IRI-ის კვლევა: რას ფიქრობს ხალხი მიმდინარე პოლიტიკურ პროცესებზე
საერთაშორისო რესპუბლიკური ინსტიტუტის (IRI) კვლევის მიხედვით (რომელიც 2021 წლის 2-26 თებერვლის პერიოდში ჩატარდა), მოსახლეობის 59% ფიქრობს, რომ ქვეყანა არასწორი მიმართულებით ვითარდება, 63% ამბობს, რომ ოჯახში ეკონომიკური მდგომარეობა გაუუარესდა, ხოლო პატრიარქის შემდეგ, ქვეყანაში ყველაზე რეიტინგული ადამიანი ექსპრემიერი გიორგი გახარიაა. გახარიას მოსდევს კახი კალაძე და დავით ბაქრაძე. დავით ბაქრაძის შემდეგ ყველაზე რეიტინგული პოლიტიკოსი ნიკა მელიაა.
პარტიების რეიტინგი
კითხვაზე, შემდეგ კვირას რომ ქვეყანაში არჩევნები ტარდებოდეს, გამოკითხულთა 35% ხმას “ქართულ ოცნებას” მისცემდა, 18% – ბლოკ ენმ-ძალა ერთობაშიას.
სხვა პარტიების რეიტინგები შემდეგია:
- ევროპული საქართველი – 3%
- სტრატეგია აღმაშენებელი – 3%
- გირჩი – ზურა ჯაფარიძე – 2%
- პატრიოტთა ალიანსი – 2%
- ლეიბორისტული პარტია – 2%
- მოქალაქეები – 2%
- ლელო – 1%
- სხვა პარტიები – 1%
- არცერთი – 10%
- არ ვიცი/უარი პასუხზე – 15%
IRI-ის ახალი კვლევა ასევე აჩვენებს, რომ საქართველოში არსებულ პოლიტიკურ პარტიებს მოსახლეობის 53% ნაწილობრივ ენდობა, 27% ნაწილობრივ არ ენდობა, სრულად ენდობა 5%, ხოლო სრულად არ ენდობა 10%. კითხვაზე პასუხი არ აქვს 4%-ს.
პოლიტიკური პარტიების მიმართ ნაწილობრივი ნდობის ყველაზე მაღალი მაჩვენებელი, მოსახლეობის 50 წელს გადაცილებულთა კატეგორიაში დაფიქსირდა – 57%.
________________________________
● იანვარ-თებერვალში საქართველოს ეკონომიკა 8.3 პროცენტით შემცირდა
__________________________________
როგორ ვითარდება ქვეყანა
IRI-ის კვლევის მიხედვით, გამოკითხულთა მხოლოდ 30%-ს მიაჩნია, რომ ქვეყანა სწორი მიმართულებით ვითარდება, 11%-მა არ იცის ან კითხვაზე პასუხი არ აქვს. ჯამში, მოსახლეობის 59%-ის აზრით, ქვეყანა არასწორი მიმართულებით ვითარდება.
კითხვაზე – თუ რა არის ყველაზე დიდი პრობლემა საქართველოში – უმრავლესობა უმუშევრობას ასახელებს:
- უმუშევრობა – 65%
- მაღალი ფასები – 37%
- სიღარიბე – 26%
- კორონავირუსი – 16%
მოსახლეობის 76% ამბობს, რომ ქვეყანაში ეკონომიკური მდგომარეობა გაუარესდა, აქედან 39% ამბობს, რომ ძალიან გაუარესდა.
_________________________________
● ისტორიული ვარდნა: 1994 წლის შემდეგ საქართველოს ეკონომიკა ყველაზე მეტად 2020 წელს შემცირდა
_______________________________
ვადამდელი არჩევნები და ბოიკოტი
მოსახლეობის 45% სრულად ან ნაწილობრივ უჭერს მხარს ოპოზიციის მოთხოვნას, ჩატარდეს ვადამდელი არჩევნები, მაშინ, როდესაც 45% არ ემხრობა ამავე მოთხოვნას.
კითხვაზე – უჭერთ თუ არა მხარს ოპოზიციის მოთხოვნას, ჩატარდეს საქართველოში ვადამდელი არჩევნები – პასუხები ასე გადანაწილდა:
33% – აბსოლუტურად არ ვუჭერ მხარს;
12% – ნაწილობრივ არ ვუჭერ მხარს;
25% – სრულად ვუჭერ მხარს;
20% – ნაწილობრივ ვუჭერ მხარს;
9% – არ ვიცი/პასუხი არ მაქვს.
2020 წლის არჩევნებს სრულად ან ნაწილობრივ არათავისუფლად, არასამართლიანად და გაუმჭვირვალედ მოსახლეობის 35% მიიჩნევს.
ჯამში პასუხები ასე გადანაწილდა:
- სრულად თავისუფალი, სამართლიანი და გამჭვირვალე – 25%
- ნაწილობრივ თავისუფალი, სამართლიანი და გამჭვირვალე – 28%
- ნაწილობრივ არათავისუფალი, არასამართლიანი და გაუმჭვირვალე – 19%
- სრულად არათავისუფალი, არასამართლიანი და გაუმჭვირვალე – 16%
- არ ვიცი/არ მაქვს პასუხი – 12%
კვლევაში ჩანს, რომ მოსახლეობის 42% საერთოდ არ ეთანხმება ოპოზიციური პარტიების ბოიკოტს პარლამენტში შესვლაზე, მაშინ, როდესაც ამ გადაწყვეტილებას, ნაწილობრივ ან სრულად ეთანხმება მოსახლეობის 26%
______________________________
● საქართველოში 307 ათას ადამიანს ლომბარდის ვალი აქვს
________________________________
პანდემიის მართვა და ვაქცინაცია
პანდემიის წინააღმდეგ მთავრობის პოლიტიკით კმაყოფილთა რიცხვი თებერვალში ივნისის თვესთან შედარებით 20%-ით შემცირდა და 59% შეადგინა.
39% კი პანდემიის მართვით უკმაყოფილოა.
მოსახლეობის 39% ამბობს, რომ არ აიცრება, ხოლო 24% ვაქცინას “რაღაც დროის გასვლის” შემდეგ გაიკეთებს.
კითხვაზე – მას შემდეგ რაც Covid-19-ის ვაქცინა ხელმისაწვდომი გახდება და ვაქცინაციის პროცესი დაიწყება, რა იქნება თქვენი გადაწყვეტილება – პასუხები შემდეგნაირად გადანაწილდა:
- 39% – არ ავიცრები
- 24% – ავიცრები რაღაც დროის გასვლის შემდეგ
- 20% – ავიცრები, როგორც კი ვაქცინა ხელმისაწვდომი იქნება ჩემთვის
- 6% – ავიცრები მხოლოდ იმ შემთხვევაში, თუ კანონი ან ჩემი დამსაქმებელი აცრას მოითხოვს
- 1%-ზე ნაკლები – სხვა
- 12% – არ ვიცი/უარი პასუხზე
საგარეო პოლიტიკა და ინსტიტუტები
ნდობის ყველაზე მაღალი მაჩველებელი ქართულ ჯარს (82%) და ეკლესიას აქვს (79%).
შემდეგ მოდიან ქართულ მედია – 64% (30%-ს არ მოსწონს) და პოლიცია – 54% (არ მოსწონს 39%-ს).
ინსტიტუტებიდან და ორგანიზაციებიდან ყველაზე ნაკლებად პოლიტიკური პარტიების, პრეზიდენტის, ეროვნული ბანკის, საქართველოს პარლამენტისა და საჯარო საგანმანათლებლო სისტემის საქმიანობა მოსწონთ.
გამოკითხულთა 88% თვლის, რომ საქართველოსთვის უდიდეს პოლიტიკურ საფრთხეს რუსეთი წარმოადგენს, 7%-ის აზრით – აზერბაიჯანი.
სხვა ქვეყნების მონაცემები:
- თურქეთი – 7%
- აშშ – 5%
- ირანი – 4%
- სომხეთი – 3%
- ჩინეთი – 2%
- უკრაინა – 1%-ზე ნაკლები
- ევროკავშირი – 1%-ზე ნაკლები
- არცერთი – 1%-ზე ნაკლები
- არ ვიცი/უარი პასუხზე – 3%
მოსახლეობის 69% თვლის, რომ საქართველოსთვის ყველაზე მნიშვნელოვანი პოლიტიკური პარტნიორი ამერიკის შეერთებული შტატებია, 54%-ის აზრით კი ევროკავშირი.
სხვა ქვეყნების მონაცემები:
- უკრაინა – 23%
- აზერბაიჯანი – 17%
- თურქეთი – 13%
- სომხეთი – 11%
- რუსეთი 9%
- ჩინეთი – 4%
- ირანი – 3%
- არცერთი – 1%
- არ ვიცი/უარი პასუხზე – 3%
ასევე, მოსახლეობის 36% მხარს უჭერს რუსეთთან შემდგომ დიალოგს, 14% კი მკაცრად ეწინააღმდეგება.
მედია
კითხვაზე – თუ რომელი ტელევიზიის ნიუსსა და პოლიტიკურ ინფორმაციას ენდობა ყველაზე მეტად – გამოკითხულთა 45% TV იმედს ასახელებს, 30% – მთავარ არხს.
კვლევა ჩატარდა 2021 წლის 2-26 თებერვლის პერიოდში საერთაშორისო რესპუბლიკური ინსტიტუტის კვლევების ცენტრის სახელით. შერჩევა მოიცავდა საარჩევნო ხმის უფლებისა და ასაკის მქონე 1500 რესპონდენტს. მონაცემები შეწონილ იქნა ასაკის, გენდერის, რეგიონისა და დასახლების ზომის შესაბამისად. ცდომილების ზღვარი წარმოადგენს +/- 2.5 პროცენტს, გამოპასუხების მაჩვენებელი – 75%.
