სამთავრობო მედიის ცნობით, ირაკლი კობახიძე საქართველოს პრემიერი ხდება, ღარიბაშვილი "ქართული ოცნების" თავმჯდომარე
გაზიარება
გაზიარება
კობახიძე საქართველოს პრემიერი ხდება
სამთავრობო მედია TV იმედის ინფორმაციით, “ქართული ოცნების” მოქმედ თავმჯდომარეს, ირაკლი კობახიძეს პრემიერმინისტრის თანამდებობაზე წარადგენენ, ხოლო მოქმედი პრემიერი ირაკლი ღარიბაშვილი მმართველი პარტიისთავმჯდომარის თანამდებობას დაიკავებს. ასევე, ირაკლი კობახიძე პარტიის პოლიტიკური მდივნის პოსტს დაიკავებს.
ტელეკომპანიის ცნობით, 24 იანვარს ჩატარებულ “ქართული ოცნების” პოლიტსაბჭოს სხდომაზე გადაწყდა, რომ პირველ თებერვალს პარტიის ყრილობა გაიმართება.
“ჩვენი ინფორმაციით, პარტიის მოქმედი თავმჯდომარე ირაკლი კობახიძე პრემიერმინისტრის პოსტზე იქნება წარდგენილი, ხოლო მოქმედი პრემიერმინისტრი ირაკლი ღარიბაშვილი პარტიის თავმჯდომარის პოსტს დაიკავებს.
გარდა ამისა, ირაკლი კობახიძე ასევე დაიკავებს პარტია ქართული ოცნების პოლიტიკური მდივნის პოსტს”, – წერს იმედი.
ირაკლი ღარიბაშვილმა მთავრობის მეთაურის თანამდებობა ორჯერ დაიკავა. პრემიერმინისტრის პოსტზე პირველად 2013 წელს დაინიშნა, თუმცა ის ორ წელში, 2015 წელს მოულოდნელად დატოვა.
შემდგომში ის ამავე თანამდებობაზე 2021 წლის 18 თებერვალს აქამდე მოქმედი პრემიერმინისტრის, გიორგი გახარიას გადადგომის შემდეგ წარადგინეს. მანამდე ღარიბაშვილი ჯერ პარტიის გენერალურ მდივნად, შემდეგ თავდაცვის მინისტრად დაინიშნა, 23 თებერვალს კი პრეზიდენტმა სალომე ზურაბიშვილმა ღარიბაშვილის საქართველოს პრემიერმინისტრად დანიშვნის შესახებ განკარგულებას ხელი მოაწერა.
მოსალოდნელ სამთავრობო ცვლილებებზე ექსპერტები ბიძინა ივანიშვილის პოლიტიკაში მეორედ მობრუნების შემდეგ საუბრობდნენ.
2012 წელს “ქართული ოცნების” საპარლამენტო არჩევნებში გამარჯვების შემდეგ, პარტიის დამფუძნებელი ბიძინა ივანიშვილი საქართველოს პრემიერმინისტრად აირჩიეს. თანამდებობა მან 2013 წლის ნოემბერში დატოვა. ხუთი წლის შემდეგ, 2018 წელს პოლიტიკაში კვლავ დაბრუნდა და “ქართული ოცნების” თავმჯდომარე გახდა. 2018 წელიც არჩევნების წელი იყო – ქვეყანაში საპრეზიდენტო არჩევნები ტარდებოდა. 2021 წელს მან პოლიტიკიდან წასვლის შესახებ განაცხადა.
ოპოზიციასა და სამოქალაქო სექტორში მიაჩნიათ, რომ ბიძინა ივანიშვილი რეალურად პოლიტიკიდან არ წასულა და ამ დროის განმავლობაში პარტიას კულისებიდან მართავდა და ქვეყანაში მნიშვნელოვანი გადაწყვეტილებებს სწორედ ის იღებდა.
2024 წელს საქართველოში მნიშვნელოვანი საპარლამენტო არჩევნებია.
