"ნაციონალური მოძრაობა" პარლამენტში მივიდა, თუმცა სესია ხვალამდე გადაიდო
შვიდთვიანი ბოიკოტის შემდეგ, “ერთიანი ნაციონალური მოძრაობა” პარლამენტში მივიდა, თუმცა პლენარული სხდომა ისე დასრულდა, რომ ენმ-ს თავმჯდომარეს, ნიკა მელიას ფრაქციის დროით სიტყვით გამოსვლის საშუალება არ მიეცა.
“ნაციონალური მოძრაობა” სხდომათა დარბაზში 17:00 საათზე მივიდა, თუმცა ოცნებამ დღის წესრიგი შეცვალა. პარლამენტის სპიკერის, კახა კუჭავას თქმით, დღეს სხდომა დასრულებულია ის ხვალ, 9 ივნისს განახლდება. ენმ-ს ერთ-ერთი ლიდერის, ხატია დეკანოიძის განცხადებით, “ქართულ ოცნებას” ოპონენტების შეეშინდა და დარბაზიდან გაიქცა.
“ეს იყო შიშის ფაქტორი. თავიდან ამნისტიის კანონპროექტი ჩახსნეს. ეს ამნისტიის კანონპროექტი იყო ძალიან მნიშვნელოვანი, რაზეც ჩვენ ვაპირებდით გამოსვლას. მათ შორის ჩახსნეს მეორე საკითხი, რომელიც ეხებოდა პარტიულ დაფინანსებას. იმდენად შიში ჰქონდათ, რომ ნიკა [მელია] არ გამოსულიყო, სასწრაფოდ დაამთავრეს სხდომა”, – ამბობს ხატია დეკანოიძე.
პარლამენტში მისვლისას ნიკა მელიამ განაცხადა, რომ სხდომაზე სიტყვით გამოვიდოდა, რომელიც მის ფრაქციას კანონით ეკუთვნის და ისაუბრებდა ყველა საკითხზე. ნიკა მელია ამბობდა, რომ “ოცნება გაიგებს ყველაფერს დღეს, ხვალ, ზეგ, ძალიან ამომწურავად ვისაუბრებ, მნიშვნელოვანი გეგმები გვაქვს.”
ენმ-ს სიით შესული დეპუტატი კახა ოქრიაშვილი კი ამბობს, რომ არალეგიტიმური პარლამენტი უნდა დაიშალოს.
“ვადამდელი საპარლამენტო არჩევნები უნდა დაინიშნოს. ესაა არალეგიტიმური პარლამენტი და აქედან გამომდინარე, უკანონო. დღეს ოპოზიცია უნდა იჯდეს ხელისუფლებაში, ქართული ოცნება უნდა იყოს ოპოზიცია. მათ მოიტაცეს ხელისუფლება, მოიტაცეს ქვეყანა, მოიტაცეს სახელმწიფო. ჩვენ გვაქვს სამშობლო, სახელმწიფო არ გვაქვს! მე ახლა ვარ არალეგიტიმური პარლამენტის წევრი, სამწუხაროდ, პირველად. უნდა დავშალოთ ეს არალეგიტიმური პარლამენტი“
“ნაციონალური მოძრაობისთვის” სირცხვილის კორიდორის მოსაწყობად პარლამენტის უკანა შესასვლელთან ახალგაზრდები იყვნენ შეკრებილი. ისინი ამბობდნენ, რომ არცერთ ორგანიზაციას არ წარმოადგენენ და უბრალო მოქალაქეები არიან, რომლებიც “ნაციონალური მოძრაობის” არათანმიმდევრულ გადაწყვეტილებას აპროტესტებენ, თუმცა მედიაში გაჩნდა ცნობები იმის შესახებ, რომ პროტესტის მონაწილეები “ქართული ოცნების” ახალგაზრდული ფრთის წევრები არიან და ისინი სხვადასხვა საჯარო სამსახურების სიპებში და აიპებში არიან დასაქმებული.
“ნაციონალური მოძრაობის” ფრაქციაში 32 დეპუტატია. ფრაქციის თავმჯდომარე ხატია დეკანოიძე იქნება, მისი მოადგილეები კი ლევან ბეჟაშვილი, გიორგი ბოტკოველი და ნატო ჩხეიძე. ეს ყველაზე დიდი ოპოზიციური ფრაქცია იქნება, რომელიც აერთიანებს “ნაციონალური მოძრაობის” საარჩევნო ბლოკით გასულ პარლამენტის ყველა წევრს, გარდა გრიგოლ ვაშაძის, სალომე სამადაშვილის, თამარ კორძაიას და ხათუნა სამნიძისა, რომლებმაც პარტიის გარეშე მოაწერეს ხელი შარლ მიშელის დოკუმენტს.
___________________________________________________________
● კრიზისის დასასრული? ხელისუფლებამ და ოპოზიციის ნაწილმა შეთანხმებას ხელი მოაწერა
● ნიკა მელიამ საპატიმრო დატოვა – მას გირაო ევროკავშირმა გადაუხადა. პირველი კომენტარები
● მიხეილ სააკაშვილი: მას შემდეგ, რაც მელია ციხეს დატოვებს, ენმ-მ ხელი უნდა მოაწეროს დოკუმენტს
______________________________________________________________
საქართველოს პარლამენტში ოპოზიციური პარტიების დეპუტატების ნაწილმა მას შემდეგ დაიწყო მუშაობა, რაც ევროპული საბჭოს პრეზიდენტის, შარლ მიშელის ჩართულობით ხელისუფლებასა და ოპოზიციას შორის შეთანხმება შედგა,
შეთანხმების შემდეგ საპატიმრო დატოვეს “მთავარი არხის” მეწილემ გიორგი რურუამ და “ერთიანი ნაციონალური მოძრაობის” თავმჯდომარემ ნიკა მელიამ. ამ შეთანხმების ერთ-ერთი მთავარი ნაწილი ასევე იყო საპარლამენტო საქმიანობის დაწყება.
30 აპრილს, საქართველოს მესამე პრეზიდენტმა მიხეილ სააკაშვილმა “ნაციონალურ მოძრაობას” მოუწოდა, ხელი მოაწეროს შარლ მიშელის მიერ შემოთავაზებულ დოკუმენტს მას შემდეგ, რაც ნიკა მელია საპატიმროს დატოვებს.
თუმცა, ნიკა მელიას თქმით, პარტია შარლ მიშელის შემოთავაზებულ დოკუმენტს ხელს არ მოაწერს და არ დაიკავებს არცერთ საპარლამენტო თანამდებობას. მიშელის დოკუმენტში მთავარი წინაღობა 20 ივნისის საქმეზე ამნისტიის შესახებ პუნქტია.
“ერთიანმა ნაციონალურმა მოძრაობამ” ცესკოს მიერ გამოცხადებული შედეგებით, 2020 წლის საპარლამენტო არჩევნებში ამომრჩეველთა ხმების 27.18% აიღო, რაც 523 127 მოქალაქის ხმაა. პარტიამ მე-10 მოწვევის პარლამენტში 36 მანდატი მოიპოვა.
