Forbes: 2023 წელს რუსებმა ყველაზე მეტი ბიზნესი საქართველოში დაარეგისტრირეს

რუსები საქართველოში

Forbes-ის რუსულენოვანი სამსახური წერს, რომ გასულ წელს საქართველო ლიდერი იყო იმ ქვეყნებს შორის, სადაც რუსეთის მოქალაქეებმა ბიზნესი დაიწყეს. გამოცემა კომპანია Финион-ის ანალიტიკოსებზე დაყრდნობით აღნიშნავს, რომ 2023 წლის იანვრიდან დეკემბრამდე რუსეთის მოქალაქეებმა საქართველოში 13 ათასი იურიდიული პირი დაარეგისტრირეს.

ასევე, უკრაინაში ომის დაწყების შემდეგ – 2022 წლის თებერვლიდან 2023 წლის თებერვლამდე – რუსებმა ქვეყანაში 16 ათასი ინდმეწარმე დაარეგისტრირეს. შედარებისთვის, 1995 წლის იანვრიდან 2022 წლის თებერვლამდე რუსებმა საქართველოში სულ 7 788 კომპანია დააარსეს.

იმავე სიაში მეორე ადგილზეა ყაზახეთი, სადაც რუსეთის მოქალაქეებმა 6 100 კომპანია შექმნეს, მესამე ადგილს კი სომხეთი და მონტენეგრო ინაწილებენ. ამ ქვეყნებში რუსებმა 3 400 იურიდიული პირი დაარეგისტრირეს. 3000 კომპანია შექმნეს რუსეთის მოქალაქეებმა სერბეთში.

“საქართველოში კომპანიების ასეთ მასობრივ გახსნას რამდენიმე მიზეზი აქვს: წმინდა სტატისტიკური მიზეზების, ანუ რუსეთის მოქალაქეების ქვეყანაში აქტიურად შედინების გარდა, ამას ხელს უწყობს ბიზნესის დარეგისტრირების ხელსაყრელი პირობები და საგადასახადო სისტემა. ინდმეწარმეს შეუძლია გადაიხადოს მხოლოდ 1%-იანი საშემოსავლო გადასახადი, ხოლო შპს-ს მფლობელს შეუძლია არ დარეგისტრირდეს დღგ-ის გადამხდელად, სანამ 100 000-ლარიან ბრუნვას არ მიაღწევს. გარდა ამისა, საქართველოში რუსებს და ბელორუსებს შეუძლიათ ლეგალურად გახსნან საბანკო ანგარიშები, მათ შორის, ბიზნესის საქმიანობისთვის”. – აღნიშნა Финион-ის დირექტორმა, ვიაჩესლავ კარტამიშევმა.

● მიკროჩიპებიდან ავტომობილებამდე: როგორ ეხმარებიან რუსეთს მეზობლები სანქციების გვერდის ავლაში
● “თბილისში ანტირუსული სანქციები სწორად აღიქვეს, როგორც თავის მოტყუება და სიგიჟე” – რუსეთის დუმა
● საქართველოს რუსეთზე ეკონომიკური დამოკიდებულება 2023 წელსაც იზრდება – TI

შინაგან საქმეთა სამინისტროს მიერ გამოქვეყნებული სტატისტიკის თანახმად, საქართველოში რუსი მიგრანტების რაოდენობა მცირდება. 2023 წელს საქართველოში 1 856 237-ჯერ შევიდნენ და ქვეყანა 1 887 223-ჯერ დატოვეს. სხვაობა თითქმის 31 ათასია.

ასევე, საერთაშორისო გამჭვირვალობა – საქართველოს [TI] 29 სექტემბერს გამოქვეყნებულ კვლევაში ვკითხულობთ, რომ საქართველოს რუსეთზე ეკონომიკური დამოკიდებულება 2023 წელსაც იზრდება. 

TI-ის ინფორმაციით, 2023 წლის იანვარ-ივნისში საქართველომ რუსეთიდან ფულადი გზავნილებით, ტურიზმით  და საქონლის ექსპორტით 2 მლრდ აშშ დოლარის შემოსავალი მიიღო, რაც 2022 წლის იანვარ-ივნისის მაჩვენებელზე 1.6-ჯერ მეტია.

ორგანიზაციის განმარტებით, რუსი ვიზიტორების ნაწილი რეალურად იმიგრანტია და საქართველოში ხანგრძლივი ვადით დასახლდა. საქსტატის ინფორმაციით, 2022 წელს 62,300 რუსეთის მოქალაქე დარჩა საქართველოში საცხოვრებლად; მათივე ინფორმაციით, 2022-2023 წლებში დარეგისტრირებული კომპანიების 96% ინდივიდუალური საწარმოა. ეს მიანიშნებს, რომ რუსეთის მოქალაქეების ნაწილი საქართველოში ხანგრძლივად საცხოვრებლად და ბიზნესის საკეთებლად გადმოვიდა.

აღსანიშნავია, რომ 2023 წლის 6 თვეში რუსეთიდან ყველაზე მეტად ნავთობპროდუქტების იმპორტი გაიზარდა – 75%-ით. თუ შევადარებთ, რუსეთ-უკრაინის  ომამდელ პერიოდს, ნავთობპროდუქტების იმპორტი 5-ჯერ არის გაზრდილი.

TI-ის ანგარიშის მიხედვით, 2022 წელს რუსეთიდან 108 მლნ დოლარის პირდაპირი უცხოური ინვესტიცია შემოვიდა, რაც რეკორდული წლიური მაჩვენებელია. 2023 წლის იანვარ-ივნისში რუსეთიდან შემოსული ინვესტიციების მოცულობა 7-ჯერ გაიზარდა და 56 მლნ დოლარი შეადგინა, საიდანაც 27 მლნ დოლარი საფინანსო და სადაზღვევო საქმიანობის სფეროში, ხოლო 18 მლნ დოლარი უძრავი ქონების სფეროში განხორციელდა.