კელი დეგნანი ივანიშვილთან შეხვედრას ადასტურებს: "არასოდეს ყოფილა საუბარი საქართველოს ომში ჩართვაზე"
კელი დეგნანი ივანიშვილთან შეხვედრას ადასტურებს
ამერიკის ელჩი საქართველოში კელი დეგნანი ადასტურებს ბიძინა ივანიშვილთან შეხვედრას და ამბობს, რომ მათ შორის არასოდეს ყოფილა საუბარი საქართველოს ომში ჩართვაზე. ამის შესახებ ელჩმა ინტერპრესნიუსისთვის მიცემულ ინტერვიუში განაცხადა.
როგორც დეგნანი ამბობს, მმართველი პარტიის დამფუძნებელს, ბიძინა ივანიშვილს 21 მარტს შეხვდა და მათი შეხვედრები ყოველთვის ეხებოდა აშშ-საქართველოს სტრატეგიული პარტნიორობას და აშშ-ის ძალისხმევას საქართველოს ეკონომიკის, უსაფრთხოებისა და დემოკრატიის განვითარების მხარდაჭერას.
“მოდით ძალიან მკაფიოდ ვიტყვი, რომ აღარავის დარჩეს შეკითხვები – არასოდეს ყოფილა საუბარი საქართველოს ჩართვაზე უკრაინის წინააღმდეგ რუსეთის ომში, ან „შანტაჟზე“ ან მოქმედებებზე, რაც უკავშირდება ბ-ნ ივანიშვილისთვის ფულის გადარიცხვის შეფერხებას. ამ საკითხებზე მას ან იმ კონკრეტულ ბანკებს უნდა მიმართოთ”, – აღნიშნა ელჩმა.
მისივე თქმით, იმ ადამიანების სია, ვინც სანქცირებულია საჯაროა და ასევე, სახაზინო დეპარტამენტის ვებსაიტზე არის საძიებო სია, სადაც ბანკებს, მედიას და ფართო საზოგადოებას შეუძლიათ შეამოწმონ, ვინ ექვემდებარება და არ ექვემდებარება ფინანსურ სანქციებს. დეგნანის განმარტებით, შვეიცარიის საბანკო ანგარიშების ნებისმიერი განხილვა, არის ყურადღების გადატანა მნიშვნელოვანი სამუშაოდან:
“როგორც ბ-ნმა ივანიშვილმა 27 ივლისის განცხადებაში აღნიშნა, ეს არის კერძო საქმე მასსა და ფინანსურ ინსტიტუტს შორის”.
კელი დეგნანი კიდევ ერთხელ აკონკრეტებს, რომ დასავლეთს არასოდეს უცდია “საქართველოს ომში ჩათრევა”, რადგან მათ ამის არანაირი ინტერესი არ აქვთ.
“როგორც საქართველოს ლიდერებს თავიდანვე ვუთხარით, ჩვენ გვესმის საქართველოს მგრძნობიარე პოზიცია, გამომდინარე რუსეთის მიერ საქართველოს ტერიტორიის ოკუპაციისა და რუსეთის აგრესიის მიმართ საქართველოს საკუთარი გამოცდილების გათვალისწინებით. ისინი, ვინც ამ ნარატივს იმეორებენ, რუსეთის საქმეს აკეთებენ და ამით ცდილობენ საქართველოს დაყოფას მისი დემოკრატიული განვითარების კრიტიკულ მომენტში”, – თქვა დეგნანმა.
საქართველოში ამერიკის ელჩმა ისაუბრა პოლარიზაციის შესახებაც და აღნიშნა, რომ საქართველოს ევროპულ მომავალს პოლიტიკოსები აფერხებენ.
მისივე განმარტებით, მან რეგიონებში ადამიანებთან შეხვედრის დროს გაიგო, რომ ისინი იმედგაცრუებულები არიან პოლარიზების გამო. როგორც დეგნანი ამბობს, საქართველოს მოქალაქეების დიდმა უმრავლესობამ აირჩია ევროპული მომავალი, “უფრო დემოკრატიული, უფრო აყვავებული, უფრო უსაფრთხო მომავალი” და ამ მომავალს აფერხებენ პოლიტიკური ლიდერები, რომლებიც უფრო მეტ დროს ხარჯავენ ერთმანეთზე თავდასხმაზე, ვიდრე საქართველოს მოსახლეობისთვის მნიშვნელოვან საკითხებზე მუშაობაზე:
“როგორიცაა, მაგალითად, უმუშევრობის მაღალია მაჩვენებელი, გაზრდილი ფასები და განათლება. საქართველოს პოლიტიკურმა ლიდერებმა საქართველოს გზა ევროკავშირისაკენ და ქვეყნის საუკეთესო ინტერესები მათ პარტიულ უთანხმოებაზე წინ უნდა დააყენონ.”
მანვე აღნიშნა, რომ ერთიანობა საუკეთესო გზაა წინსვლისთვის, პოლარიზების შემცირება კი ერთ-ერთია იმ 12 პუნქტს შორის, რომელიც საქართველომ ევროკავშირისგან რეკომენდაციების სახით მიიღო იმისთვის, რომ მიიღოს წევრობის კანდიდატის სტატუსი.
“როგორც არაერთხელ ვთქვით, მნიშვნელოვანია, რომ საქართველოს ლიდერებმა გვერდზე გადადონ უთანხმოება და გაერთიანდნენ საქართველოს ხალხის ევროატლანტიკური მომავლის სახელით. იმედი მაქვს, რომ გამჭვირვალე, ინკლუზიური პროცესების მეშვეობით, სამოქალაქო საზოგადოების რეკომენდაციების ჩართულობით, მმართველი პარტია და ოპოზიციური პარტიები შეიმუშავებენ კონკრეტულ, პრაქტიკულ წინადადებებს, რომლებიც შეესაბამება ევროკავშირის რეკომენდაციებს.” – ამბობს ელჩი.
წერილში, რომელიც საქართველოს ყოფილმა პრემიერმინისტრმა და “ქართული ოცნების” თავმჯდომარემ გუშინ გამოაქვეყნა, ნათქვამია, რომ იგი საქართველოში ამერიკის შეერთებული შტატების ელჩს, კელი დეგნანს შეხვდა.
როგორც ივანიშვილი განმარტავს, შეხვედრა ელჩის თხოვნით, 21 მარტს შედგა და ის „დაახლოებით სამ საათს გაგრძელდა“. წერილში საუბარია ასევე იმაზე, რომ არსებობენ გარკვეული ძალები, რომელიც “საქართველოს ომში ჩართვას ცდილობენ.”
ბიძინა ივანიშვილის განმარტებით, პოლიტიკიდან წელიწადნახევრის წინ გავიდა და მას შემდეგ, ამ გადაწყვეტილებას სრულად იცავდა და იცავს. ასევე, ივანიშვილი პირდაპირ მიანიშნებს, რომ შვეიცარიულმა ბანკმა მას პრობლემები იმის გამო შეუქმნა, რომ საქართველო არ ჩაერთო ომში.
მიუხედავად იმისა, რომ ეს ივანიშვილის პირველი საჯარო განცხადებაა უკრაინაში ომის დაწყების შემდეგ, თავად ომს და რუსეთის აგრესიას იგი წერილში არ ეხება და არ აფასებს. “რეგიონში არსებული ურთულესი პოლიტიკური ვითარება” – ასე აფასებს იგი მოვლენებს.
ბიძინა ივანიშვილი პოლიტიკიდან მეორედ 2021 წლის 11 თებერვალს, მოგებული საპარლამენტო არჩევნების შემდეგ [რომელსაც ოპოზიციამ ბოიკოტი გამოუცხადა] წავიდა – როგორც თავად ამბობს, ახლა უკვე საბოლოოდ. პოლიტიკიდან წასვლის მთავარი მიზეზი, მისი თქმით, არის ის, რომ “მის მიერ დეკლარირებული თითქმის ყველა მიზანი მიღწეულია”.
ივანიშვილი ყველაზე მდიდარი ქართველია. მის ქონებას „ფორბსი“ 4.8 მილიარდი დოლარად აფასებს.
