პრემიერმა ახალგაზრდებსა და ბერბიჭაშვილს შორის ტოლობის ნიშანი დასვა. პრეზიდენტის და მოქალაქეების კომენტარები

პრემიერმა ახალგაზრდებსა და ბერბიჭაშვილზე

საქართველოს პრემიერმინისტრმა, ირაკლი კობახიძემ რუსულ კანონთან დაკავშირებით ღია წერილი გამოაქვეყნა, სადაც ახალგაზრდებს მიმართავს და მათსა და ილია ჭავჭავაძის მკვლელ გიგლა ბერბიჭაშვილს შორის ტოლობის ნიშანი დასვა. ასევე, კობახიძის მტკიცებით, კვლევა ჩაატარეს, რომლის მიხედვითაც, მაღალი ინტელექტის მქონე (IQ) ამომრჩეველში “ქართული ოცნების” მხარდაჭერა 73.8% იყო, ხოლო საშუალო ინტელექტის მქონე ამომრჩეველში – 45.6%.

საქართველოს პრეზიდენტმა, სალომე ზურაბიშვილმა პრემიერის განცხადებას “სამარცხვინო” უწოდა და განაცხადა, რომ “სირცხვილია ახალგაზრდებსა და ბერბიჭაშვილს შორის” ტოლობის ნიშნის დასმა.

სოციალური ქსელების მომხმარებლებმა კი ირაკლი კობახიძის განცხადებას IQ-სთან დაკავშირებით ბევრი ირონიული პოსტი მიუძღვნეს.

მუქარა, გინება, ცემა. რა ფაზაში შევიდა "ქართული ოცნება". ექსპერტების კომენტარები

“ჩვენ ახლა ვუყურებთ სრული სვლით სვლას ავტორიტარიზმისკენ”

რას წერს ირაკლი კობახიძე

ირაკლი კობახიძე ღრმადაა დარწმუნებული, რომ ხელისუფლებამ უნდა იმოქმედოს “29 აპრილს ქართული ოცნების აქციაზე მოსული 200 ათასი ახალგაზრდა, საშუალო ასაკისა და ასაკოვანი ადამიანის” კარნახით. მისი თქმით, მმართველი პარტია იმოქმედებს ქართველი ამომრჩევლის 60%-ზე მეტის დაკვეთით, რომელიც “ენჯეოების“ გამჭვირვალობას და შესაბამისად, საქართველოს მშვიდობიან მომავალს” მყარად და გააზრებულად უჭერს მხარს.

პრემიერმინისტრი მიმართავს “ყველა გულწრფელ ახალგაზრდას, რომელიც არასწორ გზას ადგას”, საკუთარ წარსულ ნაბიჯებს კრიტიკულად შეხედონ. ასევე, პირდება მათ, რომ “ქართული სახელმწიფო იზრუნებს ყველა გულწრფელ ახალგაზრდაზე”, მათ შორის ისეთებზეც, რომლებიც “დღეს შეცდომაში არიან შეყვანილი და ვერ აცნობიერებენ”, თუ რამხელა “უბედურება” ააცილა მას ქართული საზოგადოების უმრავლესობამ და მის მიერ არჩეულმა ხელისუფლებამ თავიდან.

“ჩემი ნაცნობი გულწრფელი ახალგაზრდის პირველი რევოლუციური მცდელობა იმით დასრულდა, რომ თვითმმართველობის არჩევნებში მან ისევ „ნაცმოძრაობის“ ერთ-ერთ დანაყოფს – ხაზარაძეს ან გახარიას მისცა ხმა, თუმცა, „ქართულმა ოცნებამ“ ხმების 47 პროცენტი მიიღო და რიგგარეშე საპარლამენტო არჩევნების იდეაც წარსულს ჩაბარდა.

2021 წლის ნოემბრიდან 2022 წლის თებერვლის ბოლომდე ამ ახალგაზრდის „ფეისბუკ“-აქტივობა ექსკლუზიურად სააკაშვილის შიმშილობას და გათავისუფლებას უკავშირდებოდა. როგორც ყველა კლასიკური ფსევდოშუაშისტი, ისიც წერდა, რომ ახლა სააკაშვილის წარსულის გარჩევის დრო არ იყო და მხოლოდ მისი სიცოცხლის გადარჩენაზე უნდა გვეფიქრა. ამ გულწრფელ ახალგაზრდას მოგვიანებით ოდნავი გულისწყვეტაც კი არ გამოუხატავს, როცა სააკაშვილმა ორი წლის თავზე გადაწყვიტა, რომ აღარ კვდებოდა და სიმულანტობა პრინციპულად შეწყვიტა.

მრავალი დაშვებული შეცდომის მიუხედავად, გულწრფელმა ახალგაზრდამ საკუთარი ანალიტიკური უნარების კიდევ ერთხელ მყარად ირწმუნა, როდესაც უკრაინაში ომი დაიწყო. ომის პირველივე დღეს მან ვლადიმირ ზელენსკი ცივილიზებული სამყაროს ლიდერად და მსოფლიო გმირად გამოაცხადა. დღეს კი ხვდება ეს ახალგაზრდა, რომ მისი ანალიტიკური დასკვნები სიმართლისგან უკიდურესად შორს იყო, თუმცა, შეცდომის აღიარება ერთხელაც არ უფიქრია. ამ ახალგაზრდის „ფეისბუკს“ დღემდე ამშვენებს წარწერა „სლავა უკრაინე“ და ჩარჩო ევროკავშირისა და უკრაინის დროშებით, სადაც საქართველოს დროშისთვის ადგილი ვერ გამოიძებნა.

2022 წლის თებერვალში გულწრფელი ახალგაზრდა ერთ-ერთი პირველი გავიდა აქციებზე და პირველ რიგში, რუსეთისთვის სანქციების დაწესება მოითხოვა. მან მყისიერად გააზიარა ლომჯარიას განცხადება, სანქციების არდაწესებას მირჩევნია, ბომბებისგან მიღებულმა ცეცხლმა დაგვწვასო. სანქციების დაწესების პირობებში, საქართველოს ეკონომიკა რომ ჩამოიქცეოდა, ამაზე ეს ახალგაზრდა პასუხს არა საკუთარ თავს, არამედ ისევ ხელისუფლებას მოსთხოვდა. ნაცის ტვინი ასეა მოწყობილი – ხან ვერ ფიქრობს და ხან არ ფიქრობს.” – წერს კობახიძე.

მისი თქმით, ამ ახალგაზრდამ საქართველოს მთავრობის ოფიციალური თანხმობით უკრაინაში მებრძოლი მოხალისეების გაგზავნაც მოითხოვა და მაშინაც კი არ დაუხევია უკან, როცა ბაიდენმა და ჯონსონმა თქვეს, უკრაინაში ჩვენგან “მოხალისეების წასვლას რეკომენდაციას არ ვუწევთ, რადგან არ გვინდა, ნატო რუსეთთან ომში” ჩაებასო:

“მეტიც, ომისკენ ღიადაც იქაჩებოდა და გიგაურის განცხადება გააზიარა: რუსეთი უკრაინაში ომს აგებს, ყველა მიმართულებით ომს ვერ დაიწყებს და შესაძლებლობის ეს ფანჯარა უნდა გამოვიყენოთო.

ეს ახალგაზრდა, რომელიც, ზოგადად, თავს ვალდებულად მიიჩნევს, ყველაფერ რუსულზე გაღიზიანდეს, საერთოდ არ გაღიზიანდა, როდესაც კიდევ ერთმა „მსოფლიო გმირმა“, დავით არახამიამ რუსთაველის გამზირზე გამართულ აქციაზე მას რუსულ ენაზე მიმართა. აქედან ჩანს, რომ ნაცი ყველაფერ რუსულზე კი არ ღიზიანდება, არამედ თავს იღიზიანებს. ასე იღიზიანებენ დღეს თავს რუსეთზე ნიკოლოზ ე.წ. რაჭველი, ნინო ქათამაძე და სხვა ცნობილი ნაციონალები, რომლებიც 2019 წლამდე რუსეთში კონცერტს კონცერტზე მართავდნენ. ამ და სხვა ნაციონალებმა საკუთარ თავს დააჯერეს, რომ რუსეთი საქართველოს ტერიტორიების ოკუპანტი არა საქართველოს ტერიტორიების ოკუპირების შემდეგ, არამედ უკრაინის ტერიტორიების ოკუპირების შემდეგ გახდა. ასეა ნაცის ტვინი მოწყობილი – ხან ვერ ფიქრობს და ხან არ ფიქრობს. ამიტომ, მისთვის რუსულზე გაღიზიანებაც შერჩევითია.

კობახიძე წერს, რომ “გულწრფელი ახალგაზრდის ანალიტიკური ამბიციები მწვერვალებს მისწვდა”, როდესაც დღის წესრიგში ევროკავშირის კანდიდატის სტატუსის საკითხი დადგა. პრემიერის თქმით, მათ საზოგადოებას მრავლად გაუზიარეს ინფორმაცია იმის შესახებ, რომ საქართველოს არაკეთილმოსურნეები და მეორე ფრონტის მსურველები კანდიდატის თემას შანტაჟისთვის იყენებდნენ.

კობახიძე ხაზს უსვამს, რომ მათ ყველას გაუზიარეს ინფორმაცია ბაკურიანის შეხვედრის შესახებ, სადაც “კოლექტიური „ნაცმოძრაობა“ – პარტიები, ენჯეოები და ტელევიზიები შეიკრიბნენ და დაგეგმეს, როგორ უნდა მოეწყოთ რევოლუცია, როდესაც ივნისში კანდიდატის სტატუსს “არ მოგვანიჭებდნენ.”

“ზოგადად, სახელმწიფოსთვის ყველაზე საშიში საშუალო ინტელექტისა და ცოდნის მქონე ადამიანების დომინირებაა, რასაც დანინგ-კრუგერის თეორიაც ადასტურებს. ამ თეორიის თანახმად, საშუალო ინტელექტისა და ცოდნის მქონე ადამიანს ახასიათებს თავდაჯერებულობის ყველაზე მაღალი ხარისხი. ადამიანს, რომელსაც კანონი არ წაუკითხავს, მაგრამ ილიას უნივერსიტეტის ასოცირებული პროფესორისგან და ოკეანის გაღმიდან მოისმინა, რომ ეს კანონი რუსულია, ყველაზე მყარად სწამს, რომ მის მიერ წაუკითხავი კანონი ცუდია.

გულწრფელობას რაც შეეხება, მას მხოლოდ მაშინ აქვს ფასი, როდესაც ის ცოდნითა და ინტელექტით არის გამყარებული. ცოდნისა და ინტელექტის არმქონე და თავდაჯერებული ადამიანი რუსულ ტანკზე უარესია.

როდესაც 29 წლის გიგლა ბერბიჭაშვილმა 70 წლის ილია ჭავჭავაძეს ესროლა, მას ღრმად სწამდა, რომ თავად იყო პროგრესული გულწრფელი ახალგაზრდა, ხოლო ილია ჭავჭავაძე – ჩამორჩენილი არაკეთილსინდისიერი მოხუცი. ბერბიჭაშვილს და მის თანამოაზრე ახალგაზრდებს ეს რწმენა ბოლშევიკურმა იდეოლოგიამ ჩაუნერგა. მსგავსი მეთოდებით მუშაობს ფსევდოლიბერალური იდეოლოგიაც, რომელმაც კოლექტიური „ნაცმოძრაობის“ პირდაპირ თუ ირიბად მიმდევარ ახალგაზრდებს დააჯერა, რომ სწორედ ისინი არიან გულწრფელობისა და პროგრესულობის მაგალითი ამ ქვეყანაში.” – წერს ირაკლი კობახიძე.

პრეზიდენტის გამოხმაურება

“ახალგაზრდებს და ბერბიჭაშვილს შორის რამე ტოლობის ნიშნის დასმა ნებისმიერი ადამიანისთვის უდიდესი სირცხვილი იქნებოდა. ეს სიტყვები პრემიერმინისტრს როცა ეკუთვნის, ეს მას უკვე სხვა განზომილებაში გადასულ ადამიანად წარმოაჩენს და ადასტურებს მისი მთავრობის გაუცხოებას საკუთარი ხალხისგან.

მმართველობა ჯერ საკუთარი ხალხის სიყვარულით იწყება, “მამულის” სიყვარული სხვა არაფერია.

ვნების კვირაში, აღდგომისა და ბრწყინვალე შვიდეულის დროს ამდენი მუქარა, სიძულვილი, ცემა, ძალადობა არ გამიგია, თან ოფიციალური პირებისგან (გამონაკლისის გარეშე)… ესეც სარწმუნოება!!!

რაც ეხება ენას … თქვენი სიძულვილის ენა ქართული არასოდეს ყოფილა.” – ამბობს პრეზიდენტი.

● ევროკავშირის სპეციალური წარმომადგენელი სამხრეთ კავკასიაში: საით მიდიხარ, საქართველო?
● “ვიწყებთ ბაზის შექმნას, სადაც თავს მოიყრის ინფორმაცია შანტაჟში ჩართულ პირებზე” – შალვა პაპუაშვილი

სოციალური ქსელების გამოხმაურება

იაკობ ჯანგავაძე: “ნინო ჯღარკავა ყოფილა გადარეული, მაღალი IQ მაქვს და რამე დამწევი მირჩიეთო.”

საკო ჯიშკარიანი: “– რაზე ზიხარ, ძმა?
– დაბალ IQ-ზე.“

მარი ბერძენიშვილი: “IQ-ზე რატომღაც მეხსიერებამ მყისიერად გამოიხმო ირაკლი ზარქუა {ქართული ოცნების ოდიოზური დეპუტატი – JAMnews}.”

გია ხუხაშვილი: “კობახიძემ ქოცებს IQ ჩაუდო.”

ჯიმშერ რეხვიაშვილი: “ქოცმა თქვა, ყველას ხელფასი ეზრდება, მე IQ-იო.”