ევროკავშირი, ნიკა გვარამია და უკრაინა. რა თქვა საქართველოს პრეზიდენტმა
სალომე ზურაბიშვილის ინტერვიუ
საქართველოს პრეზიდენტმა სალომე ზურაბიშვილმა “პალიტრანიუსს” ვრცელი ინტერვიუ მისცა, სადაც ბევრ მნიშვნელოვან საკითხზე ისაუბრა.
მთავარი, რაც პრეზიდენტმა თქვა:
ევროკავშირი
კითხვაზე, რა არ გააკეთა საქართველომ ევროკავშირის კანდიდატობისთვის ისეთი, რისი გაკეთებაც უკეთ შეეძლო – პრეზიდენტმა უპასუხა, რომ მმართველი პარტია “ქართული ოცნებიდან” ევროკავშირზე დაუფიქრებელი განცხადებები გვესმის და სხვა რიტორიკა შეიძლებოდა.
მისივე თქმით, ყველა იმას ელოდება, მომავალ კვირას რა იქნება – კომისიის პირველი შეფასება და შემდგომ ივნისის ბოლოს უკვე ევროპული საბჭოს და ქვეყნების მეთაურების გადაწყვეტილება:
“ამ დროს ჩვენ ვაკეთებთ ისეთ განცხადებებს ხან ევროპარლამენტარებზე, ხან ევროპაზე ზოგადად, რომელიც ცოტა გაუგებარია.”
ზურაბიშვილის განმარტებით, ბოლო წელიწადნახევრის განმავლობაში ყოველთვის “არ ვდგამდით იმ ნაბიჯებს, რასაც ჩვენგან ელოდებოდნენ” – პრეზიდენტმა ამის მაგალითად 19 აპრილის ჩაშლილი შეთანხმება მოიყვანა, რომელიც შემდეგ “ქართული ოცნების” მხრიდან იქნა ანულირებული.
ზურაბიშვილის თქმითვე, აღსანიშნავია ასევე “რაღაცა გაუგებარი ნაბიჯები” – მაგალითად სესხის არაღება ევროკავშირისგან.
კითხვაზე, რა ლოგიკაში ჯდება მმართველი გუნდის წევრების მხრიდან ევროპარლამენტარების კრიტიკა და “ერთგვარი ანტიდასავლური რიტორიკა” იმ ფონზე, როცა ქვეყანა ევროკავშირის კანდიდატობაზე გადაწყვეტილებას ელოდება, ზურაბიშვილი პასუხობს:
“მეკითხებით, რა ლოგიკაში ჯდება, ამას მე არ უნდა მეკითხებოდეთ, იმიტომ, რომ ამის ლოგიკას ვერ ვხედავ, უნდა ეკითხებოდეთ იმათ, ვინც გამოდიან ასეთი განცხადებებით ამ დროს.”
მისივე თქმით, არის რაღაცები, რაც არ ითქმის, “რადგან ზრდილობის საკითხია.”
ევროკავშირზე საუბრისას პრეზიდენტმა კიდევ ერთხელ აღნიშნა, რომ საქართველოს შეცდომების მიუხედავად, მას არ ჰგონია, რომ ქვეყანას გარიყავენ და უარს ეტყვიან კანდიდატობაზე.
უკრაინა
სალომე ზურაბიშვილის თქმით, საქართველოს უნდა მოეწვია ვოლოდიმირ ზელენსკი პარლამენტში.
“ასევე, მე მგონია, რომ 26 მაისს, დღე, რომელიც იყო ევროინტეგრაციის ეგიდის ქვეშ, პარლამენტის ფასადზე, სადაც იყო ევროპული და ქართული დროშები, ასევე შეიძლებოდა, ყოფილიყო უკრაინის და მოლდოვის დროშები”, – აღნიშნა პრეზიდენტმა.
ხოლო ე.წ. მეორე ფრონტის გახსნაზე ზურაბიშვილი ამბობს, რომ არ არსებობს მეორე ფრონტის საფრთხე და არ არსებობენ საქართველოში ომის პარტიები.
ნიკა გვარამიას დაპატიმრება
საქართველოს პრეზიდენტის თქმით, პოლიტიკურად ამ დროს, ნიკა გვარამიას დაპატიმრება არ იყო დროული:
“ჯერ ერთი ეს სასამართლოს გადაწყვეტილებაა და მე არ მაქვს უფლება სასამართლოს გადაწყვეტილების მიმართ მქონდეს შეფასება. როგორც პრეზიდენტს არ შემიძლია, რომ ეჭვები წარმოვთქვა სასამართლოს მიმართ. შემიძლია მხოლოდ ერთი რამ ვთქვა, რომ პოლიტიკურად ამ დროს, ამ გადაწყვეტილების მიღება, რომელიც შეიძლება გადავადებულიყო სხვადასხვა ფორმით, პოლიტიკურად მიმაჩნია, რომ არ იყო დროული. შინაარსზე არაფერს ვიტყვი.”
პრეზიდენტისა და “ქართული ოცნების” დაპირისპირება. წინაისტორია
რამდენიმე დღის წინ, “ქართული ოცნების” თავმჯდომარე ირაკლი კობახიძე საქართველოს პრეზიდენტს, სალომე ზურაბიშვილს კიდევ ერთხელ დაუპირისპირდა და განაცხადა, რომ 26 მაისს, პრეზიდენტის განცხადება სასამართლოსთან დაკავშირებით სირცხვილია და პრობლემაა, რომ “პრეზიდენტმა არ იცის, რაზე უნდა ისაუბროს საზეიმო დღეს.”
საქმე ეხება დამოუკიდებლობის დღის საზეიმო ღონისძიებაზე სალომე ზურაბიშვილის სიტყვით გამოსვლას, სადაც საქართველოს პრეზიდენტმა განაცხადა, რომ “სირცხვილია, რომ საქართველო სამართლის ისტორიას” სათანადოდ ვერ აგრძელებს. მისივე თქმით, ევროპის გზაზე რეალური შანსის გაშვებას საზოგადოება, თაობები არ გვაპატიებენ.
ეს არ იყო პირველი შემთხვევა, როდესაც მმართველი პარტია და პრეზიდენტი ერთმანეთს დაუპირისპირდნენ.
15 მარტს “ქართულმა ოცნებამ” განაცხადა, რომ აქართველოს პრეზიდენტმა სალომე ზურაბიშვილმა ქვეყნის კონსტიტუცია დაარღვია და ამის გამო მას საკონსტიტუციო სასამართლოში უჩივლებენ. კონსტიტუციის დარღვევებში შედის სალომე ზურაბიშვილის შეხვედრა ემანუელ მაკრონთანაც, რომელიც თებერვალში შედგა.
საქართველოში ჯერ არ ყოფილა შემთხვევა, რომ მოქმედი პრეზიდენტისთვის კონსტიტუციის დარღვევის ბრალდებით საკონსტიტუციო სასამართლოში ეჩივლათ. მმართველი გუნდის უკმაყოფილება პრეზიდენტის ყოველწლიურმა საპარლამენტო მოხსენებამ გამოიწვია.
ზურაბიშვილი პარლამენტში უკრაინის დროებით რწმუნებულთან ერთად შევიდა და თან ჰქონდა უკრაინის ომის ამსახველი ფოტოები. ზურაბიშვილმა დეპუტატებს ფეხზე ადგომა და მათი ყურება მოსთხოვა. თავის გამოსვლაში მან ასევე გააკრიტიკა ხელისუფლება უკრაინასთან დაკავშირებული თავშეკავებული პოლიტიკის გამო: „ხელისუფლება სცოდავს, როცა ვერ ბედავს გამოხატოს ის, რასაც ჩვენი ისტორია და ღირსება გვკარნახობს.“ – თქვა მან.
