წყალტუბოში ნაგავსაყრელის აშენებას ეწინააღმდეგებიან, ნინოწმინაში აპროტესტებენ რძის გაიაფებას. რეგიონული ამბების დაიჯესტი

რეგიონული ამბების დაიჯესტი

 “თავს შევწირავთ და არ ავაშენებინებთ”- წყალტუბოში არ უნდათ მათ სიახლოვეს დიდი ნაგავსაყრელი აშენდეს

„მოსახლეობისგან 200 მეტრში კეთდება ნაგავსაყრელი, რომელიც 16 მუნიციპალიტეტს უნდა მოემსახუროს. ეზოებში, მიწის ნაკვეთებში გვიკეთებენ, ხომ წარმოგიდგენიათ რა მდგომარეობა იქნება?!“ – იმერეთში, წყალტუბოს სოფლებში მცხოვრებლები ნაგავსაყრელის მშენებლობას ეწინააღმდეგებიან. 

ისინი ამბობენ, რომ ეს ნაგავსაყრელი მათ სახლებთან ძალიან ახლოს იქნება და ცხოვრება შეუძლებელი გახდება. წყალტუბოს სოფლების მცხოვრებლებმა პროტესტის ნიშნად წყალტუბოს საკრებულოს შენობასთან აქციაც გამართეს.

ვრცლად: kutaisipost.ge

ნინოწმინდაში ქარხნებმა რძის ფასი დაწიეს. ფერმერები უკმაყოფილოები არიან

ნინოწმინდაში ქარხნებმა რძის ჩასაბარებელი ფასი 1,80 ლარიდან 1,60 ლარამდე შეამცირეს. ფერმერები ამბობენ, რომ ასეთი ფასი მათთვის მიუღებელია, რადგან მათ მოგება აღარ რჩებათ. ხუთი სოფლის მცხოვრებლებმა ფასის კლება აქციითაც გააპროტესტეს. ისინი ითხოვენ ეს საკითხი სახელმწიფომ დაარეგულიროს.

„ყველაფერი გაძვირდა და მხოლოდ რძე გაიაფდა. როგორ უნდა ვიცხოვროთ?! ეს ჩვენთვის შემოსავლის ერთადერთი წყაროა“, – ამბობენ ადგილობრივები რადიო “ნორთან”.

ვრცლად: nor.ge

კახეთში 13 წლის გოგოზე სექსუალური ძალადობის ბრალდებით 25 წლის კაცი დააკავეს

კახეთის ერთ-ერთ მუნიციპალიტეტში 25 წლის მამაკაცი 13 წლის გოგოზე სექსუალური ძალადობის ბრალდებით დააკავეს. დაკავებული გოგონას ნათესავია და ამავე ოჯახში ქირით ცხოვრობდა.  როგორც ცნობილია, გოგონაზე სავარაუდო სექსუალური ძალადობის შესახებ ოჯახმა მას შემდეგ შეიტყო, რაც 13 წლის მოზარდი და მათი ნათესავი გაუჩინარდნენ. გოგოს ბებიამ პოლიციას მიმართა.

ვრცლად: speqtri.ge

გორში გაათავისუფლეს მასწავლებელი, რომელმაც მოსწავლე ცემა

გორში, სოფელ ფლავში, სკოლიდან გაათავისუფლეს მასწავლებელი, რომელმაც გაკვეთილზე მოსწავლე ცემა. როგორც რადიო „მოზაიკა“ წერს, ინციდენტის ამსახველი ვიდეო მოსწავლეებმა გადაიღეს და ინტერნეტში გაავრცელეს. მომხდარის შესახებ სკოლის ადმინისტრაციამ პოლიციასაც აცნობა.

ვრცლად: mozaikanews.ge

გორში, ერთ-ერთი სახლის სხვენში, კაცის ცხედარი იპოვეს

გორში, ერთ-ერთ დასახლებაში, კორპუსის სხვენში სადეზინფექციო სამუშაოების დროს, მამაკაცის ცხედარი ნახეს. როგორც კორპუსში მცხოვრებლები ამბობენ Qartli.ge-სთან, კაცს ბინა არ ჰქონდა და ღამით სხვენში რჩებოდა. სადეზინფექციო სამსახური კი მას შემდეგ გამოიძახეს, რაც მოსახლეობა არასასიამოვნო სუნმა შეაწუხა.

ვრცლად: Qartli.ge

ახალციხის თეატრი 2500 ლარად  ყიდის ისტორიულ, რელიქვიად ქცეულ ავტობუსს

მესხეთის დრამატული თეატრის ადმინისტრაციამ გადაწყვიტა გაყიდოს ძველი ავტობუსი, რომელსაც 45 – წლიანი ისტორია აქვს და თეატრის რელიქვიად ითვლება. ეს არის პირველი ავტობუსი, რომლითაც ათეული წლების წინ თეატრის დასი გასტროლებზე დადიოდა.

ავტობუსი, რომელიც დიდი ხანია აღარ დადის და თეატრის ეზოში დგას, ხშირად იწვევს ტურისტების დაინტერესებასაც. როგორც გამოცემა Sknews.ge წერს, ამ დრომდე თეატრს მისი, როგორც რელიქვიის  გაყიდვა არ უნდოდა. მაგრამ, როგორც ჩანს, ახლა გადაწყვეტილება შეცვალეს და გადაწყვიტეს, თეატრის ისტორიულ ავტობუსს 2500 ლარის სანაცვლოდ შეელიონ.

ვრცლად: sknews.ge

მარნეულში ნახევარ მილიონ ლარს დახარჯავენ სოფელ სადახლოს გზის დაგებაში

მარნეულში, სოფელ სადახლოში შიდა გზებს დააგებენ. პირველი და მეორე უბნის რეაბილიტაციის სამუშაოების შესყიდვისათვის ადგილობრივმა თვითმმართველობამ 526 863 ლარიანი ტენდერი გამოაცხადა.

ვრცლად: marneulifm.ge

საგარეჯოში ბიო ნუშის წარმოება დაიწყო

საგარეჯოს მუნიციპალიტეტში ბიო ნუშის წარმოება დაიწყო. კომპანია “გეონუში” წელს პირველ მოსავალს ელოდება, მომავალი წლიდან კი ექსპორტზე გასვლას გეგმავს. კომპანიაში ამბობენ, რომ წელს ადგილობრივ ბაზარზე 1 კილოგრამის ფასი 8-9 დოლარი იქნება.

ვრცლად: knews.ge

რეგიონული ამბების დაიჯესტი