მოლაპარაკებები უშედეგოდ დასრულდა. დანიელსონი საქართველოს დღეს დატოვებს

კრისტიან დანიელსონის მედიაციით ხელისუფლებასა და ოპოზიციას შორის გამართული შეხვედრა, რომელიც თითქმის ათ საათს გაგრძელდა, უშედეგოდ დასრულდა. 

როგორც ევროპული საბჭოს პრეზიდენტის, შარლ მიშელის წარმომადგენელმა ჟურნალისტებთან გამართულ პრესკონფერენციაზე განაცხადა, გარკვეულ საკითხებზე შეთანხმება მხარეებს შორის არსებობს, თუმცა არის საკითხები, რომლებზეც კონსენსუსი მიღწეული არ არის:

“ზოგიერთ საკითხზე მნიშვნელოვანი პროგრესის მიღწევა მოხდა პრეზიდენტ მიშელის მიერ დატოვებულ 6-პუნქტიან გეგმასთან დაკავშირებით. რაც შეეხება სხვა საკითხებს, აქ ნაკლები პროგრესი და წინსვლა იყო.”

დანიელსონი საქართველოს 19 მარტს დატოვებს, რის შემდეგაც საქართველოში არსებულ მდგომარეობაზე შარლ მიშელს ანგარიშს ჩააბარებს.

“ლიდერებზეა დამოკიდებული და მათზეა პასუხისმგებლობა პოლიტიკური კრიზისიდან გამოსავალი მოიძებნოს”, – განაცხადა დენიელსონმა.

• წინაისტორია

  რატომ შეიქმნა საქართველოში პოლიტიკური კრიზისი?

  

  31 ოქტომბრის საპარლამენტო არჩევნების შემდეგ საქართველოში მწვავე პოლიტიკური კრიზისი შეიქმნა. ოპოზიცია არჩევნებს გაყალბებულად მიიჩნევს და მის შედეგებს არ აღიარებს. პარლამენტში გასულმა ოპოზიციონერმა დეპუტატებმა (ექვსი დეპუტატის გამოკლებით) უარი თქვეს სადეპუტატო მანდატებზე და მმართველი გუნდი “ქართული ოცნება” მარტო დატოვეს პარლამენტში. ეს საქართველოს ისტორიაში პირველი შემთხვევაა, როდესაც ქვეყანას ერთპარტიული პარლამენტი ჰყავს.

  პოლიტიკური კრიზისი ქვეყანაში კიდევ უფრო გაამწვავა მთავარი ოპოზიციური პარტიის “ნაციონალური მოძრაობის” ოფისში ჩატარებულმა სპეცოპერაციამ, რომლის დროსაც ამ პარტიის თავმჯდომარე ნიკა მელია დააკავეს.

  მელიას დაკავებას უპრეცედენტო რეაქცია მოჰყვა როგორც ქვეყნის შიგნით, ისე მის ფარგლებს გარეთ.

  გადადგა ქვეყნის პრემიერ-მინისტრი გიორგი გახარია, რომელიც მელიას დაკავების წინააღმდეგი იყო, თუმცა გუნდის შიგნით უმცირესობაში აღმოჩნდა.

  საქართველოს ამერიკელმა და ევროპელმა პარტნიორებმა ოპოზიციური პარტიის ოფისში მოწყობილი სპეცოპერაცია შეაფასეს, როგორც “დემოკრატიის გზაზე უკან გადადგმული ნაბიჯი”.

  ოქტომბრიდან მოყოლებული პოლიტიკურმა პროცესებმა ფაქტობრივად ქუჩაში გადაინაცვლა. ოპოზიცია და საზოგადოებრივი აქტივისტები პერმანენტულ აქციებს აწყობენ და სამთავრობო შენობების პიკეტირებას ახდენენ.

  ოპოზიციას ორი მთავარი მოთხოვნა აქვს – რიგგარეშე საპარლამენტო არჩევნების დანიშვნა და ნიკა მელიას და ასევე სხვა პოლიტიკური ნიშნითვ დაკავებული ადამიანების გაავისუფლება. დაკავებულებს შორის არის ოპოზიციური ტელეკომპნია “მთავარის” ერთ-ერთივ მეწილი გიორგი რურუა, რომელსაც უარაღის უკანონო შენახვა-ტარებას ედავებიან. დამოუკიდებელი იურისტები ამბობენ, რომ მელიას და რურუას საქმეები სამართლებრივ სარჩულს მოკლებულია.

  ოქტომნბრის შემდეგ, ხელისუფლებასა და ოპოზიციას შორის  მოლაპარაკებების რამდენიმე რაუნდი გაიმართა აშშ-ის ელჩის და საქართველოში აკრედიტებული სხვა დიპლომატების ფასილიტატორობით, თუმცა ამ საუბრებს შედეგი არ მოჰყოლია.

  1 მარტს თბილისში ერთ-ერთი ყველაზე გავლენიანი ევროჩინოვნიკი, ევროსაბჭოს პრეზიდენტი შარლ მიშელი ჩამოვიდა, რომელმაც დაპირისპირებულ მხარეებს შორის მოდერატორის ფუნქცია აიღო.

“დასავლეთმა ნახა, ვისთან აქვს საქმე” – რას ამბობს ოპოზიცია

ოპოზიცია ამბობს, რომ მოლაპარაკება ქართულმა ოცნებამ ჩაშალა.

“პირდაპირ გეტყვით, ძალიან ვწუხვარ, რომ ამდენ საათიანი მუშაობის შედეგად, ჩვენ ვერ ვაჩვენეთ მაღალი კულტურა ქართული საზოგადოებას, ვერც ევროპული სტანდარტი. ღიად მინდა განვაცხადო, რომ ამ ყველაფერში დამნაშავე არის ქართული ოცნება” – განაცხადა “სტრატეგია აღმაშენებლის” თავმჯდომარემ, გიორგი ვაშაძემ.

მისივე თქმით, ოპოზიცია შეთანხმებისკენ იყო განწყობილი, თუმცა “ქართული ოცნების” დამოკიდებულებიდან გამომდინარე, შედეგის მიღწევა შეუძლებელი გახდა. 

გიგა ბოკერიას თქმით, „ქართული ოცნების“ მხრიდან პოლიტიკურად შეურაცხადი პოზიცია იყო პოლიტპატიმრებისა და ვადამდელი არჩევნების საკითხზე. შესაბამისად, ბოლომდე მოხდა ხელისუფლების გაშიშვლება.

“მათ გააფუჭეს ყველაფერი”, – ასე გამოეხმაურა ზურაბ ჯაფარიძე შეხვედრის ჩაშლას.

“მათი [ხელისუფლების] პრეტენზიები იყო ამოუწურავი და საბოლოო ჯამში მოხდა ის რაც მოხდა და დასრულდა ეს მოლაპარაკებები. ერთადერთი ახსნა ამ ყველაფერს აქვს ის, რომ ამ ხალხს ფეხზე ჰკიდია ევროკავშირი, ევროპული საბჭოს პრეზიდენტიც, რეპუტაციაც და საქართველოს ევროატლანტიკური მისწრაფებებიც.

მომლაპარაკებლების მცდელობა იყო რომ მიეღწიათ ისეთი დოკუმენტისთვის, რომელზეც ქართული ოცნება მაინც იქნებოდა თანახმა. დოკუმენტი რომელსაც ისინი გვთავაზობდნენ, რამდენჯერმე გაფუჭდა. ჩვენთვის ამოუხსნელი იყო რატომ ხდებოდა ეს, მაგრამ მერე ცხადი გახდა, რომ ქართული ოცნება არ თანხმდებოდა არაფერზე. საუბარი იმაზე კი არ იყო, რომ რაიმე კომპრომისზე წამოსულიყვნენ, არაფერ რაციონალურზე ისინი თანახმა არ იყვნენ. არაფერზე საერთოდ“, – ამბობს ჯაფარიძე.

ირაკლი კობახიძე: ისინი ითხოვდნენ კანონის უზენაესობის ფეხქვეშ გათელვას

კობახიძის თქმით, შეთანხმების მიუღწევლობაში დამნაშავე ოპოზიციაა, რადგან მათ ჰქონდათ ულტიმატუემები, რომლებიც „კანონის უზენაესობის ფეხქვეშ გათელვას“ გულისხმობდა.

“ქართული ოცნების” თავმჯდომარემ აღნიშნა, რომ ოპოზიციის თვითმიზანი იყო მოლაპარაკების ჩაშლა და მათ არ სურდათ შეთანხმების მიღწევა:

„იყო საინტერესო პროცესი, იყო წინსვლაც. თუმცა, სამწუხაროდ გამართლდა ის, რაზეც ვსაუბრობდით, როგორც ჩანს, ოპოზიციისთვის შეთანხმების ჩაშლა იყო თვითმიზანი. მათ მიერ დაყენებული იყო ისეთი ულტიმატუმები, რომლებიც ითვალისწინებდა კანონის უზენაესობის ფეხქვეშ გათელვას. ბუნებრივია, ასეთი ულტიმატუმები არის აბსოლუტურად მიუღებელი დიალოგის პროცესში.“

______________________________

● პოლიტიკური კრიზისის განსამუხტად, თბილისში ევროსაბჭოს პრეზიდენტის წარმომადგენელი ჩამოვიდა
● რუსეთის საგარეო დაზვერვა: აშშ გაღიზიანებულია “ოცნებით”, რომელიც უსიტყვოდ არ მიჰყვება დასავლურ კურსს
● ყოფილი ელჩები და დიპლომატები ხელისუფლებას მოუწოდებენ, გაათავისუფლონ ნიკა მელია
● ირაკლი ღარიბაშვილი: ვადამდელი არჩევნები არ განიხილება
●მოსაზრება: ვის ელაპარაკება ოპოზიცია
●რას ნიშნავს გახარიას გადადგომა და ღარიბაშვილის დაბრუნება? გია ნოდიას თვალსაზრისი