ოთხმა ოპოზიციურმა პარტიამ მანდატებზე ოფიციალურად თქვა უარი
ოპოზიციური პარტიების ნაწილმა მანდატებზე უარი ოფიციალურად თქვა. ეს პარტიებია: ერთიანი ნაციონალური მოძრაობა-ძალა ერთობაშია, ევროპული საქართველო, სტრატეგია აღმაშენებელი და ლელო.
პარტიებმა მანდატების შეწყვეტის მოთხოვნით საკანონმდებლო ორგანოს დღეს, 16 დეკემბერს მიმართეს. იქამდე, რამდენიმე დღის წინ, პარტიებმა სია ცესკოში ოფიციალურად გაანულეს.
პირველი, ვინც მანდატზე უარის თხოვნით საკანონმდებლო ორგანოს მიმართა ლეიბორისტული პარტიის ლიდერი შალვა ნათელაშვილი იყო, მან განცხადება პარლამენტში 14 დეკემბერს შეიტანა.
_________________________
● ცესკომ ოპოზიციური პარტიების საარჩევნო სიები ოფიციალურად გააუქმა
● კანონები და გადაწყვეტილებები, რომელთაც ახალი პარლამენტი ვერ მიიღებს
___________________________
მანდატებზე ჯერ-ჯერობით უარი არ უთქვამს გირჩს, მოქალაქეებს და პატრიოტთა ალიანსს, თუმცა გირჩის ერთ-ერთი წევრის, ვახტანგ მეგრელიშვილის თქმით, თუ 38 დეპუტატი დატოვებს მანდატს, გირჩის მინიმუმ 3 დეპუტატი დაწერს განცხადებას.
განცხადების დაწერას უახლოეს მომავალში გეგმავს პატრიოტთა ალიანსის ოთხი წევრიც.
ხელისუფლებისთვის ყველაზე სასურველი და წინა მოწვევის პარლამენტის ერთ-ერთ ყველაზე ახლო პარტნიორი პარტია სხვა ოპოზიციონერების მსგავსად ამბობს, რომ არჩევნები გაყალბდა და მათ გაცილებით მაღალი შედეგი აქვთ, ვიდრე ცესკომ დაუწერა {ცესკოს მონაცემებით, მათ ხმების 3.14 პროცენტი მიიღეს}, თუმცა ისინი არსებულ ოპოზიციასთან ერთად არ იმოქმედებენ.
პარტიის ერთ-ერთი ლიდერის, გოჩა თევდორაძის თქმით, “ოპოზიცია ცალკე მოქმედებს, ჩვენ ცალკე ვმოქმედებთ… ჩვენ პარლამენტში არ შევდივართ, მის მუშაობაში არ მივიღებთ მონაწილეობას და მანდატსაც დავტოვებთ”.
რაც შეეხება “მოქალაქეებს” და მის ორ წევრს – ალეკო ელისაშვილს და ლევან იოსელიანს – ისინი მანდატების დატოვებას არ აპირებენ და ელჩებთან მოლაპარაკების იმედი აქვთ.
ლევან იოსელიანის თქმით, არ უნდა, მოლაპარაკებების წარმატებით დასრულების შემთხვევაში, მანდატის დაბრუნების თხოვნით ირაკლი კობახიძეს მიმართოს.
_________________________
● განხეთქილება ოპოზიციაში: ვინ იქნება პირველი, ვინც პარლამენტში შევა
___________________________
ამ დრომდე “ქართულ ოცნებასა” და ხელისუფლებას შორის, საერთაშორისო პარტნიორების და ფასილიტატორების მონაწილეობით, მოლაპარაკებების ოთხი რაუნდი გაიმართა.
მოლაპარაკების მეხუთე რაუნდი, რომელიც ფასილიტატორების შუამავლობით 10 დეკემბერს უნდა გამართულიყო, გაურკვეველი ვადით გადაიდო.
მოლაპარაკებების გადადების სავარაუდო მიზეზი, ირაკლი კობახიძის განცხადებებია, რომელმაც “ერთიანი ნაციონალური მოძრაობის” რეგისტრაციიდან მოხსნა და იმ პარტიებისთვის დაფინანსების შეჩერება დააანონსა, რომლებიც პარლამენტს ბოიკოტს უცხადებენ.
