სოხუმში ანდრეი სახაროვის გამოსახულებით შექმნილი კედლის ნახატი გამოჩნდა
ფრესკა სახაროვის პორტრეტით სოხუმში
სოხუმის შესასვლელთან ახალი კედლის ნახატი (street art) გამოჩნდა, რომელზეც გამოსახულია საბჭოთა დისიდენტი, ადამიანის უფლებათა დამცველი და ნობელის პრემიის ლაურეატი ანდრეი სახაროვი, რომელსაც აფხაზეთში განსაკუთრებული პატივისცემით მოიხსენიებენ.
ნახატზე, რომელიც მხატვარ კადირ ტვანბას ეკუთვნის, სახაროვის პორტრეტთან ერთად დატანილია წარწერა: “იყაბუპი“ (აფხაზურად “გმადლობთ“).
ნახატის შექმნის იდეა 2022 წელს გაჩნდა, მას შემდეგ, რაც სოხუმის ადმინისტრაციამ საჯარო განხილვის გარეშე გადაწყვიტა ქალაქის ერთ-ერთი ცენტრალური ქუჩისთვის, რომელსაც ანდრეი სახაროვის სახელი ერქვა, სახელის შეცვლა და მისთვის გენერალ ვლადიმირ არშბას სახელის მინიჭება.
ამ გადაწყვეტილებამ აფხაზურ საზოგადოებაში ფართო უკმაყოფილება გამოიწვია. კრიტიკოსების თქმით, პროტესტი თავად გენერალ არშბას წინააღმდეგ არ ყოფილა, რადგან ის აფხაზეთის შეიარაღებული ძალების შექმნის ერთ-ერთ ფუძემდებლად მიიჩნევა და ბევრი თვლიდა, რომ საკუთარი სახელობის ქუჩას იმსახურებდა. თუმცა, საზოგადოების ნაწილისთვის მიუღებელი აღმოჩნდა ის, რომ ამისთვის სახაროვის სახელობის ქუჩა შეირჩა.
მიუხედავად წინააღმდეგობისა, ქუჩას სახელი საბოლოოდ მაინც გადაერქვა. ამავე პერიოდში ქალაქის ადმინისტრაციამ უარი თქვა სახაროვისადმი მიძღვნილი კედლის მხატვრობის პროექტის განხორციელებაზე. შედეგად, ფრესკა ქალაქის საზღვრებს გარეთ გაჩნდა.
აფხაზეთში ანდრეი სახაროვს ხშირად არა მხოლოდ როგორც მეცნიერს, არამედ როგორც პოლიტიკურ და მორალურ ფიგურას იხსენებენ. ადგილობრივ საზოგადოებაში განსაკუთრებულად ფასდება მისი საჯარო მხარდაჭერა აფხაზების თვითგამორკვევის უფლების მიმართ. სახაროვი ასევე ცნობილია იმით, რომ საქართველო “პატარა იმპერიად“ მოიხსენია. ეს შეფასება აფხაზურ პოლიტიკურ მეხსიერებაში დღემდე მნიშვნელოვან ადგილს იკავებს.
