El País: აშშ რუსეთს მოუწოდებს, გაიყვანოს ჯარები საქართველოდან და მოლდოვიდან

ჯარების გაყვანა საქართველოდან და მოლდოვიდან

2 თებერვალს, ესპანურმა გამოცემა El País-მა გამოაქვეყნა რუსეთის მოთხოვნებზე აშშ-სა და ნატოს პასუხები, სადაც შეერთებული შტატები რუსეთს მოუწოდებს, გაიყვანოს ჯარები საქართველოდან და მოლდოვიდან.

სახელმწიფო დეპარტამენტმა და აშშ-ის თავდაცვის სამინისტრომ დაადასტურეს, რომ ესპანური გამოცემის მიერ ოთხშაბათს გამოქვეყნებული მასალები აშშ-ს პასუხების ნამდვილი ასლებია, თუმცა როგორ მოხვდა ესპანურ პრესაში დოკუმენტები, რომლებზეც ამერიკის მხარემ მოსკოვს სთხოვა, რომ არ გაესაჯაროებინა, უცნობია.

● მოსკოვს „მოთმინება ამოეწურა“: როგორ მოიქცევა დასავლეთი უკრაინასთან და საქართველოსთან?
● სერგეი ლავროვი: საქართველოს NATO-ში ძალით შეყვანას ცდილობენ
● რა იქნება შემდეგ, ომი? მოკლედ იმის შესახებ, თუ რას ითხოვს მოსკოვი

რა წერია დოკუმენტში

რუსეთმა 2021 წლის დეკემბერში გამოაქვეყნა უსაფრთხოების გარანტიებზე საკუთარი მოთხოვნები. კრემლის ერთ-ერთი მთავარი მოთხოვნაა, რომ აშშ-მ და ნატომ არ დაუშვან აღმოსავლეთით ნატოს შემდგომი გაფართოება და ალიანსში ყოფილი საბჭოთა რესპუბლიკების მიღება. ასევე, უარი თქვან სამხედრო საქმიანობაზე უკრაინაში, აღმოსავლეთ ევროპის სხვა ქვეყნებში, ამიერკავკასიასა და ცენტრალურ აზიაში.

El País-ში გამოქვეყნებული დოკუმენტების მიხედვით, აშშ-მ და ნატომ კვლავ დაადასტურეს, რომ “ღია კარის” პოლიტიკას ემხრობიან – ისინი მზად არიან, რომ ნატო აღმოსავლეთის მიმართულებით გაფართოვდეს.

ასევე, სახელმწიფო დეპარტამენტის განმარტებით, აშშ ალიანსის ძალების მოცულობას მიიჩნევს რუსეთის ძალების პროპორციულად და აცხადებს, რომ აღმოსავლეთ ევროპაში არ განათავსებს დამრტყმელ ჯგუფებს და ბირთვულ შეიარაღებას – ანუ იმას, რაც მოსკოვის შეშფოთების საგანია. ალიანსის ძალების გაძლიერებას აღმოსავლეთით ვაშინგტონი უკავშირებს მხოლოდ და მხოლოდ რუსი სამხედროების კონცენტრაციას უკრაინის საზღვართან.

აღსანიშნავია ისიც, რომ დასავლეთი უგულებელყოფს მოსკოვის მოთხოვნას, რომლის მიხედვითაც ნატოს ინფრასტრუქტურის განთავსება უნდა დაუბრუნდეს 1997 წლის ნიშნულს. რუსეთის მოთხოვნაზე, ალიანსმა თავი შეიკავოს აღმოსავლეთით სამხედრო მოქმედებებისგან, ნატო ასე პასუხობს: “რუსეთმა გაიყვანოს ჯარები უკრაინის, საქართველოს და მოლდოვის ტერიტორიებიდან.”

გამოქვეყნებული დოკუმენტების მიხედვით, აშშ და ნატო მზად არიან გააგრძელონ რუსეთთან დიალოგი უსაფრთხოების საკითხებზე, თუმცა ამის მთავარ წინაპირობად ასახელებენ უკრაინის გარშემო ვითარების დეესკალაციას და უკრაინის საზღვრებიდან რუსი ჯარისკაცების გაყვანას.

ასევე, აშშ გამოდის მოწოდებით, დაიწყოს მოლაპარაკება ბირთვული შეიარაღების ახალ შეთანხმებაზე და კიევთან კონსულტაციის შემდეგ, გაიმართოს დიალოგი იმის თაობაზე, რომ უკრაინაში არ განთავსდეს სახმელეთო შემტევი რაკეტები, თუკი მოსკოვიც ანალოგიური პირობით გამოვა.

აშშ და ნატო რუსეთს სთავაზობენ დიალოგის გამართვას იარაღის კონტროლის ზომებზე იმის სანაცვლოდ, რომ მოხდება ვითარების დეესკალაცია უკრაინაში და რუსეთი ჯარებს გაიყვანს ყირიმიდან, დნესტრისპირეთიდან, ცხინვალის რეგიონიდან და აფხაზეთიდან.

● „არანაირი ნატო!“ – როგორ ჩაიარა მოლაპარაკებებმა რუსეთსა და აშშ-ს შორის
● კელი დეგნანი: საქართველოს გადასაწყვეტია ვისი პარტნიორი იქნება

უკრაინის თავდაცვის სამინისტროს მთავარი სადაზვერვო სამმართველოს ხელმძღვანელმა კირილ ბუდანოვმა 2021 წლის 21 ნოემბერს განაცხადა, რომ რუსეთი 2022 წლის იანვარ-თებერვალში უკრაინის აღმოსავლეთსა და სამხრეთზე შესაძლო თავდასხმისთვის ემზადებოდა. დაზვერვის მონაცემებით, უკრაინის საზღვრებთან 100 ათასზე მეტი რუსი სამხედროა განლაგებული. რუსმა სამხედროებმა წვრთნები დაიწყეს ბელარუსშიც.

რუსეთის პრეზიდენტის პრესმდივანმა დიმიტრი პესკოვმა უკრაინაზე თავდასხმის საფრთხის შესახებ ინფორმაციას ხელოვნურად შექმნილი ისტერია უწოდა. მისი ვარაუდით, სწორედ კიევს სურს საომარი მოქმედებების დაწყება ოკუპირებული ტერიტორიების გასათავისუფლებლად.

თუმცა, უკვე 18 დეკემბერს მოსკოვმა რიტორიკა შეცვალა. საგარეო საქმეთა მინისტრის მოადგილე ალექსანდრ გრუშკომ განაცხადა, რომ თუ დასავლეთი სერიოზულად არ მიიღებს მოსკოვის მიერ შეთავაზებულ „უსაფრთხოების გარანტიებს“, რომლებიც ითვალისწინებს უარს უკრაინის ნატო-ში შესვლაზე, მაშინ რუსეთი „სამხედრო-ტექნიკურ ალტერნატივას“ გამოიყენებს.