საქართველოში მორიგი "რუსული კანონის" მიღებას აპირებენ. ამჯერად საუბარია "ლგბტქ პროპაგანდის" აკრძალვაზე
“ლგბტქ პროპაგანდის” აკრძალვა
საქართველოს პარლამენტში პრორუსული ძალების მიერ ინიციირებული მორიგი კანონპროექტის განხილვას იწყებენ.
ამჯერად, საქმე ეხება ე.წ. „ლგბტ პროპაგანდის“ აკრძალვას.
კანონპროექტების პაკეტი პრორუსულმა, ჰომოფობიურმა პოლიტიკურმა პარტიამ „კონსერვატიულმა მოძრობამ” ტელეკომპანია „ალტ-ინფოს” წამყვანებთან ერთად მოამზადა.
პროექტის თანახმად, ცვლილება უნდა შევიდეს „შეკრებებისა და მანიფესტაციების შესახებ“ კანონში და ჩაიწეროს, რომ იკრძალება „სექსუალური ორიენტაციის პროპაგანდა“.
კანონპროექტში ვკითხულობთ:
1. „აკრძალულია შეკრებისა და მანიფესტაციის ჩატარება, თუ იგი მიზნად ისახავს ან რომლის დროსაც შესაძლოა, ადგილი ჰქონდეს სექსუალური ორიენტაციის დემონსტრირებას, პოპულარიზაციას ან/და პროპაგანდას.
2. აკრძალულია შეკრების ან მანიფესტაციის ჩატარება, თუ იგი მიზნად ისახავს ან რომლის დროსაც შესაძლოა, ადგილი ჰქონდეს რომელიმე რელიგიური მიმდინარეობის საწინააღმდეგო, მადისკრედიტირებელ ან/და რომელიმე რელიგიური მიმდევრობის ადამიანთა რწმენის საწინააღმდეგო, შეურაცხმყოფელ განცხადებებსა და მოწოდებებს ან/და რომლის დროსაც შესაძლოა, ადგილი ჰქონდეს ომისა და ძალადობის პროპაგანდას, ეროვნული, კუთხური, რელიგიური ან სოციალური შუღლის გაღვივებას“.
ცვლილების თანახმად, კანონის დარღვევა გამოიწვევს დაჯარიმებას 3 ათასი ლარით ან ადმინისტრაციულ პატიმრობას 25 დღემდე. ორგანიზატორი კი დაჯარიმდება 5000 ლარით, ან 30 დღემდე ადმინისტრაციული პატიმრობით.
მმართველი გუნდის პოზიცია
მართალია, კანონპროექტი “ქართული ოცნების” მიერ არ არის ინიცირებული, თუმცა ეჭვი არავის ეპარება, რომ ეს მმართველი გუნდის მიერ მხარდაჭერილი იდეაა. “უცხოური აგენტების შესახებ” კანონის მსგავსად, ინიციატივა პროსახელისუფლებო, პრორუსული ძალებიდან წამოვიდა.
ხელისუფლების მხარდაჭერაზე მიუთითებს ის განცხადებები, რომლებსაც უმრავლესობის დეპუტატები აკეთებენ და ასევე სამთავრობო არხებზე დაწყებული ღია პროპაგანდა აღნიშნული კანონპროექტის სასარგებლოდ.
ბოლო ორი დღის განმავლობაში ტელეკომპანია „იმედმა“ ორი ვრცელი სიუჟეტი დაუთმო საკუთარ ეთერში აშშ-ში ჩატარებულ სოციოლოგიურ კვლევას, რომლის თანახმად, აშშ-ში გაზრდილია იმ ადამიანების რიცხვი, რომლებიც საკუთარ თავს ლგბტქ თემს მიაკუთვნებენ.
1 მაისს ამ თემაზე სიუჟეტი ანალიტიკურ გადაცემა „იმედის კვირაში“ გავიდა და იქ საუბარი იყო აშშ-ში ლგბტქ წინააღმდეგ მოძრაობაზე. მეორე სიუჟეტში კი, რომელიც მეორე დღეს – 2 მაისს გავიდა იმედის საინფორმაციო გამოშვებაში, უკვე „ქართული ოცნების“ დეპუტატები გამოჩდნენ, რომლებიც შეშფოთებას გამოხატავდნენ კვლევის შედეგების გამო.
„ძალიან სერიოზული საკითხია უფლებების დაცვისა და პროპაგანდის გამიჯვნა. ჩვენც უნდა გავმიჯნოთ ლგბტ პროპაგანდა და ლგბტ ადამიანების უფლებების დაცვა…როგორც აღმოჩნდა, ძალიან ავტორიტეტული ორგანიზაციის კვლევაში, პროპაგანდას მოაქვს ასეთი შედეგები, რომ რაოდენობა შეიძლება იზრდებოდეს ამის გამო“, – ამბობს სიუჟეტში „ქართული ოცნების“ აღმასრულებელი მდივანი მამუკა მდინარაძე.
ხელისუფლების მხარდაჭერაში დარწმუნებულია ულტრა მემარჯვენე, კრემლის მხარდამჭერი მოძრაობის ერთ-ერთი ლიდერი, კონსტანტინე მორგოშია, კანონპროექტის ერთ-ერთი ინიციატორი, რომელიც თავის ფეისბუკ-გვერდზე წერს, რომ აქვს „უტყუარი ინფორმაცია“ „ქართული ოცნების” მხარდსაჭერის შესახებ.
„მაქვს უტყუარი ინფორმაცია, რომ “ქართული ოცნება”, პარტნიორი პარტიების მეშვეობით მიიღებს ყველა იმ კანონს, რომლის მიღებასაც, ჩვენ წლებია ვითხოვთ და ვიბრძვით!!! მათ შორის კანონს გეი-პროპაგანდის წინააღმდეგ!!! ეს ამბავი ძალიან მახარებს, სჯობს გვიან ვიდრე არასდროს!!! ყოველთვის ვამბობდი და ახლაც გავიმეორებ, 5 ივლისი იყო ქართველი ხალხის უდიდესი გამარჯვება და ლიბერალიზმის დასასრულის დასაწყისი საქართველოში!!!” – აღნიშნულია მორგოშიას პოსტში.
მორიგი რუსული კანონი
აღნიშნულ ინიციატივას საზოგადოების ნაწილმა უკვე დაარქვა “მორიგი რუსული კანონი”, რომლის მიღებასაც ცდილობს “ქართული ოცნება”.
შეგახსენებთ, რომ მარტის დასაწყისში მმართველი ძალის სატელიტმა პარტიამ “ხალხის ძალამ” პარლამენტში “უცხოური გავლენების შესახებ კანონპროექტი” დააინიცირა, რომელიც რუსეთში წლების წინ მიღებული კანონის ანალოგი იყო. კანონპროექტს მხარი დაუჭირა “ქართულმა ოცნებამ” – იგი პირველი მოსმენით მიიღეს. თუმცა, რამდენიმედღიანი მასშტაბური პროტესტების შემდეგ ხელისუფლება იძულებული გახდა უკან დაეხია.
“ლგბტქ პროპაგანდის” ამკრძალავი კანონი რუსეთში 2013 წლიდან მოქმედებს. თუმცა, გასული წლის ბოლოს კანონმდებლობა იქ კიდევ უფრო გამკაცრდა. პუტინმა ხელი მოაწერა კანონს, რომელიც კრძალავს „არატრადიციული სექსუალური ურთიერთობების პროპაგანდას, პედოფილიას და სქესის შეცვლას“.
ჯერ კიდევ კანონის ძალაში შესვლამდე დაავალდებულეს წიგნების მაღაზიები გაყიდვიდან ამოეღოთ წიგნები, რომლებიც, შესაძლოა, არღვევდეს აღნიშნულ კანონს. ანალოგიური დავალება მიიღეს ბიბლიოთეკებმა. ხოლო, იმ რესურსებმა, სადაც ვიდეოპროდუქციაა განთავსებული, ფილმებსა და სერიალებში უნდა დააცენზურონ ის მონაკვეთები, რომლებიც შესაძლოა “ლგბტქ პროპაგანდას” შეიცავდეს.
შეფასებები
პოლიტიკური კომენტატორების ნაწილი დარწმუნებულია, რომ “ქართული ოცნება” ევროკავშირთან ინტეგრაციის საბოტაჟს აგრძელებს და აღნიშნული კანონიც ამ გეგმის ნაწილია.
ჟურნალისტი მერაბ მეტრეველი წერს ფეისბუკზე, რომ თუ “ლგბტ პროპაგანდის წინააღმდეგ” კანონი მართლა მიიღეს, უკვე ყოველგვარი მცირე ეჭვის გარეშეც შეგვეძლება ვთქვათ, რომ თავის დროზე ნიკა გვარამიას დაკავება და მერე “აგენტების შესახებ” კანონის მიღებაც მხოლოდ ერთ მიზანს ემსახურებოდა: ევროპას არ მოეცა ჩვენთვის კანდიდატის სტატუსი”.
ჟურნალისტი მიიჩნევს, რომ ამ კანონის ინიცირებით ხელისუფლება ორი კურდღლის დაჭერას აპირებს:
“ერთი, რომ მათი აზრით, ლგბტ-ს დასაცავად არვინ გამოვა და ამ კანონით მაინც ჩაშლიან კანდიდატის სტატუსის მიღებას… და მეორე – უკვე ფაქტად იქცევა ის, რომ ევროპა გეების გამო არ გვიღებს და კიდევ უფრო მეტად მოახდენენ დასავლეთის დისკრედიტაციას”.
“ჰომოფობია, როგორც პოლიტიკური ნაძირლების უკანასკნელი თავშესაფარი,” – ასე ეხმაურება აღნიშნულ ინიციატივას პოლიტიკური მიმომხილველი დავით ზურაბიშვილი.
მისი თქმით, თუ ხელისუფლება აღნშნული კანონის მირებას ახლავე შეეცდება, ეს “ცალსახად იქნება კანდიდატის სტატუსის საბოტაჟი.
“ამის მიზეზი კი შეიძლება იყოს მხოლოდ ერთი: პირდაპირი დავალება მოსკოვიდან. ყველა სხვა ვარიანტი გამორიცხულია”.
თუმცა, ექსპერტი პროგნოზირებს, რომ “ოცნება” კანონის მიღებას ამ კონკრეტულ მომენტში არ აპირებს. ის შეეცდება მოსინჯოს ნიადაგი, დააკვირდეს ხალხის რეაქციას, კანონის მიღებას კი მხოლოდ წინასაარჩევნოდ, ანუ 2024 წლისთვის შეეცდება.
“ამ, მათი აზრით, ჯოკერის გათამაშებას, წინასაარჩევნოდ დააპირებენ იმ გათვლით, რომ ოპოზიცია, სამოქალაქო საზოგადოება და სრულიად დასავლეთი “გლობალური გა**დარასტების პარტიად” და მათ აგენტურად წარმოაჩინონ, რაც, მათი აზრით, გამარჯვების უტყუარი გარანტია გახდება”.
“დარწმუნებული ვარ, რომ როგორც ერთ, ისე მეორე შემთხვევაში, ხელისუფლებას ელის სრული კრახი. მარტის დღეებში ის ასიათასობით ადამიანი რუსთაველზე ენჯეოების ფინანსური ინტერესების დასაცავად კი არ გამოსულა, არამედ ყველამ ცხადლივ დაინახა, რომ აგენტებზე კანონის მიღება ნიშნავდა ევროპულ ორიენტაციაზე უარს და რუსეთის გავლენის სფეროში გადასვლას, – აღნიშნავს ექსპერტი, – ქვეყნის სტრატეგიული ინტერესების ღალატის მცდელობაზე კი ქართველ ხალხს ყოველთვის სათანადო რეაქცია ექნება, როგორც არ უნდა შეფუთონ იგი”.
