მასშტაბური პროტესტი თბილისში. აქციაზე 14 პირი დააკავეს
მასშტაბური პროტესტი თბილისში
თბილისში 15 აპრილს „უცხოური გავლენის გამჭვირვალობის შესახებ“ კანონპროექტის წინააღმდეგ მასშტაბური აქციები გაიმართა. პარლამენტის შენობასთან საპროტესტო აქციები დილის 10 საათიდან დაიწყო. საღამოს 19:00 საათზე კი ათასობით ადამიანი შეიკრიბა. პარლამენტის მიმდებარედ აქციის მონაწილეების ნაწილი მთელი ღამის განმავლობაში დარჩა.
შინაგან საქმეთა სამინისტროს განცხადებით, პროტესტის მიმდინარეობისას 14 ადამიანი დააკავეს პოლიციის დაუმორჩილებლობის გამო.
პროტესტის მიუხედავად, გვიან საღამოს საქართველოს პარლამენტის იურიდიულმა კომიტეტმა კანონპროექტს მხარი დაუჭირა. კანონპროექტს პარლამენტის პლენარულ სხდომაზე 16 აპრილს 12 საათზე გაიტანენ, რომ პირველი მოსმენით უყარონ კენჭი.
- საქართველოს პრემიერმინისტრი აშშ-სა და ევროკავშირის ქვეყნების ელჩებს რუსულ კანონზე საჯარო დისკუსიას სთავაზობს
- რაში დასჭირდა “ქართულ ოცნებას” აგენტებზე რუსული კანონის დაბრუნება? ექსპერტების შეფასებები
იურიდიულ კომიტეტზე მოსმენისას კანონპროექტის ავტორმა, უმრავლესობის წევრმა, მამუკა მდინარაძემ განაცხადა, რომ ამ კანონპროექტის თვითმიზანი გამჭვირვალობა არ არის და მისი მიღების შემდეგ არასამთავრობო ორგანიზაციები, მედიები იმ საქმით დაკავდებიან, რაც ყველასთვის მოსაწონი იქნება: მთავრობისთვის, დონორებისთვის და ხალხისთვის.
“იცი რა იქნება ყველას მოსაწონი საქმე? რომ მთავარია ხალხის მოასწონი საქმე იქნება, რომ ექსტრემიზმით კი არ დაკავდებით, დაკავდებით რეალური საქმით, რაც თქვენი საქმეა. მთავრობის გადაყენებას კი არ მოითხოვთ, მოითხოვთ უფლებრივ მდგომარეობაზე მუშაობას და რაც თქვენი საქმეა იმით დაკავდებით. ეკლესიის წინააღმდეგ კი არ იბრძოლებთ, თქვენი საქმით დაკავდებით, ლგბტ პროპაგანდას კი არ დააფინანსებთ, თქვენი საქმით დაკავდებით. ჩემი მოსაწონი კი არ არის, ჩემი მოსაწონიც არის მათ შორის, დონორის მოსაწონიც გახდება და ხალხის მოსაწონიც გახდება მათ შორის, ამის პრევენცია იქნება, თორე თვითმიზანი ცალკეაღებული გამჭვირვალობა არ არისთქო მაგიტომ გითხარით”, – მიმართა მდინარაძემ მოსმენაზე მყოფ არასამთავრობო ორგანიზაციების წარმომადგენლებს.
