სომხეთსა და აზერბაიჯანში საომარი მდგომარეობაა გამოცხადებული. რას ნიშნავს ეს?

სომხეთში, მთიან ყარაბაღსა და აზერბაიჯანშიც საომარი მდგომარეობაა გამოცხადებული. ეს დაკავშირებულია იმასთან, რომ 27 სექტემბრის დილას, მასშტაბური საბრძოლო მოქმედებები დაიწყო ყარაბაღში, მთელ საკონტაქტო ხაზზე. დაძაბულობა შეინიშნებოდა სომხეთ-აზერბაიჯანის საზღვარზეც, სომხური დასახლება ვარდენისის მიმართულებით.

უკვე გამოქვეყნებულია მთავრობების გადაწყვეტილებები, რომელიც საომარი მდგომარეობის პირობებსა და შეზღუდვებს განსაზღვრავს.

• ახალი ამბები, რეპორტაჟი, ფოტო/ვიდეო – 2020 წლის 27 სექტემბერს, ყარაბაღში მიმდინარე საბრძოლო მოქმედებები

ინფორმაცია ერევნიდან 

სომხეთის ხელისუფლებამ ქვეყანაში საომარი მდგომარეობის გამოცხადების გადაწყვეტილება უკვე 27 სექტემბერს, დღისით მიიღო. ის ძალაში გამოქვეყნებისთანავე შევიდა. 

სომხეთში, საომარი მდგომარეობის ფარგლებში:

• ცხადდება საყოველთაო მობილიზაცია
• ძალაში შევიდა სომხეთის შეიარაღებული ძალების გამოყენების გეგმა 
• სომხეთის შეიარაღებული ძალები, სხვა საჯარისო შენაერთები, სამოქალაქო თავდაცვისა და საგანგებო სიტუაციების ორგანოები ომის დროის შემადგენლობასა და სტრუქტურაზე გადადიან 
• ცხადდება 55 წლამდე ასაკის რეზერვში მყოფი ოფიცრებისა და რიგითების მობილიზაცია 
• თავდაცვის სამინისტრო უზრუნველყოფს რეზერვისტების მობილიზაციას 
• სამხედრო-სატრანსპორტო ვალდებულებების მქონე ორგანოების ჩართვა სატრანსპორტო საშუალებებით უზრუნველყოფის პროცესში, რომელიც განსაზღვრულია შეიარაღებული ძალების საჭიროებების შესახებ კანონით

ინფორმაცია ბაქოდან 

აზერბაიჯანის პრეზიდენტის ბრძანებით, 28 სექტემბრის 00:00 საათიდან, მთელი ქვეყნის ტერიტორიაზე, საომარი მდგომარეობა შევიდა ძალაში.

ამის გამო, საომარი მდგომარეობის პერიოდში, 21:00-დან 06:00 საათამდე, კომენდანტის საათი ცხადდება ბაქოში, სუმგაითში, ევლახში, ასევე, მინგეჩაურის, ნაფთალანის, აბშერონის, ჯაბრაილის, ფუზულის, აღჯაბადის, ბეილაგანის, აღდამის, ბარდის, ტერტერის, გორანბოის, გოიგოლის, დაშქესანის, გადაბეის, თოვუზის, შამქორის, ყაზახისა და აღსთაფის რაიონებში.

მითითებულ საათებში, ადამიანებს ეკრძალებათ ქუჩებში გადაადგილება და სპეციალური ნებართვისა და პირადობის დამადასტურებელი საბუთის გარეშე, საზოგადოებრივი თავშეყრის ადგილებზე ყოფნა.

აღნიშნულ ქალაქებსა და რაიონებში სპეციალური რეჟიმი წესდება შესვლა-გასვლაზე, იზღუდება ტრანსპორტის გადაადგილება.