ჯაშუშური სკანდალი სომხეთში: სომეხ ოფიცრებს სოციალური ქსელების საშუალებით იბირებდნენ

სომხეთის ეროვნული უსაფრთხოების სამსახურმა განაცხადა, რომ გამოვლენილი და განეიტრალებულია ჯაშუშური ქსელი, რომელიც ქვეყნის ტერიტორიაზე მოქმედებდა. იტყობინებიან, რომ მასში ათობით სომეხი სამხედრო მოსამსახურე იყო ჩართული. 19 ადამიანი უკვე დაკავებულია, მათმა ნაწილმა აღიარებითი ჩვენება უკვე მისცა.

როგორც სომხეთის ეროვნული უსაფრთხოების სამსახურის განცხადებაშია ნათქვამი, ქსელი უცხოური სპეცსამსახურების მიერ იყო შექმნილი. უწყების პრესსამსახურის მიერ გავრცელებული ვიდეოში, ერთ-ერთი ოფიცერი თავის ჩვენებაში აზუსტებს რომ, Facebook-ში გაიცნო „აზერბაიჯანის სპეცსამსახურების თანამშრომლები“.

ყველაფერი, რაც ცნობილია იმის შესახებ, თუ როგორ იბირებდნენ სამხედროებს და რა ინფორმაციის მიღებას ცდილობდნენ – სომხეთის ეროვნული უსაფრთხოების პრესსამსახურის ინფორმაციით.

• „ფაშინიანი პოლიტიკოსია და არა მოსე“: კომენტარი პრემიერის განცხადებაზე
• ფაშინიანმა ევროსასამართლოში „სომხეთის წინააღმდეგ“ საქმე მოიგო
• სომხეთ-თურქეთის მოლაპარაკებები: ძველი დღის წესრიგი ახალ რეალობაში. რას უნდა ველოდოთ?

ოფიცრებს „სომეხი გოგოები“ იბირებდნენ

სომხეთის ეროვნული უსაფრთხოების სამსახურის ინფორმაციაში აღწერილია, როგორ შეიქმნა ჯაშუშური ქსელი. ნათქვამია, რომ გამოაშკარავების რისკის შესამცირებლად, სოციალურ ქსელებში შექმნილი იყო ვითომ სომეხი ქალების ანგარიშები – პირადი ფოტოსურათებით – რომლებიც სომეხ ოფიცრებს „ეცნობოდნენ“.

უცხოური სპეცსამსახურების ყველა თანამშრომელი სომხურად თავისუფლად ლაპარაკობდა, ეს „ქსელური ნაცნობობა ახლო ურთიერთობაში გარდაისახებოდა“. შემდეგ, გარკვეული ანაზღაურების სანაცვლოდ, სამხედროებს სთავაზობდნენ მიეწოდებინათ ინფორმაცია სომხეთის შეიარაღებული ძალების შესახებ.

კერძოდ, საუბარია ჯარების განლაგებაზე, სამხედრო და საინჟინრო ტექნიკის რაოდენობასა და ტიპზე, სამხედრო ნაწილების პირად შემადგენლობასა და მეთაურობაზე, თავდაცვითი შეიარაღების განლაგებაზე.

სპეცსამსახურების ყურადღება მიიპყრეს სომეხმა სამხედროებმა, რომლებსაც, თავიანთი თანამდებობრივი სტატუსის წყალობით, ამგვარ ინფორმაციაზე ჰქონდათ წვდომა. გადაბირებულები მათთვის ცნობილი ინფორმაციის გადაცემასთან ერთად, მოიპოვებდნენ დამატებით ინფორმაციასაც, რომელიც მათთან დაკავშირებულ სპეცსამსახურების თანამშრომლებს აინტერესებდათ. მონაცემები მობილური აპლიკაციების მეშვეობით გადაიცემოდა.

სომხეთის ეროვნული უსაფრთხოების სამსახური აგენტურულ ქსელში ჩართული სომხეთის მოქალაქეების ქცევას აფასებს, როგორც „მოღალატეობრივ საქმიანობას თავისი სახელმწიფოს მიმართ“.

„ბრალდებები უსაფუძვლო არ არის“

უწყებიდან იტყობინებიან, რომ გადაბირებული ოფიცრების ვინაობა დადგენილ იქნა „მასშტაბური ოპერატიული მოქმედებების ფარგლებში“. ესენი არიან სამხედროები, რომლებსაც შეიარაღებულ ძალებში სხვადასხვა თანამდებობა ეკავათ, წვდომა ჰქონდათ სხვადასხვა სახელმწიფო და სამსახურებრივი საიდუმლოების შემცველ დოკუმენტზე. სახელმწიფო უსაფრთხოების სამსახური ირწმუნება, რომ გამოვლენილია გადაცემული ინფორმაციის მოცულობა და ხასიათი, ახალი მონაცემების გადაცემა კი თავიდან არის აცილებული.

სომხეთის ეროვნული უსაფრთხოების განცხადებაში ნათქვამია, რომ არსებობს ყველა მტკიცებულება უცხოურ სპეცსამსახურებთან  „ანაზღაურების სანაცვლოდ აგენტურული ქსელის თანამშრომლობისა, რომლის მტრული საქმიანობა მიმართული იყო სომხეთის სუვერენიტეტის, ტერიტორიული ხელშეუხებლობისა და საგარეო უსაფრთხოების წინააღმდეგ“. აღმოჩენილია ასევე ქვითრები, რომლებიც უცხოურ ვალუტაში ჰონორარის აღებას ადასტურებს. 

იტყობინებიან, რომ საგამოძიებო მოქმედებების მიმდინარეობისას ჩატარდა 30-ზე მეტი ჩხრეკა, გამოვლინდა და ამოღებულია ოფიციალური დოკუმენტები, მათ შორის ორიგინალები, ასევე „ნივთები, რომლებსაც არსებითი მნიშვნელობა აქვს სისხლის სამართლის საქმისათვის“.