საქართველოში სააღდგომო ლიტურგია მაინც ჩატარდება

კორონავირუსის პანდემიის გავრცელების  და საქართველოში გამოცხადებული საყოველთა კარანტინის მიუხედავად, საქართველოს საპატრიარქო სააღდგომო მსახურების შესრულებაზე უარის თქმას არ აპირებს. საპატრიარქოში დღეს კიდევ ერთხელ განაცხადეს, რომ საერთო კოვზით ზიარების წესის შეცვლა არ განიხილება. 

3 აპრილის  10:00 საათისთვის, საქართველოში კორონავირუსით ინფიცირების 148 შემთხვევაა დადასტურებული. კარანტინის რეჟიმშია 5550 ადამიანი, ხოლო სტაციონარში მეთვალყურეობის ქვეშ – 281 პირი. კორონავირუსით ინფიცირებულთაგან 27 გამოჯანმრთელდა.

“ერთი კოვზის პრინციპი არ შეუცვლია არცერთ ეკლესიას. სინოდმა მიიღო გადაწყვეტილება და ამაზე დამთავრდა მსჯელობა”,  – განაცხადა საქართველოს მართლმადიდებელი ეკლესიის საპატრიარქოს პრესსპიკერმა, ანდრია ჯაღმაიძემ. მან აღნიშნა, რომ სააღდგომო ლიტურგია აუცილებლად ჩატარდება და საპატრიარქო გაითვალისწინებს ხელისუფლების და ჯანდაცვის სამინისტროს რეკომენდაციებს. როგორ უნდა ჩატარდეს სააღდგომო მსახურება ისე, რომ მრევლმა და ეკლესიამ საგანგებო რეჟიმის წესები არ დაარღვიოს, ამაზე საპატრიარქოში კონკრეტული პასუხი არ აქვთ. 

“ნაადრევად ნუ გავაკეთებთ განცხადებას, როგორ მოვახერხებთ სააღდგომო მსახურებას, რომ ამან არ გამოიწვიოს სხვა რაღაც გაუგებრობები,” – აღნიშნა ჯაღმაიძემ და დასძინა, რომ ერთ-ერთი სასულიერო პირის მიერ გაკეთებული განცხადება, როლის თანახმადაც, მრევლი აღდგომის ღამეს ეკლესიაში დარჩება, საპატრიარქოსთან შეთანხმებული არ იყო.

სასულიერო პირი, რომელზეც ანდრია ჯაღმაიძე საუბრობს, მამა შალვა კეკელიაა.  მან ტელეკომპანია ფორმულასთან საუბარში განაცხადა, რომ მრევლი კომენდანტის საათს არ დაარღვევს, თუ ეკლესიაში 21:00 საათამდე შეიკრიბება, დაიცავს 1,5-მეტრიან სოციალურ დისტანციას და  ეკლესიის ტერიტორიას დილის 6 საათის შემდეგ დატოვებს. 

ვიცე-პრემიერმა და ინფრასტრუქტურის მინისტრმა მაია ცქიტიშვილმა დღეს განაცხადა, რომ მრევლი, რომელიც აღდგომის ღამეს ეკლესიაში წავა, კომენდანტის საათს დაარღვევს. მან განმარტა, რომ აკრძალულია 3 ადამიანზე მეტის შეკრება და 21:00 საათის შემდეგ გარეთ ყოფნა და თუ ეკლესიაში მასობრივი შეკრება იქნება, ორივე წესი დაირღვევა.

კითხვაზე, ეხებათ თუ არა შეზღუდვა სასულიერო პირებსაც, რომლებმაც მსახურება უნდა აღასრულონ, ცქიტიშვილმა უპასუხა:

“შეზღუდვები არის გავრცელებული საქართველოს მთელს ტერიტორიაზე. შესაბამისად, ეს რეგულაციები, რომელიც არის დადგენილი, მოქმედებს ყველაზე.”

დღესვე, გარემოს დაცვისა და სოფლის მეურნეობის მინისტრმა, ლევან დავითაშვილმა, ეკონომიკის მინისტრმა ნათია თურნავამ  და ინფრასტრუქტურის მინისტრმა, მაია ცქიტიშვილმა განაცხადეს, რომ ისინი სააღდგომო ლიტურგიას არ დაესწრებიან. 

• სინოდი ზიარების წესს არ ცვლის – ტაძრებში მსახურება გახმოვანდება
  
• სასულიერო პირებმა თბილისის ქუჩები აკურთხეს
  
• საქართველოში საგანგებო მდგომარეობაა: შეზღუდვები ეკლესიაზე არ ვრცელდება
  
• რას ნიშნავს საგანგებო მდგომარეობა – რისი უფლება გვაქვს და რისი არა
• საქართველოში საყოველთაო კარანტინი ცხადდება
• ლოცვები 4 საათზე დაიწყება, ეკლესიები 8-ზე დაიკეტება

მთავრობის გადაწყვეტილებით, კორონავირუსის პანდემიის შეჩერების მიზნით, 21 აპრილამდე საქართველოში საგანგებო მდგომარეობაა დაწესებული. 31 მარტიდან აიკრძალა სამ კაცზე მეტის შეკრება, გარდა მაღაზიებისა და აფთიაქებისა, სადაც მოქალაქეებმა ორმეტრიანი დისტანცია უნდა დაიცვან. მუშაობა შეწყვიტა ყველა სახის საზოგადოებრივმა ტრანსპორტმა. გაჩერდა მეტროც. მთავრობის დადგენილებით, 21:00-დან 06:00-მდე კომენდანტის საათი დაწესდა. 

საქართველოს საპატრიარქო კი მართლმადიდებელი ეკლესიის სინოდის 20 მარტის განჩინებით, ზიარების წესს არ ცვლის და მრევლს ისევ საერთო კოვზით აზიარებს.