სააკაშვილის პატიმრობის მე-13 დღე. განცხადებები და გამოხმაურებები
საქართველოში მოქმედი გავლენიანი არასამთავრობო ორგანიზაციები წერენ, რომ მიხეილ სააკაშვილის მიმართ პოლიტიკურად მოტივირებული მართლმსაჯულება იკვეთება.
მათი შეფასებით, ყოფილი პრეზიდენტის ბრალეულობის დადგენა მაშინ იქნება შესაძლებელი, თუ მას სამართლიანი სასამართლოს უფლება მიეცემა. სასამართლოში კლანის არსებობის პირობებში კი სამართლიანი სასამართლოს უფლების დაცვა ეჭვქვეშ დგება.
მიხეილ სააკაშვილი თბილისში 1 ოქტომბერს დააკავეს. დაკავების დღიდანვე მან პროტესტის ნიშნად შიმშილობა დაიწყო. ბოლო რამდენიმე დღეა, ექსპრეზიდენტის ადვოკატები ამბობენ, რომ შიმშილობის გამო სააკაშვილი ჯანმრთელობის მდგომარეობა გართულდა, – მას გადაადგილება უჭირს.
ადვოკატების თქმით, სააკაშვილი ითხოვს, რომ მის პირად ექიმს მისი მონახულება ყოველდღე შეეძლოს.
დღეს, 13 ოქტომბერს, იუსტიციის სამინისტრომ სააკაშვილისთვის ექიმების მულტიფუნქციური ჯგუფის გამოყოფა მოითხოვა.
შვიდი ორგანიზაციის შეფასება: სააკაშვილის მიმართ პოლიტიკურად მოტივირებული მართლმსაჯულება იკვეთება
გუშინ, 12 ოქტომბერს, საქართველოში მოქმედმა არასამთავრობო ორგანიზაციებმა, სააკაშვილის საქმეზე ერთობლივი განცხადება გაავრცელეს.
განცხადებას შვიდი ორგანიზაცია აწერს ხელს: ადამიანის უფლებათა ცენტრი (HRC), მმართველობის მონიტორინგის ცენტრი (GMC), საქართველოს დემოკრატიული ინიციატივა (GDI), საქართველოს ღია საზოგადოების ფონდი (OSGF), ტოლერანტობისა და მრავალფეროვნების ინსტიტუტი (TDI), დემოკრატიისა და უსაფრთხო განვითარების ინსტიტუტი (IDSD) და ორგანიზაცია საქართველოს სასამართლოს გუშაგი.
ორგანიზაციები წერენ, რომ არაერთი საკანონმდებლო ცვლილებისა და ე.წ. რეფორმის მიუხედავად, სასამართლო ხელისუფლება კვლავ პოლიტიზების მაღალი ხარისხით გამოირჩევა. აღმასრულებელი ხელისუფლება კი არ ერიდება პოლიტიკური გავლენების გაძლიერებას ხელისუფლების დამოუკიდებელ შტოზე.
ორგანიზაციებს ამის მაგალითად მოჰყავთ საქართველოს პრემიერ – მინისტრის ირაკლი ღარიბაშვილის რამდენიმე განცხადება, რომლითაც იგი ღიად და არაორაზროვნად ადასტურებს, რომ საქართველოს მესამე პრეზიდენტის მსჯავრდება პოლიტიკური შინაარსისაა.
მათ შორის, განცხადება, როდესაც პრემიერმა თქვა, რომ “თუ სააკაშვილი წესიერად არ მოიქცევა, მუხლებს დაუმატებენ”.
“აქვე აღვნიშნავთ, რომ პოლიტიკურად მოტივირებული მართლმსაჯულება დაუშვებელი და მიუღებელია იმისგან დამოუკიდებლად, პირი დამნაშავეა თუ არა. მეტიც, სწორედ ამგვარი მართლმსაჯულების განხორციელება, პრაქტიკულად შეუძლებელს ხდის გონივრულ ეჭვს მიღმა სტანდარტით დადგინდეს პირის ბრალეულობის საკითხი. ასეთი პროცესი სრულად ფორმალური ხასიათისაა, მიკერძოებულია და ეწინააღმდეგება კანონის უზენაესობის საბაზისო მოთხოვნებს”, – ნათქვამია განცხადებაში.
განცხადების ხელმომწერი ორგანიზაციები ამბობენ, რომ სააკაშვილის დანაშაულობა-უდანაშაულობის დადგენა მხოლოდ მაშინ იქნება შესაძლებელი, თუ მას მიეცემა საშუალება სამართლიანი სასამართლოს უფლებით ისარგებლოს.
თუმცა, ამავე განცხადებაში, სამართლიანი სასამართლოს უფლებას ისინი ეჭვქვეშ აყენებენ იმის გამო, რომ სასამართლო კლანური მმართველობით, ხელისუფლებისადმი ლოიალობითა და დეფექტური მართლმსაჯულების განხორციელებით ხასიათდება.
- ● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?
- ● საპატრიარქო სააკაშვილს შიმშილობის შეწყვეტას სთხოვს. ექს-პრეზიდენტი უარზეა
- ● “არაფრის არ შეგეშინდეთ, ხვალ მიდით არჩევნებზე”. დაკავებამდე სააკაშვილმა ვიდეოს ჩაწერა მოასწრო
„აღნიშნულზე პასუხისმგებლობა ეკისრება მოქმედ ხელისუფლებას, რომელიც საკუთარი პოლიტიკური გადაწყვეტილებებითა და სამართლებრივი მექანიზმებით, ახალისებს მსგავსს პრაქტიკას“, – ვკითხულობთ ორგანიზაციების გაცხადებაში.
განცხადების ხელმომწერი ორგანიზაციები საქართველოს ხელისუფლებასა და საქართველოს პრეზიდენტს მოუწოდებენ, გამოიყენონ მათ ხელთ არსებული საკანონმდებლო მექანიზმები, იმისთვის, რომ თავიდან აიცილონ მიხეილ სააკაშვილის მიმართ პოლიტიკური მართლმსაჯულების განხორციელება.
ადვოკატები: სააკაშვილის ჯანმრთელობის მდგომარეობა ყოველდღე რთულდება
მიხეილ სააკაშვილი უკვე მეთორმეტე დღეა შიმშილობს. 10 ოქტომბერს ცნობილი გახდა, რომ სააკაშვილის ჯანმრთელობის მდგომარეობა დამძიმდა. სააკაშვილის პირადი ექიმის, ნიკოლოზ ყიფშიძის თქმით, სააკაშვილი თაფლისა და წვენის მიღებაზეც უარს ამბობს და ის ამჟამად მხოლოდ წყალს სვამს.
ექიმის თქმით, სააკაშვილს აქვს სისხლის დაავადება, ტალასემია და ამ დაავადების დროს შიმშილი არ შეიძლება, რადგან ეს იწვევს ისეთ ცვლილებებს, რომლის რევერსი არ არსებობს.
გუშინ, 12 ოქტომბერს, მისმა ადვოკატებმა თქვეს, რომ სააკაშვილის ჯანმრთელობის მდგომარეობა კიდევ უფრო გართულდა. პრეზიდენტს გადაადგილების პრობლემები აქვს.
ადვოკატ გიორგი გელხაურის თქმით, სააკაშვილი ითხოვს, რომ პირად ექიმს მისი მონახულება ყოველდღე შეეძლოს.
“როგორც მან გვითხრა, კიდურების შეშუპება აქვს, ასევე გართულებული აქვს გადაადგილება. შესაბამისად, ძალიან მნიშვნელოვანია, რომ ექიმის მეთვალყურეობის ქვეშ იყოს. მის პირად ექიმს ვგულისხმობ ამ შემთხვევაში“, – განაცხადა გელხაურმა.
ექსპრეზიდენტი შიმშილობის შეწყვეტას არ აპირებს
სააკაშვილის კიდევ ერთი ადვოკატის ბექა ბასილაიას თქმით, ჯანმრთელობის მდგომარეობის გართულებების მიუხედავად, ექსპრეზიდენტი მხნედ არის.
“შიმშილობა შედის საკმაოდ რთულ ფაზაში და ამის შედეგებს უკვე თვალნათლივ ვხედავთ. გადაადგილებასთან დაკავშირებით უკვე არის პრობლემები. ასევე, მისივე განცხადებით, ფეხები დაუსივდა მიშას. ასევე, როცა ის საუბრობს, მისი საუბრის მოტორიკა, მისი მოძრაობა, გადაადგილება უკვე მკაფიოს და ნათელს ხდის, რომ შიმშილობის ნეგატიური შედეგები სახეზეა”, – განაცხადა ბასილაიამ.
ამ მდგომარეობის მიუხედავად, მიხეილ სააკაშვილი შიმშილობის შეწყვეტას არ აპირებს. მისმა კიდევ ერთმა ადვოკატმა, დიტო საძაგლიშვილმა დღეს მისი წერილი წაიკითხა, სადაც სააკაშვილი წერს, რომ შიმშილობა მის ხელთ არსებული ერთადერთი ინსტრუმენტია.
“ახლა რაც მთავარია, 14-ში, ზეგ უნდა ვიყოთ ბევრი და ყველას დავანახოთ, რომ ჩვენს საზოგადოებას გააჩნია ღირსება, თავმოყვარეობა.
მიუხედავად ჩემი ჯანმრთელობის მდგომარეობის ყოველდღიური გაუარესებისა, მე არცერთ შემთხვევაში არ შევწყვეტ შიმშილობას, ვინაიდან ახლა ეს არის ჩემს ხელთ არსებული ერთადერთი ბრძოლის ინსტრუმენტი.
რა თქმა უნდა, ვისურვებდი, ჩემს გათავისუფლებას მივაღწიო უკვე მეორე ტურამდე, რათა თქვენთან ერთად შევძლო გარდაუვალი გამარჯვების დაცვა, მაგრამ ამისთვის საჭიროა მრავალრიცხოვნობა ზეგ და მწყობრი ქმედებები შემდგომ. მხოლოდ თავგანწირული, აქტიური მოქალაქეობრივი პოზიციით ვიხსნით ჩვენს ქვეყანას და მივიღებთ კონკრეტულ შედეგებს, მათ შორის ჩემთან მიმართებაში. 30-ში გამარჯვება მოიპოვება მხოლოდ ყოველდღიური, ყოველწუთიერი ბრძოლით და შეუპოვრობით”, – წერს სააკაშვილი.
იუსტიციის სამინისტრო ეკატერინე ტიკარაძეს სააკაშვილისთვის ექიმების ჯგუფის გამოყოფას სთხოვს
დღეს, 13 ოქტომბერს, იუსტიციის სამინისტრომ გაავრცელა განცხადება, რომელშიც ნათქვამია, რომ მეტი გამჭვირვალობის მიზნით, საჭიროა მიხეილ სააკაშვილის უფლებების დაცვის მონიტორინგი განხორციელდეს.
ამისთვის უწყებამ პარლამენტის ადამიანის უფლებათა დაცვისა და ჯანდაცვის კომიტეტს, ჯანდაცვის სამინისტროსა და სახალხო დამცველს მიმართა.
საპარლამენტო კომიტეტებს უწყება სთხოვს, რომ პროცესის მეტი გამჭვირვალობისთვის პატიმრის უფლებების დაცვის მონიტორინგი განახორციელონ.
ჯანდაცვის მინისტრ ეკატერინე ტიკარაძეს კი იუსტიციის სამინისტრო სთხოვს, პატიმრის ჯანმრთელობის მდგომარეობის შესწავლისა და დეტალური ანალიზის მიზნით გამოიყოს ექიმების მულტიფუნქციური ჯგუფი:
“მედიკოსების ჯგუფის მიზანი იქნება მიხეილ სააკაშვილის ჯანმრთელობის მდგომარეობის პერიოდული დაკვირვება და საჭიროების შემთხვევაში შესაბამისი რეკომენდაციების წარმოდგენა“, – ნათქვამია განცხადებაში.
სახალხო დამცველის განცხადება სააკაშვილის შიმშილზე
მიხეილ სააკაშვილის შიმშილობის საკითხს დღეს საქართველოს სახალხო დამცველი ნინო ლომჯარია გამოეხმაურა.
ომბუდსმენი წერს, რომ სახალხო დამცველის აპარატი დეტალურად აკვირდება სააკაშვილის ჯანმრთელობის მდგომარეობასა და პენიტენციურ დაწესებულებაში არსებულ პირობებს.
ამავე განცხადებაში, ნინო ლომჯარია უარყოფითად აფასებს ნებისმიერი სახის განცხადებას, როგორც პოლიტიკოსების, ასევე პენიტენციური სამსახურის, რომელიც პატიმარს უფრო მძიმე შიმშილობის ფორმაზე გადასვლისკენ უბიძგებს.
“პენიტენციური სამსახურისა თუ მაღალი პოლიტიკური თანამდებობის პირების მხრიდან მსგავსი განცხადებების გავრცელებით, იქმნება დამატებითი საფრთხე, რომ მოშიმშილე პატიმარმა უარი თქვას სამედიცინო მომსახურების მიღებაზეც. ამიტომ, უარყოფითად ვაფასებთ ნებისმიერი სახის განცხადებას, რომელიც უბიძგებს პატიმარს უფრო მძიმე შიმშილობის ფორმაზე გადასვლას და კიდევ უფრო ამძიმებს ბრალდებულის/მსჯავრდებულის ჯანმრთელობის მდგომარეობას“, – წერს ომბუდსმენი
საქართველომ არ უნდა დაუშვას დემოკრატიის უკუსვლა – უკრაინის ყოფილი პრეზიდენტი სააკაშვილის დაკავებაზე
უკრაინის ყოფილი პრეზიდენტი ვიქტორ იუშჩენკო მიხეილ სააკაშვილის დაკავებას სპეციალური ვიდეომიმართვით გამოეხმაურა. მიმართვა მიხეილ სააკაშვილის ფეისბუკის გვერდზე გავრცელდა
5-წუთიან ვიდეომიმართვაში იუშენკო საქართველოში 2003- 2008 წლების პერიოდს მიმოიხილავს, რა დროსაც, მისი შეფასებით, საქართველო წარმატებული ქვეყანა გადა.
იუშენკო ამბობს, რომ ის ადამიანი, რომელიც წარმატებების მიღწევისას ქართველ ერთან ერთად იყო, ახლა გამოძიებასა და სასამართლო პროცესს ელოდება.
“ყველა ეს მოვლენა, რომელზეც მოვყევი, იყო არა მარტო ერთი ადამიანის ოცნება, არამედ ქართველი ერის ამბიცია და მან წარმატებას მიაღწია. პრეზიდენტი მიხეილ სააკაშვილი, რომელიც რამდენიმე დღის წინ დააკავეს, თქვენთან ერთად იდგა და ახლა გამოძიებასა და სასამართლო პროცესს ელოდება.
მინდა, რამდენიმე პოზიციაზე გავამახვილო ყურადღება, რომელიც, ჩემი აზრით, ძალიან მნიშვნელოვანია იმისთვის, რომ საქართველო არ შევიდეს დესტაბილიზაციის ზონაში, განსაკუთრებით, საშინაო საკითხებში. რომ საქართველომ არ დაუშვას დემოკრატიის უკუსვლა და იზოლაცია.
დიდება საქართველოს! დიდება უკრაინას!”, – აცხადებს იუშენკო.
სააკაშვილის გათავისუფლების მოთხოვნით 14 ოქტომბერს აქციაა დაგეგმილი
14 ოქტომბერს მიხეილ სააკაშვილის გათავისუფლების მოთხოვნით მასშტაბური აქციაა დაანონსებული.
“დროას” ლიდერი ელენე ხოშტარია ამბობს, რომ ის ამ აქციას შეუერთდება, რადგან სააკაშვილის პატიმრობა სცდება მხოლოდ “ნაციონალური მოძრაობის” ინტერესებს.
“არ არსებობს ადამიანი, რომელიც არის უსამართლობის მსხვერპლი და რომლის დაცვაც არ არის კომფორტული. ნებისმიერი ადამიანი, მოგვწონს თუ არ მოგვწონს, რომელიც არის უსამართლობის მსხვერპლი, უნდა დაიცვა ამ სისტემაში”, – განაცხადა ხოშტარიამ.
მიხეილ სააკაშვილი თბილისში 1 ოქტომბერს დააკავეს, მას შემდეგ, რაც იგი ფარულად დაბრუნდა სამშობლოში.
მესამე პრეზიდენტის წინააღმდეგ საქართველოში რამდენიმე სისხლის სამართლის საქმეა აღძრული, ერთ საქმეზე იგი უკვე გასამართლებულია და ექვსი წლით თავისუფლების აღკვეთა აქვს მისჯილი.
ძებნილის სტატუსის მქონე ექს-პრეზიდენტი დაკავებისთანავე რუსთავის 1212 საპყრობილეში გადაიყვანეს. იმავე საღამოს მან შიმშილობა დაიწყო.
