„თქვენ ფიქრობთ, რომ მედიკოსები უკვდავები არიან? - აფხაზეთში ექიმები აღშფოთებულები არიან
კორონავირუსით ინფიცირებულთა რიცხვის მკვეთრმა ზრდამ აფხაზეთში კრიზისული ვითარება შექმნა. საავადმყოფოებში ადგილები აღარ არის, ექიმებისა და სამედიცინო პერსონალის მწვავე დეფიციტია.
ჯანდაცვის სამინისტრომ დახმარების თხოვნით რუსეთს მიმართა, ექიმები კი კოლექტიურად და ინდივიდუალურად მიმართავენ საზოგადოებას აღშფოთებული განცხადებებით, რომელიც გამოწვეულია რესპუბლიკის მცხოვრებთა დაუდევრობითა და უპასუხისმგებლობით, რომელთა უმრავლესობაც უგულებელყოფს უსაფრთხოების ნორმებს.
უკანასკნელი ორი კვირის განმავლობაში, აფხაზეთში, სადაც 250 ათასი ადამიანი ცხოვრობს, ყოველდღიურად ინფიცირების დაახლოებით 200 ახალი შემთხვევა ფიქსირდება. 2021 წლის მარტთან შედარებით, ინფიცირებულთა რიცხვი თითქმის 10-ჯერ გაიზარდა.
პანდემიის დაწყებიდან 2021 წლის 18 ივლისამდე, აფხაზეთში, კორონავირუსით ინფიცირების 19 963 შემთხვევა დაფიქსირდა. მათგან 277 ადამიანი გარდაიცვალა, 16 294 კი გამოჯანმრთელდა.
„უამრავი შემთხვევაა, როდესაც ცუდი ეპიდემიოლოგიური ვითარების მიუხედავად, მასშტაბურ ქორწილებს იხდიან. რის შემდეგაც, მთელი ოჯახების ჰოსპიტალიზაცია ხდება“, – განაცხადა ჯანდაცვის მინისტრმა ედუარდ ბუთბამ.
პრობლემას ის ფაქტი აღრმავებს, რომ აფხაზეთში ვაქცინა აღარ არის. რუსეთის მიერ მიწოდებული 6 500 დოზა „Спутник-V“ ამოიწურა. პრეზიდენტი პირობას დებს, რომ ახალი ვაქცინები ივლისის ბოლომდე ჩამოვა, მაგრამ ოპოზიციონერი დეპუტატები ამტკიცებენ, რომ სინამდვილეში მან ვერ მოახერხა შეთანხმების მიღწევა რუსეთთან ვაქცინის ახალი დოზის მიწოდებაზე.
- როგორ გავხადოთ ქალაქი ლამაზი და კომფორტული? აფხაზეთი ბესლან ბაგათელიასთან ერთად
- „სად წავლენ ბავშვები, როდესაც წასასვლელი არსად აქვთ?“ – ისტორია აფხაზეთის სპორტკლუბის შესახებ. VIDEO
მაგრამ მთავარ პრობლემად კვლავინდებურად მოსახლეობის მიერ ეპიდემიოლოგიური უსაფრთხოების ზომების მასობრივი იგნორირება რჩება. სოციალურ ქსელებში, აფხაზი ექიმები სასოწარკვეთისა და აღშფოთებისგან მიმართვებს წერენ. ერთ-ერთი ყველაზე რეზონანსული გახდა გაგრელი ექიმის, ესმა ასლანძიას პოსტი:
„ვაკვირდები, რა ხდება ირგვლივ და ემოციებისა და აღშფოთების ქარიშხალი მიპყრობს. ჩემო ძვირფასო თანამოქალაქენო, რამდენიმე შეკითხვა მინდა დაგისვათ:
1. როგორ ფიქრობთ, ექიმები უკვდავები არიან? ისინი უსახლკაროები არიან? მათ ოჯახები, ბავშვები და მშობლები არ ჰყავთ?
2. ყველა ყვირის: „ეს ომია!“, დიახ, გეთანხმებით, ნაწილობრივ. და თუკი ეს ომია, რატომ უნდა „იბრძოლონ“ მხოლოდ მედიკოსებმა? მშვიდობიანმა მოსახლეობამ არაფერი არ უნდა გააკეთოს? სად გინახავთ, რომ მოსახლეობა მშვიდად დასეირნობდეს ტყვიებსა და ჭურვებში, ექიმები კი ყველას გადასარჩენად დარბოდნენ და მკერდით ეფარებოდნენ ამბრაზურას? ასეა? რაღაც არალოგიკურია.
3. როდესაც ჩვენ პროფესიას ვირჩევდით, თითოეულმა ის ავირჩიეთ, რაც მოგვწონდა: კარდიოლოგი, სტომატოლოგი, გინეკოლოგი, ენდოკრინოლოგი და ა.შ. ინფექციონისტის პროფესია ყველას არ აგვირჩევია.
4. როდესაც გთხოვენ: „ატარეთ პირბადეები და დაიცავით უსაფრთხოების ზომები“, თქვენ ასე ლაპარაკს იწყებთ: „რატომ მე? არავინ იცავს და არც მე დავიცავ“. მაგრამ ამ ზომების დაცვით, თქვენ საკუთარ თავს და თქვენს ახლობლებს იცავთ, ექიმებს კი არ უწევთ სამსახურს.
5. თქვენ ამტკიცებთ, რომ მოგბეზრდათ შეზღუდვებით ცხოვრება, რომ გინდათ იცხოვროთ და თავს არაფერზე უთხრათ უარი, იაროთ კონცერტებზე, მასობრივ ღონისძიებებზე, ქორწილებში, დაბადების დღეებზე. როგორ ფიქრობთ, ექიმებს სხვა რამ სურთ? ცხოვრება მათაც უნდათ!
ხალხო, შეჩერდით! თუ სიცოცხლე არ გინდათ – თქვენი უფლებაა. მაგრამ მედიკოსებს უნდათ, იცოცხლონ. ყველა ქანცგაწყვეტილია. მალე აღარავინ დარჩება, ვინც გიმკურნალებთ!“
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.
ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
