სალომე ზურაბიშვილის წლიური ანგარიში - რა თქვა პრეზიდენტმა. მოკლედ

საქართველოს პრეზიდენტი სალომე ზურაბიშვილი წლიური ანგარიშით პარლამენტში წარსდგა. მან ისაუბრა საქართველოში შექმნილ პოლიტიკურ კრიზისზე, ნამახვანჰესზე, ევროკავშირთან საქართველოს ურთიერთობაზე, გავრილოვის ვიზიტზე და სხვა საკითხებზე.

პრეზიდენტის თქმით, საქართველომ ევროკავშირიდან მიიღო ყველაზე დიდი მხარდაჭერა, მაგრამ ვერ დააფასა.

“არნახული რამ მოხდა იმის დასტურად, თუ რაოდენ მნიშვნელოვანია საქართველო, მისი დემოკრატიულობა და მისი სტაბილურობა ევროპისათვის და რაოდენ დაახლოებულები ვართ უკვე. ევროკავშირიდან მივიღეთ ყველაზე დიდი მხარდაჭერა და ვფიქრობ, საკმარისად ვერ გავიაზრეთ და ვერც დავაფასეთ. არა მხოლოდ ფინანსური თუ მატერიალური, არამედ პოლიტიკური და მორალური“, – განაცხადა ზურაბიშვილმა.

მისივე თქმით, ნულოვანი თამაში დასრულებულია და ერთადერთი გზა დაგვრჩა – შეთანხმების. მან გააკრიტიკა ხელისუფლება და ოპოზიცია და მათ შეთანხმებისკენ მოუწოდა.

“ქვეყნის ხელისუფლებას არ ეყო გამბედაობა იმისთვის, რომ ქვეყნის სტაბილურობა და დემოკრატიის პროგრესი, ევროპის აქტიური მოკავშირეობა უფრო მაღლა დაეყენებინა ვიდრე ცალკეული დეტალები.

ოპოზიციას კი, იმისათვის, რომ განთავისუფლებულიყო გარედან შანტაჟისა და წნეხისაგან, საკუთარი ამომრჩევლისთვის პატივი ეცა.”

ზურაბიშვილმა ფასილიტატორებს მადლობა გადაუხადა ჩართულობისთვის და აღნიშნა, რომ დახმარება უშედეგოდ არ ჩაივლის.

_______________________________

● შეუჩერებს თუ არა ევროკავშირი საქართველოს დახმარებას და რა იქნება შემდეგ
● შეთანხმება ისევ ვერ მოხერხდა. დანიელსონი საქართველოს დღეს დატოვებს
● ევროკავშირში საქართველოს ელჩმა თანამდებობა დატოვა

__________________________________

ამასთან, ზურაბიშვილი უკრაინაში მიმდინარე მოვლენებსაც გამოეხმაურა და სოლიდარობა გამოუცხადა მათ. მისი თქმით, აუცილებელია, რომ კიევში საქართველოს ელჩი სასწრაფოდ დაბრუნდეს.

“არ მინდა, რომ არ ვახსენო ჩვენი უკრაინელი მეგობრების დღევანდელი ბრძოლა და მათ არ გამოვუცხადო სოლიდარობა. მიმაჩნია, რომ ამ სოლიდარობის ნიშნად, აუცილებელია, რომ სასწრაფოდ დავაბრუნოთ ელჩი კიევში”, – აცხადებს ზურაბიშვილი. 

______________________________

● უკრაინა და რუსეთი დიდი ომის ზღვარზე
● უკრაინიდან გამოწვეული ელჩი ისევ თბილისშია
_____________________________

ნამახვანჰესზე საუბრისას, პრეზიდენტმა აღნიშნა, რომ უალტერნატივოა ორივე – როგორც მოსახლეობის, ისე ინვესტორის – მოსაზრების შეჯერება:

“საჭიროა მეტი კომუნიკაცია, მეტი საჯაროობა, მეტი გაანალიზება ყველა არგუმენტის და ყველა შესაძლო საფრთხის.

სასურველია, შეიქმნას სახელმწიფო კომისია, სადაც ეკონომისტები, ენერგეტიკოსები ბუნების დამცველები, მოსახლეობა და ექსპერტები ერთად განიხილავენ არამხოლოდ ამ ჰესის ბედს, არამედ მომავალ გეგმებსაც.”

______________________________

● მათი ხეობა. როგორ იცავენ ადგილობრივები საკუთარ სახლებს ნამახვანჰესის დიდი პროექტისგან

_____________________________

პრეზიდენტი შეეხო გავრილოვისა და პოზნერის საქართველოში ვიზიტებსაც. როგორც ზურაბიშვილმა აღნიშნა, სიფრთხილე რომ გამოგვეჩინა, გავრილოვს სპიკერის სავარძელში არ მივუშვებდით.

“მეტი ყურადღება უნდა გამოვიჩინოთ და მეტი სიფრთხილით მივუდგეთ ყველა შესაძლო მანიპულირებას, რომლის ინიციატივაც შეიძლება ქვეყნის გარედან მოდიოდეს. ასეთი სიფრთხილე რომ გამოგვეჩინა, არ მივიღებდით არც პოზნერის ვიზიტით გამოწვეულ ვნებათაღელვას და არც გავრილოვს მივუშვებდით პარლამენტის თავმჯდომარის სავარძელში”, – თქვა ზურაბიშვილმა.

პრეზიდენტმა ხაზი გაუსვა იმას, რომ რეგულაციები ყველგან ერთნაირად უნდა ვრცელდებოდეს, როგორც ეკლესიაში, ისე პოზნერის ნადიმზე:

“არსებული რეგულაციების ყველაზე ერთნაირად გავრცელებაა. ყველგან: ფეხბურთის სტადიონზე, ნოვრუზის დღესასწაულზე თუ ეკლესიაში წირვაზე, ან კიდევ პოზნერის ნადიმზე თუ ჩვენი მოქალაქეების დიდი ხნით გადადებულ ქორწილებში და დაბადების დღეებზე, საპროტესტო აქციებზე თუ სხვა საზოგადოებრივ თავყრილობებზე.” 

_______________________________

● პოზნერის ხმაურიანი ვიზიტი თბილისში. შეფასებები