მოგზაურობის მიზანი - ვაქცინაცია: სომხეთს ირანიდან ტურისტების ნაკადი მიაწყდა

სომხეთში კორონავირუსის საწინააღმდეგო ვაქცინების საკმარისი რაოდენობაა, ირწმუნებიან ჯანდაცვის სამინისტროში. ქვეყნის მოქალაქეებს უფასოდ შეუძლიათ აიცრან ნებისმიერ პოლიკლინიკაში, ასევე, ქუჩაში მდგარ მობილურ სადგურებში. თუმცა, ვაქცინაცია არც ისე ბევრ ადგილობრივს სურს. სამაგიეროდ, დიდ აქტივობას იჩენენ უცხოელი ტურისტები. ირანიდან ბევრი ადამიანი სპეციალურად ჩადის სომხეთში, რათა უფასოდ აიცრას.

ვაქცინაციის დაწყებიდან 18 ივლისამდე, ქვეყანაში აიცრა 131 080 ადამიანი, რომელთაგან 94 560-მა პირველი დოზა მიიღო, 36 520-მა კი – მეორეც.

ეს საერთო მონაცემებია, რომელშიც შედიან როგორც სომხეთის მოქალაქეები, ისე უცხოელები. ძირითადად, ეს ირანელები არიან, რომელთათვისაც სომხეთი ძირითად ტურისტულ მიმართულებად იქცა ვაქცინაციის მიზნით.

• კორონავირუსის საწინააღმდეგო ვაქცინაცია – ქუჩაში, ქალაქის ცენტრში. ვიდეო ერევნიდან
• ერევნის ფესტივალი „ღვინის დღეები“ კრიტიკისა და პროტესტის მიუხედავად მაინც გაიმართა

რატომ იცრებიან ირანელები სომხეთში

სომხეთის ჯანდაცვის სამინისტრო არ აწარმოებს ცალკეულ სტატისტიკას უცხოელების ვაქცინაციასთან დაკავშირებით. სურათს ნათელი ეფინება მონაცემებით, რომელსაც ტურიზმის კომიტეტი აქვეყნებს.

ამრიგად, 2021 წლის მარტში, სომხეთში ირანის 4953 მოქალაქე ჩავიდა, ივნისში კი მათი რიცხვი თითქმის გაორმაგდა და 8597 ადამიანი შეადგინა.

საქმე ისაა, რომ ირანის მცხოვრებლებს საკუთარ ქვეყანაში ვაქცინაციის პრობლემა აქვთ. უფასოდ აცრა ახლა მხოლოდ რისკჯგუფში შემავალ ადამიანებს – 60 წელზე უფროსი ასაკის მოქალაქეებსა და ქრონიკულად დაავადებულებს შეუძლიათ. დანარჩენებს კიდევ მინიმუმ 5 თვე მოუწევთ მოცდა.

გარდა ამისა, ირანში მხოლოდ ერთი პრეპარატით ცრიან – თანაც, ადგილობრივი წარმოების. ბრიტანულ-შვედური ვაქცინა AstraZeneca, რუსული Sputnik V ან ჩინური CoronaVac-ი, რომელიც ჯანდაცვის მსოფლიო ორგანიზაციის მიერ არის დაშვებული, ირანში არ გამოიყენება. და მათაც, ვინც ირანში იცრებიან, არ აძლევენ შესაბამის საერთაშორისო სერტიფიკატს.

უცხოელების ვაქცინაცია სომხეთში

პოლიკლინიკებში რიგების თავიდან არიდების მიზნით, უცხოელების ვაქცინაცია ახლა მხოლოდ ერევნის ქუჩებში განთავსებულ ვაქცინაციის მობილურ პუნქტებში ტარდება.

უცხოელებს მხოლოდ AstraZeneca-ს ვაქცინით ცრიან – დღეში 50-მდე ადამიანს.

მოძრავ პუნქტებთან ადამიანების თავშეყრის თავიდან არიდების მიზნით, ჯანდაცვის სამინისტრომ წინასწარი ელექტრონული ჩაწერის სისტემა აამოქმედა. თანაც, მასში ცალ-ცალკე არის გათვალისწინებული ვაქცინირების მსურველთა 3 ჯგუფი.

• სომხეთის რესპუბლიკის მოქალაქეები
• ისინი, ვისაც სომხეთის ბინადრობის ნებართვა აქვთ
• უცხო ქვეყნის მოქალაქეები

სისტემა ვაქცინაციის საათის დანიშვნისას, პრიორიტეტს ანიჭებს და პირველ რიგში არეგისტრირებს სომხეთის მოქალაქეებს, იმის მიუხედავად, როდის ჩადგნენ ისინი რიგში, შემდეგ მათ, ვისაც ბინადრობის ნებართვა აქვთ და სულ ბოლოს – უცხოელებს.

იქნება საკმარისი ვაქცინები

დაავადებათა კონტროლისა და პროფილაქტიკის ეროვნული ცენტრის გენერალური დირექტორი და იმუნიზაციის ეროვნული პროგრამის ხელმძღვანელი გაიანე სააკიანი განმარტავს, რატომ მიიღეს უცხოელების ვაქცინირების გადაწყვეტილებაც.

მისი თქმით, პირველ რიგში გადაწყვეტილება მიიღეს იმის გამო, რომ ჯანდაცვის სამინისტროში უამრავი მიმართვა შედიოდა უცხოელების მხრიდან, რომლებიც დიპლომატიურ მისიებსა და სხვა საერთაშორისო ორგანიზაციებში მუშაობენ. თანაც, ეპიდემიოლოგიური სიტუაციის გამო, მათ არ შეეძლოთ სომხეთის დატოვება და ვაქცინაციის საკუთარ ქვეყნებში გავლა.

„თავიდან ეს ჩვენთვისაც აუცილებელი იყო, იმიტომ რომ, სომხეთი გარკვეულწილად განსხვავდება სხვა ქვეყნებისგან. ჩვენთან ვაქცინირების ბევრი მსურველი არ იყო, ადამიანები საკმაოდ პასიურები იყვნენ. ამავდროულად, ვაქცინირება სურდა ბევრ უცხოელს, რომლებიც ხანგრძლივი კონტრაქტებით მუშაობენ ჩვენთან. მათი აცრით, ჩვენ კონტროლს ვინარჩუნებდით ქვეყანაში არსებულ ეპიდემიოლოგიურ სიტუაციაზე“, – ამბობს გაიანე სააკიანი.

ამასთან, ირწმუნება, რომ არ არსებობს ნერვიულობის მიზეზი იმაზე, რომ ვაქცინები შეიძლება ამოიწუროს. სამინისტრო ყოველდღიურად ატარებს მონიტორინგს, ითვლის გახარჯულ დოზებს და მოლაპარაკებებს აწარმოებს მწარმოებლებთან, რათა გარანტირებული ჰქონდეს ვაქცინების აუცილებელი რაოდენობა. ასე რომ, სომხეთის მოქალაქეებს არ შეექმნებათ აცრის პრობლემა უცხოელების მიერ მიღებული ვაქცინების გამო.

ვაქცინაცია სახელმწიფო ბიუჯეტის ხარჯზე

თუკი წინა თვეებში, სახელმწიფომ უცხო ქვეყნის მოქალაქეების სახელმწიფოს ბიუჯეტის ხარჯზე აცრის გადაწყვეტილება წარმოადგინა, როგორც ჰუმანიტარული ნაბიჯი, დღეს უკვე ამ ნაბიჯის ეკონომიკურ ეფექტიანობაზე საუბრობენ.

ჯანდაცვის მინისტრის ბრძანებით, 15 ივლისიდან, სომხეთში უფასოდ აცრა შეეძლებათ მხოლოდ იმ უცხოელებს, რომლებმაც ქვეყანაში, სულ მცირე, 10 დღე გაატარეს.

ასე მთავრობა ტურიზმის სფეროს რეაბილიტაციას ცდილობს, რომელიც ყველაზე მეტად დაზარალდა კორონავირუსისგან.

„ტურიზმის სფეროს მაჩვენებელი შეიძლება 319%-ით გაიზარდოს. ახლა კარგი დროა სამედიცინო ტურიზმზე ფიქრისთვის“, – განაცხადა ეკონომიკის მინისტრის მოვალეობის შემსრულებელმა ვაან ქერობიანმა.

ეკონომისტები განმარტავენ: სომხეთის ხელისუფლება 20-30 დოლარს ხარჯავს ერთი დოზა ვაქცინის შესაძენად, იმ დროს, როდესაც ტურისტი სომხეთში, საშუალოდ, დღეში 70-100 დოლარს ხარჯავს.

ამ გამოთვლის შეჯამებისას, უნდა გავითვალისწინოთ, რომ ეს უცხოელები სომხეთში ორი თვის შემდეგ უნდა დაბრუნდნენ ვაქცინის მეორე დოზის მისაღებად.