ირაკლი კობახიძე: პრეზიდენტის ღალატის მიუხედავად, ორი წლის განმავლობაში მშვიდობა შევინარჩუნეთ
ირაკლი კობახიძე დამოუკიდებლობის დღეზე
საქართველოს პრემიერმინისტრმა ირაკლი კობახიძემ დამოუკიდებლობის დღის ღონისძიებაზე განაცხადა, რომ პრეზიდენტის ღალატის მიუხედავად, საქართველოს ხელისუფლებამ ორი წლის განმავლობაში მშვიდობა შეინარჩუნა. მან ასევე აღნიშნა, რომ 2030 წელს ქართველებმა უნდა იცხოვრონ “აფხაზ და ოს და-ძმებთან” ერთად.
რა თქვა საქართველოს პრემიერმა
“გასული 34 წლის განმავლობაში, საქართველომ მრავალი განსაცდელი გამოიარა. გამოვიარეთ სამი ომი 90-იანი წლების დასაწყისში. 2004-2012 წლებში გამოვიარეთ ფაქტობრივი დამოუკიდებლობის დაკარგვა.
ავტორიტარიზმი, აგენტურის მმართველობა და მეოთხე ომი. საზოგადოების გამოუცდელობა და პოლიტიკოსების ღალატი ჩვენს ქვეყანას ტერიტორიების 20 პროცენტის დროებით დაკარგვად დაუჯდა.
2012 წლიდან დღემდე გამოვიარეთ საქართველოს სუვერენიტეტისა და დამოუკიდებლობის შერყევის მცდელობა, განსაკუთრებით ბოლო 4 წლის განმავლობაში.
ხალხისა და მისი ხელისუფლების ერთიანობამ და გონივრულმა ნაბიჯებმა მოგვცა იმის შესაძლებლობა, რომ ეგზისტენციალური საფრთხეების და მრავალმხრივი ღალატის, მათ შორის საქართველოს პრეზიდენტის ღალატის მიუხედავად, გასული 2 წლის განმავლობაში ქვეყანაში მშვიდობა შეგვენარჩუნებინა.
1990 წელს ჩატარდა მრავალპარტიული არჩევნები, ხოლო 1991 წელს საქართველომ სახელმწიფოებრივი დამოუკიდებლობის აღდგენა გამოაცხადა. მას შემდეგ საქართველო გადის ერთგვარ მოსეს გზას, რომელიც დარწმუნებული ვარ, აღთქმულ მიწამდე აუცილებლად მიგვიყვანს.
ჩვენი აღთქმული მიწა, ანუ “ქართული ოცნებაა”, საქართველოს დამოუკიდებლობის აღდგენიდან 40 წლის თავზე, 2030 წელს, ვიცხოვროთ ერთიან და ძლიერ საქართველოში, ჩვენს აფხაზ და ოს ძმებთან და დებთან ერთად – ერთიანი და ძლიერი საქართველო უნდა გახდეს 2030 წელს ევროპული ოჯახის სრულუფლებიანი წევრი.
