კორონავირუსით ინფიცირებული სომხეთის პრემიერ-მინისტრი ბრიფინგზე გამოვიდა
პირველ ივნისს, საკუთარ დაბადების დღეს, სოციალური ქსელის გვერდზე, პირდაპირ ეთერში, სომხეთის პრემიერ-მინისტრმა, ნიკოლ ფაშინიანმა თვითონ განაცხადა, რომ კორონავირუსით დაინფიცირდა. რამდენიმე საათის შემდეგ კი, მან მონაწილეობა მიიღო ონლაინბრიფინგში, რომელიც ქვეყანაში შექმნილ ვითარებასა და კორონავირუსთან ბრძოლის ზომებს მიეძღვნა.
ბრიფინგი კომენდატურის სხდომის დასრულებისთანავე გაიმართა, რომელიც ამჯერად ონლაინ ჩატარდა.
ფაშინიანთან ერთად, არსებული სიტუაციის შესახებ მოსახლეობას „ანგარიში ჩააბარეს“ კომენდანტმა, ვიცე-პრემიერმა ტიგრან ავინიანმა და ჯანდაცვის მინისტრმა, არსენ ტოროსიანმა.
ბრიფინგის ყველა მონაწილე ნიღბით იყო და სოციალურ დისტანციას იცავდა.
- სომხეთი: სამი ქალის ისტორია, რომლებიც საკუთარი ბიზნესის კორონავირუსისგან გადარჩენას ცდილობენ
- სომხეთის ხელისუფლება ბიზნესს „ნულიდან“ დაწყებაში დაეხმარება
მკაცრი საკარანტინო ზომები მოსალოდნელი არ არის
პრემიერმა განაცხადა, რომ ბრიფინგამდე ტემპერატურა გაიზომა და ის ნორმის ფარგლებში იყო და ორი ივნისიდან ნორმალურ სამუშაო რიტმს დაუბრუნდება, რადგან თავს შეუძლოდ არ გრძნობს.
ფაშინიანმა ხაზი გაუსვა, რომ ტესტის ჩაბარებამდე არანაირი სიმპტომი არ ჰქონდა. ეს ჩვეულებრივი შემოწმება იყო მგზავრობის წინ, რომელსაც ის მთიან ყარაბაღში გეგმავდა.
ამ კონტექსტში პრემიერმა განაცხადა, რომ სომხეთში, შესაძლოა, არის 18-20 ათასი ადამიანი, რომელთა შემთხვევაშიც დაავადება უსიმპტომოდ მიმდინარეობს:
«ანუ ისინი, ისევე, როგორც მე, არც კი ეჭვობენ, რომ ინფიცირებულები არიან“.
კითხვაზე, რომელიც ქვეყანაში მკაცრი საკარანტინო ნორმების დაბრუნებას შეეხებოდა, ფაშინიანმა განაცხადა:
„ჯერჯერობით გვაქვს შესაძლებლობა, რომ მკაცრ შეზღუდვებს ანუ სრულ ჩაკეტვას არ დავუბრუნდეთ. ჩვენ ამ გზით ვივლით“.
ქვეყანა კი ამჟამად, საქმიანობის სხვადასხვა სფეროში, კომენდატურის მიერ შემუშავებული ქცევის ახალი წესებისა და ნორმების დაცვის კონტროლის გზით მიდის. პოლიცია თვალყურს ადევნებს, რომ მოქალაქეებმა იარონ ნიღბებით და დაიცვან სოციალური დისტანცია. სპეციალური ინსპექტირების ორგანო სხვადასხვა საწარმოში მოულოდნელ შესამოწმებელ რეიდებს აწყობს.
საგანგებო მდგომარეობა სომხეთში 16 მარტს გამოცხადდა და ორჯერ გაგრძელდა, ბოლოს – 13 ივნისამდე. თუმცა, აპრილის ბოლოდან კარანტინის ნორმების შემსუბუქება დაიწყო, 5 მაისიდან მოიხსნა შეზღუდვები გადაადგილებაზე, 18 მაისიდან კი ამუშავდა ფაქტობრივად ყველა ბიზნესი, ტრანსპორტი და საბავშვო ბაღებიც კი.
საჰაერო საზღვრები ივლისის შუიდან გაიხსნება
ვიცე-პრემიერმა და საგანგებო მდგომარეობის კომენდანტმა, ტიგრან ავინიანმა განაცხადა, რომ უკანასკნელი 5 თვის განმავლობაში, სომხეთის ხელისუფლება პერიოდულად ცვლის მოქმედების სტრატეგიას. მკაცრი შეზღუდვების პერიოდი საწარმოების ამუშავების ეტაპმა შეცვალა. სწორედ ამის შემდეგ დაიწყო ახალი აფეთქება – ინფიცირებულთა რაოდენობა ყოველდღიურად ასობით იზრდება.
„ჩვენ ამას ველოდით და მზად ვიყავით. თუმცა, მკაცრი ზომების დაბრუნება უკიდურეს ნაბიჯად მიგვაჩნია. ყურადღებით ვაკვირდებით ჩვენი უცხოელი კოლეგების ქმედებებს, რათა მათი დადებითი გამოცდილება გამოვიყენოთ“, – განაცხადა კომენდანტმა.
ტიგრან ავინიანმა აღნიშნა, რომ უკვე მზად არის სომხეთში წარმოებული კორონავირუსის ტესტების პირველი პარტია. ორი ივნისიდან 350 ტესტი გაიგზავნება ლაბორატორიაში ანალიზების ჩასატარებლად.
მისი თქმით, კომენდატურის ბოლო სხდომის ერთ-ერთი მთავარი თემა, ტურიზმის სფერო იყო:
„დაახლოებით, ივლისის შუიდან, სიფრთხილის ნორმების დაცვით, სომხეთი საჰაერო საზღვრების გახსნას აპირებს. იმედი გვაქვს, რომ ეს ტურისტული სფეროს პრობლემების დარეგულირების საშუალებას მოგვცემს“.
დაავადებულთა მდგომარეობის შესახებ
ჯანდაცვის მინისტრმა არსენ ტოროსიანმა აღნიშნა, რომ 440 ადამიანი, რომელთაც კორონავირუსი დაუდგინდათ, მძიმე მდგომარეობაში არიან:
„55 მოქალაქე უკიდურესად მძიმე მდგომარეობაშია, 16 მათგანი ხელოვნური სუნთქვის აპარატზეა მიერთებული“.
არსენ ტოროსიანმა კიდევ ერთხელ გაუსვა ხაზი, რომ ყველა ზომას იღებენ სხვადასხვა კლინიკის სარეანიმაციო განყოფილებებში ადგილების გასაზრდელად. მაგრამ ჯერჯერობით კვლავ აქტუალურია ეს პრობლემა ჯანდაცვის სისტემისთვის.
სომხეთში, ინფიცირებულთა მკვეთრი მატების ფონზე, გადაწყვიტეს, რომ კორონავირუსით ინფიცირებული უსიმპტომო პაციენტების იზოლირება აღარ მოახდინონ. დაავადებულთა მდგომარეობას სახლის პირობებში დააკვირდებიან საქალაქო პოლიკლინიკების, სოფლების ამბულატორიებისა და ჯანდაცვის ცენტრების მედიკოსები.
მინისტრის თქმით, „მათთვის გადამზადების კურსების ორგანიზება მოხდება, რადგან ხშირად ისმის ჩივილი იმის შესახებ, რომ პოლიკლინიკების თანამშრომლები ცუდად ფლობენ დაავადებასთან სახლის პირობებში ბრძოლის უნარებს“.
