ერთპარტიულ პარლამენტში კანონმდებლობიდან ტერმინ “გენდერის” ამოღებას პირველი მოსმენით მხარი დაუჭირეს
ტერმინ “გენდერის” ამოღება კანონმდებლობიდან
საქართველოს კანონმდებლობიდან ტერმინი “გენდერის” ამოღებას “ქართული ოცნების” ერთპარტიულმა პარლამენტმა პირველი მოსმენით მხარი დაუჭირა. ოცნების მიერ განხორციელებული საკანონმდებლო ცვლილებებით “გენდერული თანასწორობის შესახებ კანონს” შეცვლილი სახელწოდებით “ქალისა და მამაკაცის თანასწორობის შესახებ კანონი” ერქმევა.
“ბიოლოგიური სქესი პარალელურად, საქართველოს კანონმდებლობაში, გარკვეული პერიოდის განმავლობაში, უცხოური გავლენისა და მათი წარმომადგენლების აქტიური ლობირებით, მიზანმიმართულად ხდებოდა ხელოვნური ტერმინის – “გენდერის” დანერგვა. აღნიშნული წარმოადგენდა მსოფლიოში მიმდინარე გლობალური პროცესების ერთგვარ ანარეკლს და სახელმწიფოსთვის, რიგ შემთხვევებში, გადაულახავ დაბრკოლებას წარმოადგენდა აღნიშნული ტენდენციის საწინააღმდეგო მიმართულებით პრინციპული პოზიციის დაკავება.” – წერია კანონპროექტის განმარტებით ბარათში.
ამასთან, განმარტებით ბარათში ხაზგასმულია, რომ აუცილებელია საქართველოს კანონმდებლობიდან ისეთი ხელოვნურად შექმნილი ტერმინის ამოღება, როგორიცაა “გენდერი” და მის ნაცვლად საქართველოს კონსტიტუციით აღიარებული ქალისა და მამაკაცის თანასწორობის პრინციპის საკანონმდებლო დონეზე განმტკიცება.
კანონპროექტით ხდება იმ ნორმების ამოღება, რომლებიც ადგენს საქართველოს პარლამენტში გენდერული თანასწორობის მუდმივმოქმედი საპარლამენტო საბჭოს, ავტონომიური რესპუბლიკების უმაღლესი წარმომადგენლობით ორგანოებში გენდერული თანასწორობის საბჭოსა და მუნიციპალიტეტებში გენდერული თანასწორობის საბჭოს შექმნის ვალდებულებას.
კომენტარი
“ქართული ოცნების” პრემიერმინისტრი ირაკლი კობახიძე: “რაც შეეხება სქესს და გენდერს, არანაირი განსხვავება არ არსებობს ამ ორ ცნებას შორის, თუმცა არიან ძალები, რომლებიც ცდილობენ, რომ რაღაცნაირად განსხვავება წარმოაჩინონ ამ ორ ცნებას შორის.
ჩვენ ვერავითარ ზღვარს ვერ გავავლებთ ამ ორ ცნებას შორის – სქესი და გენდერი არის ერთი და იგივე რამ, ეს ჩვეულებრივი სინონიმებია და როგორც სქესი არის ორი, ასევე გენდერიც არის ორი – კონკრეტული ნჯო-ების მოსაზრებებისგან განსხვავებით.”
2024 წლის 4 აპრილს საქართველოს პარლამენტმა გენდერული კვოტირება გააუქმა. საარჩევნო სიების ფორმირების პროცესში გენდერული კვოტირების გაუქმების ინიციატივით პარტია “გირჩი” გამოვიდა.
ალექსანდრე რაქვიაშვილის, იაგო ხვიჩიას, ჰერმან საბოს და ვახტანგ მეგრელიშვილის საკანონმდებლო ინიციატივით, ცვლილება შედის საარჩევნო კოდექსში – პროექტის თანახმად, პოლიტიკური პარტიები არ იქნებიან ვალდებულნი თავიანთი საარჩევნო სია დააკომპლექტონ გენდერული კვოტირების მოთხოვნების შესაბამისად.
18 აპრილს საქართველოს პრეზიდენტმა, სალომე ზურაბიშვილმა გენდერული კვოტების გაუქმებას ვეტო დაადო. ვეტო პარლამენტმა 15 მაისს დაძლია.
ომბუდსმენის აპარატი წერს, რომ სახალხო დამცველის მიმართვის საფუძველზე, ეუთო/ოდირმა სამართლებრივი დასკვნა მოამზადა გენდერული კვოტების გაუქმებასთან დაკავშირებულ ორგანულ კანონებზე, უარყოფითად შეაფასა ისინი და პოლიტიკურ და საჯარო ცხოვრებაში ქალთა მიმართ დისკრიმინაციის აღმოფხვრასთან დაკავშირებულ ადამიანის უფლებათა საერთაშორისო სტანდარტებთან შეუსაბამოდ მიიჩნია.
