LIVE: რუსეთი უკრაინაში შეიჭრა - განახლებადი ინფორმაცია

რუსეთის უკრაინაში შეჭრის  მეორე დღის Live  ნახეთ აქ 

? დაახლოებით 5:30 საათზე პუტინმა უკრაინაში “სპეციალური ოპერაციის” დაწყება გამოაცხადა. პუტინის ორი ოფიციალური მიზეზი შეჭრისთვის იყო – 1) რუსულენოვანი მოსახლეობის „გენოციდის“ და 2) ნატოს აღმოსავლეთით გაფართოების შეჩერება.

? მალევე შეიკრიბა გაეროს უშიშროების საბჭოს – პუტინს მოუწოდეს “შეაჩეროს ჯარები და მისცეს მშვიდობას შანსი”.

? ზელენსკიმ რუსეთთან დიპლომატიური ურთიერთობები შეწყვიტა.

? დღისით უკრაინის ორ მთავარ ქალაქში გამაფრხილებელი სირენები ჩაირთო – კიევისა და ხარკოვის მაცხოვრებლები მეტროში იმალებოდნენ.

? 21.00 საათისთვის უკრაინის პრემიერ-მინისტრმა განაცხადა, რომ რუსმა სამხედროებმა უკრაინის ერთ-ერთი ყველაზე მნიშვნელოვანი ობიექტი, ჩერნობილის ატომური ელექტროსადგური დაიკავეს. იგი ახლა რუსების კონტროლის ქვეშაა.

? მსხვერპლი არის, თუმცა დაღუპულების შესახებ ზუსტი ინფორმაცია არ ვრცელდება. 13:00 საათისთვის უკრაინის პრეზიდენტის ადმინისტრაციამ 40-ზე მეტი სამხედრო მოსამსახურის დაკარგვის შესახებ განაცხადა, საღამოსთვის – 13 ადამიანი ხერსონის ოლქში და 22 – ოდესის ოლქში დაიღიპა. რუსული მხარე დუმს დანაკარგებზე დუმს.

? ეუთოს უკრაინიდან პერსონალის გაჰყავს. ეს იმას ნიშნავს, რომ კონფლიქტის დამოუკიდებელი მონიტორინგი აღარ იქნება.

? ჩეხეთმა და ლატვიამ რუსებისთვის ვიზების გაცემა შეაჩერეს. ჩეხეთის რესპუბლიკის პრეზიდენტმა მოუწოდა ევროკავშირს რუსეთი SWIFT სისტემიდან გათიშონ.

? რუსეთის საფონდო ბირჟაზე რეკორდული ვარდნაა: დოლარი 89 რუბლს აჭარბებს, ევრომ 100 რუბლს მიაღწია. ექსპერტები ამბობენ, რომ ეს ციფრები 1998 წლის დეფოლტზე უარესია. ზოგიერთი ოპერაციები საბანკო აპლიკაციებში მიუწვდომელია.

? პუტინმა ომს “იძულებითი ღონისძიება” უწოდა.

? ბორის ჯონსონმა გამოაცხადა სანქციები აეროფლოტის, vtb ბანკის და სხვა მსხვილი რუსული კომპანიების წინააღმდეგ.
VTB-ის აქციები დღეში 42%-ზე მეტით დაეცა, აეროფლოტის – 31 პროცენტზე მეტით.

? რუსეთის 44 ქალაქში ომის წინააღმდეგ პიკეტებსა და დემონტრაციებზე 850-ზე მეტი ადამიანი დააკავეს

უკრაინის ჯანდაცვის სამინისტროს ცნობით, რუსული ჯარების შემოჭრის შედეგად 57 უკრაინელი დაიღუპა, 169 დაშავდა.

ბაიდენი “დამანგრეველ” აქციებს აანონსებს რუსეთის წინააღმდეგ:

მთავარი მისი ბრიფინგიდან:

“ჩვენ შევზღუდავთ რუსეთის შესაძლებლობას, აწარმოოს ბიზნესი დოლარში, ფუნტში და იენში”;
“აშშ სანქციებს აწესებს რუსეთის უმსხვილესი ბანკის, სბერბანკის წინააღმდეგ. აშშ-ის ახალი სანქციები ასევე ვრცელდება VTB-ზე”;
“ხვალ ნატოს 27 წევრი ქვეყნის ლიდერები შეიკრიბებიან სამიტზე”;
“რუსეთის წინააღმდეგ აშშ-ის ახალი სანქციები შეეხება რუსეთის კოსმოსურ პროგრამას”;
“აშშ და მოკავშირეები აპირებენ რუსეთის მიერ მაღალტექნოლოგიური პროდუქტების იმპორტის 50%-ით შეზღუდვას”;
“რუსეთთან საომარ მოქმედებებს არ ვაპირებთ. მაგრამ ჩვენ მზად ვართ დავიცვათ უკრაინის ყოველი მეტრი”;
“პუტინთან მოლაპარაკებებს არ ვგეგმავთ”;
“აშშ-ს სანქციები თითქმის რუსეთის SWIFT-დან გათიშვის ტოლფასია. თუმცა პირდაპირ SWIFT-დან გამორთვა არ იგეგმება”;
“წავიკითხე და მოვუსმინე პუტინის გამოსვლებს. მას აქვს უზარმაზარი ამბიციები, პუტინს სურს საბჭოთა კავშირის აღდგენა”;

ბაიდენმა თქვა, რომ მზად არის სანქციები დაწესდეს პირადად პუტინის წინააღმდეგ, მაგრამ არ უპასუხა კითხვაზე, თუ რატომ არ აკეთებს ეს ახლა.

— თქვენ დარწმუნებული ხართ, რომ ეს სანქციები უფრო ძლიერია ვიდრე რუსული ტყვიები და ტანკები? – ჰკითხეს ბაიდენს
– უკრაინაში რუსულ ტყვიებსა და ტანკებზე ძლიერია, დიახ! – უპასუხა მან.

ბაიდენის თქმით, თუ რუსეთი თავს დაესხმება ნატოს რომელიმე ქვეყანას უკრაინის ფარგლებს გარეთ, აშშ მზად იქნება საომარ მოქმედებებში ჩასასვლელად

ამავე დროს, ბაიდენმა თქვა, რომ აშშ არ აპირებს ფიზიკურად უკრაინაში რუსეთის წინააღმდეგ კონფლიქტში ჩართვას.
„კვირების განმავლობაში ჩვენ ვამბობდით, რომ ეს მოხდებოდა. ჩვენ ვუყურებდით მთელ ამ „პოლიტიკურ თეატრს“, – განაცხადა ბაიდენმა.

რუს ოლიგარქს, რომან აბრამოვიჩს დიდ ბრიტანეთში შესვლა აეკრძალა.
ორი საათიც არ არის მას შემდეგ რაც “აეროფლოტი” ბრიტანულ სანქციებში მოხვდა და ამ კომპანიის აქციები უკვე 31 პროცენტით დაეცა.

Newsweek წერს აშშ-ს დაზვერვის სამ წყაროზე დაყრდნობით, რომ აშშ-ის მონაცემებით, რუსული ჯარები 96 საათში დაიკავებენ კიევს.
“პუტინის მიზანია უკრაინული ძალების ალყაში მოქცევა, რათა დანებდნენ ან განადგურდნენ,” – წერს ნიუსვიკი.

“ზოგიერთი ობიექტის დაბომბვა და ხელში ჩაგდება, მათ შორის ჩერნობილის ატომური ელექტროსადგური, მხოლოდ საწყისი ეტაპია- წერს Newsweek.

“მას შემდეგ, რაც [დაბომბვა] დასრულდება თვითმფრინავებითა და არტილერიით, დაიწყება ნამდვილი სახმელეთო ომი, მე ვფიქრობ, რომ კიევი დაეცემა სულ რამდენიმე დღეში“, განუცხადა ნიუსვიკს აშშ-ის დაზვერვის ყოფილმა მაღალჩინოსანმა ანონიმურობის პირობით.

”ჯარს შეუძლია კიდევ ცოტა ხანს გაუძლოს”, – დასძინა ყოფილმა დაზვერვის ოფიცერმა, ”მაგრამ ეს დიდხანს არ გაგრძელდება”.

რუსეთის თავდაცვის სამინისტრო: რუსეთის დარტყმების შედეგად უკრაინის სამხედრო ინფრასტრუქტურის 83 სახმელეთო ობიექტი განადგურდა, ორი უკრაინული სუ-27, ორი სუ-24, ერთი ვერტმფრენი და ოთხი ბაირაქტარ TB-2 უპილოტო აპარატი ჩამოვაგდეთ.

ჯონსონი: შემოგვაქვს შეზღუდვები იმ თანხებზე, რომლებიც რუსებს შეუძლიათ შეინახონ ბრიტანეთში ანგარიშებზე
ბრიტანეთი ასევე აწესებს სანქციებს აეროფლოტის წინააღმდეგ

პუტინი კრემლში რუს ბიზნესმენებს ხვდება სამომავლო პერსპექტივებზე სასაუბროდ.
რა უთხრა პუტინმა ბიზნესმენებს:

– სამხედრო ოპერაცია იძულებითი ღონისძიებაა. სხვაგვარად მოქცევის შანსი არ გვქონდა.

– რუსეთი რჩება გლობალური ეკონომიკის ნაწილად. ჩვენ არ ვაპირებთ ზიანი მივაყენოთ იმ სისტემას, რომელშიც თავად ვართ. ჩვენმა პარტნიორებმა უნდა გაიგონ ეს.

G7-ის ქვეყნების ლიდერებმა გაავრცელეს განცხადება, სადაც დაგმეს რუსეთის შეჭრა უკრაინაში და გამოხატეს კიევის მტკიცე მხარდაჭერა.

„ჩვენ ვგმობთ პრეზიდენტ პუტინს, ევროპის უსაფრთხოებასთან დაკავშირებული საკითხების გადასაჭრელად დიპლომატიურ პროცესებში მონაწილეობაზე თანმიმდევრული უარისთვის. მიუხედავად ჩვენი არაერთგზის შეთავაზებისა“, – ნათქვამია CNN-ის ციტირებულ განცხადებაში.

G7-ის ლიდერებმა დაგმეს ვლადიმერ პუტინი ევროპაში ომის გამო: „მან თავი ისტორიის არასწორ მხარეს დააყენა“.

ზელენსკი ითხოვს ევროკავშირისგან უკრაინის თავზე შემოიღოს აკრძალული ფრენების ზონის რეჟიმის.

ზელენსკის თქმით, რუსული ჯარები, სავარაუდოდ, ცდილობენ ჩერნობილის ატომური ელექტროსადგურის აღებას.

“ჩვენი დამცველები სიცოცხლეს წირავენ, რომ 1986 წლის ტრაგედია აღარ განმეორდეს. მე ვაცნობე შვედეთის პრემიერ-მინისტრს, რაც ხდებოდა. ეს არის ომის გამოცხადება მთელ ევროპისთვის”.

მთავარი რა თქვა ზელენსკიმ ბოლო გამოსვლაში:

– უკრაინა მშვიდობის გზაზე დაბრუნებას გთავაზობთ

– ყველაზე დიდი პრობლემა სამხრეთში, ხერსონთან ბრძოლებია

– მიმართავს რუსებს: “თუ ჩვენი გესმით, გადით მოედნებზე და მოითხოვეთ ომის დასრულება”

– რუსეთმა უკვე მიიღო ისტორიაში ყველაზე მკაცრი სანქციები

– საბრძოლო გამოცდილების მქონე ნებისმიერ მოქალაქის დახმარება გამოგვადგება

– მსოფლიო „ლიდერებს“ მიმართავს: თუ დღეს ჩვენ არ დაგვეხმარებით, ხვალ ომი თქვენ მოგიკაკუნებთ.

ხერსონის ოლქის ნაწილი რუსეთის შეიარაღებული ძალების კონტროლის ქვეშ მოექცა, – ამის შესახებ ხერსონის სამხარეო ადმინისტრაციამ Facebook-ზე განაცხადა.

თბილისში უკრაინის მხარდასაჭერი აქცია მიმდინარეობს. ფოტო: ლუკა ჩანგელია/JAMnews

კიევის მერმა კლიჩკომ ქალაქში კომენდანტის საათი გამოაცხადა.

მანამდე ვიტალი კლიჩკომ კიდევ ერთხელ მიმართა კიეველებს და მოუწოდა მათ გამოიყენონ მეტრო თავშესაფრად.

მან თავის ტელეგრამაში დაწერა, რომ “წითელ” ხაზზე მდებარე სადგურები Beresteyskaya, Nivki, Svyatoshyn და Zhitomirskaya ახლა მხოლოდ თავშესაფრად გამოიყენება. ყველა დანარჩენი სადგური. კი მუშაობს ჩვეულებრივად. მეტროში შესვლა უფასოა.

რუსეთში გრძელდება ომის საწინააღმდეგო აქციების მონაწილეთა დაკავება.

ლატვია რუსეთის მოქალაქეებისთვის ვიზების გაცემას წყვეტს. მანამდე ასეთი გადაწყვეტილება ჩეხეთმა მიიღო

ხარკოვის მერმა მეტროში შეკრებილებს განუცხადა, რომ ქალაქის მშვიდობიან მოსახლეობას შორის მსხვერპლი არ არის.
მან ასევე განაცხადა, რომ ახლა მეტრო ყველაზე უსაფრთხო ადგილია და ყველას სთხოვა თავშესაფრებში დარჩენა.
ხარკოვის კომუნალური სამსახურები შეუფერხებლად მუშაობენ, მოსახლეობას ჰპირდებიან, რომ საჭირო პროდუქტებით მეტროში მოამარაგებენ.

სანქტ-პეტერბურგში სტუდენტებს უგზავნიან შეტყობინებებს ,სადაც სთხოვენ არ გააკეთონ კომენტარი უკრაინის მოვლენებზე. ინფორმაციას “ოსტოროჟნო ნოვოსტი” ავრცელებს.

ასეთი პოსტები მიიღეს პეტერბურგის სახელმწიფო აგრარული უნივერსიტეტის სტუდენტებმა. რექტორი სტუდენტებს პოლიტიკური დისკუსიებისგან თავის შეკავებას თხოვს, რადგან „შეიძლება არ იყოს უსაფრთხო“.

გერმანიის საფეხბურთო კლუბი “შალკე 04” საკუთარი მაისურებიდან “გაზპრომის” სიმბოლოებს მოხსნის – “გაზპრომი” არის მათი მთავარი სპონსორია.

ადამიანები ხარკოვის მეტროში აფარენენ თავს

რუსეთის თავდაცვის სამინისტრო იტყობინება, როგორ “ჩაიარა” პირველმა ათმა საათმა უკრაინაში:

– მწყობრიდან გამოვიდა 74 უკრაინული სამხედრო ინფრასტრუქტურის ობიექტი, მათ შორის 11 აეროდრომი და საჰაერო თავდაცვის სისტემების 18 სარადარო სადგური, საზღვაო ბაზა, სამი სამეთაურო პუნქტი.

– 14 უკრაინელი სამხედრო რუსეთს ჩაბარდა.

– ასევე, რუსი სამხედროები იუწყებიან, რომ მათ ჩამოაგდეს უკრაინული საბრძოლო ვერტმფრენი და 4 დრონი. მათ ასევე დაკარგეს სუ-25 თავდასხმის თვითმფრინავი პილოტის შეცდომის გამო: პილოტი არ დაშავებულა, ის უკვე განყოფილებაშია.

უკრაინაში ამერიკის შეერთებული შტატების საელჩო აფრთხილებს საკუთარ მოქალაქეებს, გარეთ არ გამოვიდნენ და თავი საკუთარ სახლებს შეაფარონ.

საჰაერო განგაში გამოცხადდა ლვოვშიც, სადაც საელჩოების უმეტესობა გადავიდა მას შემდეგ, რაც ბოლო ორი კვირის განმავლობაში კიევი დატოვეს.

მარიუპოლის მახლობლად დაზიანებული უკრაინის სამხედრო ობიექტი. ფოტო: Associated Press.

▪️ მაკრონმა განაცხადა, რომ რუსეთის ქმედებები უკრაინაში არღვევს გაეროს წესდებას. რუსეთის წინააღმდეგ ევროკავშირის ახალი სანქციები გავლენას მოახდენს მის სამხედრო, ეკონომიკურ და ენერგეტიკულ სფეროებზე, დასძინა საფრანგეთის პრეზიდენტმა;

▪️ ანტირუსული სანქციები მკაცრი იქნება, განაცხადა იტალიის პრემიერ-მინისტრმა დრაგიმ. მისი თქმით, იტალია მიიღებს მონაწილეობას ნატოს აღმოსავლეთ ფლანგის გაძლიერებაში, განაცხადა ქვეყნის პრემიერმა;

▪️ დიდი ბრიტანეთი რუსეთის წინააღმდეგ მასშტაბურ სანქციებს დააწესებს, განაცხადა ბრიტანეთის პრემიერ-მინისტრმა ჯონსონმა.

Associated Press-ის ინფორმაციით, უეფამ უკვე მიიღო გადაწყვეტილება ჩემპიონთა ლიგის ფინალი სანქტ-პეტერბურგში აღარ ჩაატაროს და იგი რომელიმე სხვა ქვეყანაში გადაიტანბოს.

უეფას სხდომა ხვალ გაიმართება, თუმცა, გამოცემის ცნობით, გადაწყვეტილება უკვე მიღებულია.ლიგის ფინალი 28 მაისს გაიმართება.

რუსეთი ორ ფრონტზე იბრძვის – ერთი უკრაინის ფრონტია, მეორე – საკუთარი მოქალაქეების წინააღმდეგ.

თითოკაციან პიკეტებზე გამომსვლელებს აკავებენ – პეტერბირგში, ეკატერინბურგში იყო ასეთი დაკავებები, წერს ნოვაია გაზეტა.

ასევე უფლებადამცველი მარინა ლიტვინოვიჩი წერს, რომ მოსკოვში, საკუთარი სახლიდან გასვლისას დააკავეს.

მან დღეს სოციალური ქსელებით მოუწოდა მოქლაქეებს 19:00 საათზე რუსეთის სხვადასხვა ქალაქების ცენტრალურ მოედნებზე გამოვიდნენ და ომი გააპროტესტონ.

“უკრაინელები ძალიან მშვიდები არიან. მაღაზიაშიც სიმშვიდეა, ორგანიზებულები არიან. არის პროდუქტები. ვალუტის გადასახურდავებელი პუნქტები უმეტესობა დაკეტილია. მარტო პრივატბანკის ბანკომატები მუშაობს.
კორპუსებში მაცხოვრებლები ამზადებენ სარდაფებს, კორპუსების ბუნკერებს. ინსტრუქცია არის, რომ თუ ძლიერი განგაში იქნება, ყველამ თავი შევაფაროთ”, – JAMnews-ის გამომწერი კიევიდან

თურქეთი მხარს უჭერს უკრაინის ქმედებებს „მისი ტერიტორიული მთლიანობის დასაცავად“, თქვა ერდოღანმა.

ნატო ჯერ არ აპირებს რუსული გემებისთვის ბოსფორის სრუტის დაკეტვას, განაცხადა სტოლტენბერგმა.

პუტინი მზად არის უკრაინის ხელმძღვანელობასთან მოილაპარაკოს – თემა უნდა იყოს უკრაინის ნეიტრალური სტატუსი. უკრაინამ უარი უნდა თქვას შეიარაღების განთავსებაზე. განაცხადა პესკოვმა.

როსკომნადზორი რუსულ მედიას უკრძალავს სხვა რაიმე ინფორმაციის გამოყენებას ოფიციალური წყაროების გარდა.

როსკომნადზორი მიმართავს საინფორმაციო რესურსებს, რომ ლუგანსკის სახალხო რესპუბლიკასა და დონეცკის სახალხო რესპუბლიკაში ვითარებასთან დაკავშირებით სპეცოპერაციის ჩატარების შესახებ მასალების და პუბლიკაციების მომზადებისას ისინი ვალდებულნი არიან გამოიყენონ მხოლოდ ოფიციალური რუსული წყაროები.

როსკომნადზორის თქმით, წინააღმდეგ შემთხვევაში მედია საშუალებები, შესაძლოა, დაჯარიმდნენ და დაიბლოკონ „ცრუ ინფორმაციის“ გავრცელებისთვის.

ჩეხეთის პრეზიდენტი ზემანი რუსეთის SWIFT-ისგან გათიშვის ინიციატივით გამოვიდა.

შეგახსენებთ, რომ ზემანს ევროპის ერთ-ერთი ყველაზე პრორუსული პოლიტიკოსის რეპუტაცია აქვს.

ესტონეთის იუსტიციის მინისტრმა ოპერატორებს რუსული ტელევიზიების მაუწყებლობის „დაუყოვნებლივ“ შეწყვეტა მოსთხოვა.

ბელგია მხარს უჭერს იდეას, რომ ევროკავშირის ვიზები შეუჩერდეს რუსეთის ყევლა მოქალაქეს.

უკრაინის ჯარებმა ლუგანსკის ოლქის ქალაქი სჩასტიე დაიბრუნეს

კიევიდან გასასვლელში დიდი საცობებია – ხალხი დედაქალაქიდან გასვლას ცდილობს

კიევსა და უკრაინის სხვა ქალაქებში კომუნიკაცია და ინტერნეტი ამ დროისთვის ჩვეულ რეჟიმში მუშაობს.

მსხვერპლის შესახებ მუდმივად ვრცელდება ინფორმაცია, თუმცა ეს ინფორმაცია არის გადაუმოწმებელი და არის ოფიციალური. თუმცა, მსხვერპლი არის უკრაინელ მესაზღვრეებსა და სამოქალაქო პირებს შორის. მათ შორის ერთი ბავშვია.

კიევის ინფორმაციით, უკრაინის ჯარებმა ჩამოაგდეს 6 თვითმფრინავი და გაანადგურეს რუსეთის ფედერაციის 4 ტანკი.

პოლონეთის ხელისუფლება უკრაინის საზღვართან, ორ რეგიონში დევნილთა მიღებ ცენტრებს განათავსებს

ლიეტუვის პრეზიდენტმა უკრაინაში შექმნილი ვითარების გამო ქვეყანაში საგანგებო მდგომარეობა გამოაცხადა.

რუსეთის ქალაქებში ერთი ადამიანის პიკეტებს აწყობს ხალხი. სხვანაირი პროტესტი ამ ქვეყანაში დაშვებული არ არის. ორი ადამინიც რომ შეიკრიბოს, უკვე არასანქცირებულ მიტინგად ითვლება და მონაწილეების დაკავების უფლება აქვთ.

ავიადარტყმის შედეგი,ჩუგუევი, ხარკოვი

ევროკომისიის ხელმძღვანელი ურსულა ფონ დერ ლაიენი: ევროკავშირი მხარს უჭერს უკრაინას და მის ხალხს, უკრაინა გაიმარჯვებს

„ჩვენ არ მივცემთ უფლებას პრეზიდენტ პუტინს გაანადგუროს ევროპის უსაფრთხოების არქიტექტურა“, – დაწერა ფონ დერ ლაიენმა თავის Twitter-ზე.

მოლდოვის მინისტრთა კაბინეტი პარლამენტს მიმართავს და უკრაინაში შექმნილი ვითარების ფონზე საგანგებო მდგომარეობის გამოცხადებას სთხოვს.

უკრაინის შსს ოფიციალურად ადასტურებს სულ მცირე რვა ადამიანის დაღუპვას რუსეთის სამხედრო აგრესიის შედეგად

სოციალურ ქსელებში უკვე უამრავი შეტყობინება და ფოტოა, სადაც ჩანს, თუ როგორ გადაადგილდებიან რუსი ქვეითი სამხედროები ხარკოვის მიწაზე.

კიევი თურქეთს სთხოვს რუსეთისთვის ბოსფორის სრუტე დახუროს.

უკრაინის შინაგან საქმეთა სამინისტრო:

რუსეთის ჯარების შემოსვლას სახელმწიფო საზღვრის გასწვრივ წინ უსწრებს საარტილერიო ცეცხლი. საარტილერიო ცეცხლს მოჰყვება სამხედრო ტექნიკა.

● რუსულმა სამხედრო ტექნიკამ, მათ შორის ჯავშანტექნიკამ, დაარღვია სახელმწიფო საზღვარი ჩერნიგოვის, სუმის, ლუგანსკის, ხარკოვის რეგიონებში.

● დაბომბეს ლუგანსკის, სუმის, ხარკოვის, ჩერნიგოვისა და ჟიტომირის რეგიონების სასაზღვრო ქვედანაყოფებისა და სასაზღვრო რაზმების უმეტესობა.

● არსებული ინფორმაციით, მესაზღვრეებს შორის რამდენიმე სამხედრო მოსამსახურე დაშავდა.

ლატვია კრძალავს თავის ტერიტორიაზე რუსული პროპაგანდისტული არხების მაუწყებლობას.

ზელენსკიმ ბრძანება გასცა მტერს მაქსიმალური დანაკარგები მიაყენონ.

რიგა ითხოვს კონსულტაციებს ნატოს წესდების მეოთხე მუხლის ფარგლებში, რომლის თანახმად, „მხარეები ყოველთვის გაივლიან კონსულტაციებს ერთმანეთთან, თუ რომელიმე მათგანის აზრით, რომელიმე ქვეყნის ტერიტორიულ მთლიანობას, პოლიტიკურ დამოუკიდებლობას ან უსაფრთხოებას საფრთხე ემუქრება.”

ლატვიის პრემიერ-მინისტრმა კარინს კრისიანისმა ტბიტერზე დაწერა, რომ პუტინი ვალდებულია დაუყოვნებლივ შეწყვიტოს “სამხედრო აგრესია უკრაინის სუვერენიტეტის, მისი ხალხისა და დემოკრატიის წინააღმდეგ”

ბაიდენი ზელენსკისთან სატელეფონო საუბარზე:

? ბაიდენი დაპირდა ზელენსკის, რომ აშშ-ი რუსეთის წინააღმდეგ მკაცრ სანქციებს დააწესებს

? “პრეზიდენტი ზელენსკი დამიკავშირდა ღამე და ჩვენ ახლახან დავასრულეთ საუბარი…

მან მთხოვა, მოვუწოდო მსოფლიო ლიდერებს, მკაფიოდ დაგმონ პრეზიდენტ პუტინის აგრესია და დადგნენ უკრაინელი ხალხის გვერდით.

? ხვალ მე შევხვდები G7-ის ლიდერებს და შეერთებულ შტატები და ჩვენი მოკავშირეები და პარტნიორები რუსეთის წინააღმდეგ მკაცრ სანქციებს დააწესებენ. ჩვენ გავაგრძელებთ უკრაინისა და უკრაინელი ხალხის მხარდაჭერასა და დახმარებას

მოსკოვში გაფრინდა სომხეთის თავდაცვის მინისტრი სურენ პაპიკიანი. ის რუს კოლეგას სერგეი შოიგუს უნდა შეხვდეს.

სომხეთის თავდაცვის სამინისტროს პრესსამსახური წერს, რომ “ვიზიტის ფარგლებში დაგეგმილია შეხვედრები რუსეთის თავდაცვის მინისტრთან, არმიის გენერალ სერგეი შოიგუსთან და სხვა მაღალჩინოსნებთან”

უკრაინის შეიარაღებული ძალების გენერალური შტაბის ოფიციალური განცხადება:

? თავდასხმები განხორციელდა ექვს აეროდრომზე – ბორისპოლში, ოზიორნიში, კულბაკინში, ჩუგუევში, კრამატორსკში, ჩერნობაევკაში.

? იყო საარტილერიო ცეცხლი საზღვრის გასწვრივ.

? ოდესაში რუსული დესანტის გადმოსვლის შესახებ ინფორმაცია სიმართლეს არ შეესაბამება.

რუსეთის თავდაცვის სამინისტროს განცხადება:

❌ უკრაინის სამხედრო საჰაერო ბაზების ინფრასტრუქტურა მწყობრიდან გამოვიდა.

❌ უკრაინის სასაზღვრო სამსახური რუსულ დანაყოფებს წინააღმდეგობას არ უწევს.

❌ ჩამოგდებული რუსული თვითმფრინავის შესახებ ინფორმაცია სიმართლეს არ შეესაბამება.

რა ხდება ამ დროისთვის:

? პუტინმა დილის ექვსის ნახევარზე სატელევიზიო მიმართვაში გამოაცხადა უკრაინაში სამხედრო ოპერაციის შესახებ. მან დასავლეთი გააფრთხილა სიტუაციაში ჩარევის შედეგების შესახებ

? ზელენსკიმ მთელი ქვეყნის მასშტაბით საომარი მდგომარეობა გამოაცხადა და განაცხადა, რომ რუსეთი უტევს აეროდრომებსა და სხვა სამხედრო ინფრასტრუქტურას.

? აფეთქებების შესახებ ცნობები მოდის უკრაინის მრავალი ქალაქიდან, ხოლო კიევსა და ლვოვში საჰაერო თავდასხმის გაფრთხილება გამოცხადდა.

? რუსეთის თავდაცვის სამინისტრო აცხადებს, რომ ის ქალაქებს არ ესხმის, არამედ მხოლოდ სამხედრო ობიექტებს ანადგურებს

? უკრაინის სასაზღვრო სამსახური იტყობინება თავდასხმა არა მხოლოდ რუსეთის, არამედ ბელორუსის საზღვრიდანაც ხორციელდება

?საომარი მოქმედებების დაწყება გაეროს უშიშროების საბჭოს სხდომაზე განიხილეს, უკრაინის მუდმივმა წარმომადგენელმა რუსეთი ომის დაწყებაში დაადანაშაულა, რუსეთის მუდმივმა წარმომადგენელმა გამოაცხადა “გამართლებული სამხედრო ოპერაცია”.

? საჰაერო მიმოსვლა უკრაინის მთელ ტერიტორიაზე დაკეტილია, რუსეთმა შეაჩერა ფრენები უკრაინის მოსაზღვრე რეგიონებში, დაკეტილია აეროპორტები.

უკრაინის საგანგებო სიტუაციების სამინისტრო იუწყება, რომ ოკუპანტებმა ლუგანსკის ოლქის ორი სოფელი – მელოვოიე და გოროდიშჩე აიღეს.

საჰაერო განგაში ამჯერად ლვოვში. ხალხს ტელევიზორიდან აფრთხილებენ

უკრაინის გენერალური შტაბის ინფორმაციით, რუსული ჯარები უკრაინის ტერიტორიაზე სამხედრო ობიექტებსა და აეროდრომებს 05:00 საათიდან უტევდნენ.

CNN ტანკებმა გადაკვეთეს ბელორუსი- უკრაინის საზღვარი. ბელორუსი პირველი ქვეყანაა, რომელიც ომში ჩაერთო

ნატო საგანგებო სხდომას იწვევს

ასე გამოიყურება 24 თებერვლის დილას ხარკოვი. ფოტო: nexta

ბრიტანეთის პრემიერ-მინისტრი ჯონსონი:

„შეძრწუნებული ვარ უკრაინაში მომხდარი შემზარავი მოვლენებით. ველაპარაკე პრეზიდენტ ზელენსკის შემდეგი ნაბიჯების განსახილველად.

პრეზიდენტმა პუტინმა სისხლისღვრისა და ნგრევის გზა აირჩია უკრაინაზე არაპროვოცირებული თავდასხმით.

ბრიტანეთი და ჩვენი მოკავშირეები მტკიცედ უპასუხებენ“.