საქართველოს მეექვსე პრეზიდენტად მიხეილ ყაველაშვილი აირჩიეს
საქართველოს მეექვსე პრეზიდენტად მიხეილ ყაველაშვილი აირჩიეს
პარლამენტის შენობაში საქართველოს პრეზიდენტის არჩევნების ხმის მიცემის პროცედურა დასრულდა – 225 ხმიდან 224 ხმა მიიღო მიხეილ ყაველაშვილმა “ქართული ოცნების” კანდიდატმა.
ამგვარად, საქართველოს მეექვსე პრეზიდენტი მიხეილ ყაველაშვილი გახდა.
ყაველაშვილი ყოფილი ფეხბურთელია, ის სხვადასხვა დროს თამაშობდა ისეთ გუნდებში, როგორიცაა მანჩესტერ სითი, ვლადიკავკაზის ალანია.
ყაველაშვილის კანდიდატურა ამ პოსტზე პირადად საქართველოს არაფორმალურმა მმართველმა, ოლიგარქმა ბიძინა ივანიშვილმა შეარჩია.
ყაველაშვილი პოლიტიკური მოძრაობა “ხალხის ძალის” გუნდის წევრი იყო. ეს პოლიტიკური ძალა “ქართული ოცნების” ერთგულმა დეპუტატებმა დააფუძნეს, იგი განსაკუთრებული ანტიდასავლური რიტორიკით გამოირჩევა.
შეგახსენებთ, რომ ისტორიაში პირველად საქართველოში პრეზიდენტი აირჩია არა ხალხმა პირდაპირი წესით, არამედ 300 წევრისგან შემდგარმა კოლეგიამ.
კენჭისყრის პროცესის დროს გაბათილდა მხოლოდ ერთი ხმა. ეს ხმა ეკუთვნის დეპუტატ ადა მარშანიას, რომელმაც კენჭისყრამდე განაცხადა, რომ ყაველაშვილს არ მისცემდა ხმას, რადგან მიაჩნია, რომ “ოცნებამ” არასწორი კანდიდატი შეარჩია ამ თანამდებობაზე.
კენჭისყრის შედეგები ცესკოს თავმჯდომარემ გიორგი კალანდარიშვილმა გამოაცხადა. მან თქვა, რომ საარცევნო პროცესი შეფერხებების გარეშე წარიმართა.
შედეგების გამოცხადებისას დარბაზში იმყოფებოდა თავად მიხეილ ყაველაშვილი, თუმცა საზოგადოებისთვის მას სიტყვით არ მიუმართავს.
“30 წელი საქართველოს არ ჰყოლია ასეთი პატრიოტი და ფსიქიკურად გაწონასწორებული პრეზიდენტი” – განაცხადა პრემიერმა კობახიძემ ყაველაშვილის პრეზიდენტად არჩევის შესახებ.
ამ პროცესის პარალელურად, პარლამენტის შენობასთან და ასევე საქართველოს სხვადასხვა ქალაქებში მიმდინარეობს საპროტესტო აქციები, სადაც ადამიანების მთავარი მოთხოვნაა დაინიშნოს ხელახალი საპარლამენტო არჩევნები, რადგან 26 ოქტომბრის არჩევნებს გაყალბებულად მიიჩნევს როგორც ოპოზიცია და სამოქალაქო საზოგადოება, ისე საქართველოს მოქმედი პრეზიდენტი სალომე ზურაბიშვილი. ეს არჩევნები არ აღიარა არც ევროკავშირის წევრმა ქვეყნებმა (უნგრეთის გამოკლებით).
საქართველოს მოქმედი პრეზიდენტი სალომე ზურაბიშვილი არ აღიარებს საპრეზიდენტო არცევნების შედეგს და აცხადებს, რომ ვიდრე ახალი საპარლამენტო არჩევნები არ დაინიშნება, არ აპირებს პოსტის დატოვებას და პრეზიდენტის რეზიდენციის – ორბელიანების სასახლის დატოვებას.
