"ვლოცულობთ მშვიდობისა და ერთსულოვნებისათვის" - საპატრიარქო პარლამენტთან მიმდინარე მოვლენებზე
საპატრიარქო რუსული კანონის საწინააღმდეგო აქციებზე
“ეკლესია, როგორც ჩვენი ერისა და ქვეყნის ყველაზე დიდი გამაერთიანებელი და მოამაგე, გულმხურვალედ ლოცულობს მშვიდობისა და ერთსულოვნებისათვის“, – ასე ეხმაურება საქართველოს საპატრიარქო თბილისში, საქართველოს პარლამენტთან მიმდინარე მასშტაბურ აქციებს, რომელსაც ორი დღეა სპეცრაზმი წყლის ჭავლით და ცრემლმდენი გაზით არბევს.
- გაზი, წყლის ჭავლი, დაკავებები – მასშტაბური აქცია თბილისში რუსული კანონის წინააღმდეგ. ქრონოლოგია და ბევრი ფოტო
- უცხოელი გავლენის აგენტების კანონპროექტი პირველი მოსმენით მიღებულია, სპეცრაზმმა აქციაზე წყლის ჭავლი და წიწაკის სპრეი გამოიყენა
- “ეს კანონი არავის სჭირდებოდა, არსაიდან არ მოდის, თუ არა მოსკოვის კარნახით” – სალომე ზურაბიშვილი
საპატრიარქოს განცხადება მხოლოდ აქციების მეორე დღეს, გვიან ღამით გამოქვეყნდა. მას შემდეგ, რაც მრავალათასიან აქციაზე ვითარება უკიდურესად დაიძაბა. ადამიანები მხუთავი გაზისგან თავდაცვას ქაშუეთის ეკლესიასა და მიმდებარე შენობებში შეფარებით ცდილობდნენ.
“ჩვენი ქვეყანა მტკიცე სახელმწიფოდ ჩამოყალიბების ურთულეს გზას გადის, რისთვისაც დღეს უდიდესი სიფრთხილის გამოჩენა გვმართებს როგორც სახელმწიფო ინსტიტუციების, ასევე საზოგადოების მხრიდან.
ეკლესია, როგორც ჩვენი ერისა და ქვეყნის ყველაზე დიდი გამაერთიანებელი და მოამაგე, გულმხურვალედ ლოცულობს მშვიდობისა და ერთსულოვნებისათვის“, – ვკითხულობთ საპატრიარქოს განცხადებაში.
განცხადებაში აკრიტიკებენ იმ ადამიანებს, რომლებიც, განცხადებისვე ტექსტის მიხედვით, “პოლარიზებას აღვივებენ”. მათ შორის, სასულიერო პირებს:
“ჩვენს სამეზობლოში არსებული რთული ვითარებიდან გამომდინარე, მშვიდობიანი კურსის შენარჩუნება და ქვეყნის დამოუკიდებლობა ქვეყნის წინსვლისათვის ერთადერთი ამოსავალი ფაქტორია. მშვიდობის დარღვევის მცდელობად მიგვაჩნია პოლარიზების გამღვივებელი რადიკალური განცხადებები, რომელი მხრიდანაც უნდა ვრცელდებოდეს ისინი, მით უმეტეს, სასულიერო პირთაგან.
სოციალურ ქსელში ხდება იმ ცალკეულ სასულიერო პირთა ქადაგებების თუ გამოსვლების ტირაჟირება, რომელნიც პოლიტიკურ თემებს ეხებიან, იქნება ეს ჩრდილოელი მეზობლის მიმართ გადაჭარბებული ,,სიმპათიები” თუ უშუალოდ სახელმწიფოს მიმართ რადიკალური კრიტიკა”, – ნათქვამია განცხადებაში.
ორი დღეა თბილისში, რუსთაველის გამზირზე, ათობით ათასი ადამიანი იკრიბება “უცხოური გავლენის აგენტების” შესახებ კანონის გასაპროტესტებლად. კანონპროექტი პარლამენტმა, 76 ხმით, 13-ის წინააღმდეგ, პირველი მოსმენით 7 მარტს მიიღო.
ამ კანონს როგორც საქართველოში, ისე მის ფარგლებს გარეთ ყველა, მთავრობის გარდა, რუსულ კანონს უწოდებს და ამბობს, რომ მისი მიღება ქვეყნისთვის დიდი ბარიერია ევროკავშირისკენ მიმავალ გზაზე.
ორი დღეა მთავრობა აქციას სპეცრაზმის გამოყენებით შლის. ადამიანებს უშენენ წყლის ჭავლსა და ცრემლმდენ გაზს. აკავებენ აქციის მონაწილეებს. გუშინ, 7 მარტს გამართულ აქციაზე შსს-მ 60 ადამიანი დააკავა წვრილმანი ხუილგნობისა და პოლიციისთვის წინააღმდეგობის გაწევის ბრალდებით.
საპატრიარქო რუსული კანონის საწინააღმდეგო აქციებზე
