ საპარლამენტო უმრავლესობის წევრების საკმარისი მხარდაჭერა ვერ მიიღო.
