გვარამიას საქმის მოსამართლე ამბობს, რომ აშშ-ს საელჩომ ანგარიში მოსთხოვა და პროგრამიდან მოხსნა
გვარამიას საქმის მოსამართლე
ნიკა გვარამიას საქმის მოსამართლის, ლაშა ჩხიკვაძის მტკიცებით, აშშ-ს საელჩოს თანამშრომელმა კევინ ბურკმა მას უთხრა, რომ კელი დეგნანს აინტერესებდა, რატომ მიიღო გამამტყუნებელი განაჩენი გვარამიას საქმეზე და განსაკუთრებით, რატომ გამოიყენა სასჯელად თავისუფლების აღკვეთა. ჩხიკვაძის თქმით, ბურკმა ასევე უთხრა, რომ აშშ-ში მოსამართლეების დაგეგმილ ვიზიტში მისი მონაწილეობა არასასურველი იქნებოდა და სიიდან ამოიღეს. ასევე, ჩხიკვაძის განმარტებით, მასზე ზეწოლას ევროპარლამენტარებიც ახდენენ. ლაშა ჩხიკვაძის განცხადება პროსამთავრობო TV იმედმა დღეს გაავრცელა.
მოსამართლე მოუწოდებს პოლიტიკურ პარტიებს, დიპლომატიურ კორპუსს, საერთაშორისო და საქართველოში მოქმედ არასამთავრობო ორგანიზაციებს, “თავი შეიკავონ სასამართლოზე ზეწოლისაგან და მოსამართლეებს მიეცეთ საშუალება, მართლმსაჯულება განახორციელონ მშვიდ გარემოში და გადაწყვეტილებები მიიღონ საქართველოს კონსტიტუციის, კანონისა და შინაგანი რწმენის საფუძველზე”.
“მას შემდეგ, რაც მოვისმინე ევროპარლამენტარ მაიკლ გალერის განცხადება სააპელაციო სასამართლოში ნიკა გვარამიას საქმესთან დაკავშირებით, სადაც ის, ჩემი შეფასებით, პირდაპირ ზეწოლას ახდენს სასამართლოზე და აშკარად მიუთითებს სააპელაციო სასამართლოს, რომ მომავალი კვირის სამშაბათს ანუ 19 ივლისს, როცა სასამართლო სხდომაა ჩანიშნული, პირველივე განხილვაზე გაამართლოს გვარამია და ამით გამოასწოროს ძველი შეცდომები (ანუ რომელიც მე თითქოსდა დავუშვი)” – ამბობს ჩხიკვაძე.
ჩხიკვაძე გალერს მიმართავს: “როგორც ცნობილია, ბატონი გალერი გერმანელი პოლიტიკოსია და წლებია ევროპარლამენტის წევრია და უბრალოდ ჩემთვის საინტერესოა, საკუთარ ქვეყნის მოსამართლეებზე თუ მოახდენდა ამგვარ ზეწოლას და მათთვის პირდაპირი მითითებების მიცემას, კონკრეტული სისხლის სამართლის საქმის შედეგთან დაკავშირებით? და რაც მთავარია, რა რეაქციები მოყვებოდა მის ასეთ ქმედებას მისსავე სამშობლოში?”
როგორც მოსამართლე აღნიშნავს, ყველაფერი ამით არ დასრულებულა და ახლა უკვე ზოგიერთი პოლიტიკური ძალა “სანქციებითაც“ ემუქრება ამ კონკრეტული საქმის განხილვის შედეგის გამო:
“და არ მინდა, რომ იგივე გაიარონ ჩემმა კოლეგა მოსამართლეებმა, რომლებსაც, როგორც უკვე აშკარად ჩანს, ამ საქმის განხილვა მოუწევთ დაუფარავი და დიდი ზეწოლის ქვეშ.”
მოსამართლის ამ განცხადებას გამოეხმაურა კულტურის მინისტრი თეა წულუკიანი და ლაშა ჩხიკვაძეს მხარდაჭერა გამოუცხადა. მისი თქმით, ის მიესალმება ზეწოლის თუ ზეწოლის მცდელობის ფაქტების გასაჯაროებას.
დღესვე ლაშა ჩხიკვაძემ ზეწოლის ფაქტზე “მთავარ არხთანაც” ისაუბრა. მოსამართლის თქმით, უნდა დასრულდეს “კატა-თაგვობანას თამაში” და ის პირადად ითხოვს პასუხს საქართველოში აშშ-ს ელჩის კელი დეგნანისგან – არის თუ არა სანქცირებული, რათა ყველაფერს თავის სახელი დაერქვას.
“თუ არის ეს სანქცია, მივიღებ ამას, როგორც სანქციას. არ ვიცი ვის რა განცდები დარჩა, ვინ რა განცხადებებს აკეთებს, მაგრამ, იცით რა არის, სამწუხაროა, როდესაც შენ ილანძღები დაუსაბუთებლად, აბსოლუტურად დაუსაბუთებლად და ყოველგვარი მიზეზის გარეშე, ამის სამართლებრივი საფუძველი არ არსებობს, მე ნამდვილად არ ვფიქრობ, რომ მე ამ ეტაპზე მე რაიმე ფორმით სანქციის ქვეშ ვარ”. – ამბობს ლაშა ჩხიკვაძე.
16 მაისს, სასამართლო დარბაზში დააპატიმრეს ქვეყნის ყველაზე პოპულარული ოპოზიციური ტელეკომპანიის, “მთავარის” გენერალური დირექტორი ნიკა გვარამია. კრიტიკული მედიის ხელმძღვანელს სამი წლით და ექვსი თვით თავისუფლების აღკვეთა მიესაჯა ეპიზოდზე, რომელშიც მას სამსახურებრივი მანქანის ოჯახის საჭიროებებისთვის გამოყენებას ედავებიან.
მას შემდეგ, რაც ჩხიკვაძემ გვარამიას პატიმრობა მიუსაჯა, მედიაში გავრცელდა ინფორმაცია, რომ ის აშშ-ის მთავრობის დაფინანსებული პროგრამით შეერთებულ შტატებში საქმეზე გამოტანილი განაჩენის გამო აღარ გაემგზავრება. აღნიშნული დაადასტურა თავად ჩხიკვაძემაც.
ნიკა გვარამიას საქმის მოსამართლის, ლაშა ჩხიკვაძის მიმართ სოლიდარობის ნიშნად, 5 მოსამართლე აშშ-ში არ წავიდა, ამ ყველაფერს კი წინ უძღოდა მმართველი პარტიის თავმჯდომარის, ირაკლი კობახიძის განცხადება, რომელმაც თქვა, რომ “მოსამართლისთვის ვიზიტის გაუქმება რომ ეკადრა ვინმეს, სხვა მოსამართლეებიც გააუქმებდნენ.”
დამოუკიდებელი ექსპერტები, არასამთავრობო ორგანიზაციების წარმომადგენლები და პოლიტიკოსები გვარამიას დაკავებას პოლიტიკურად მოტივირებულად მიიჩნევენ.
მკაცრს შეფასებას აკეთებს აშშ-ის საელჩო – ის პროცესში “შერჩევით გამოძიებასა და სისხლისსამართლებრივი დევნის შემაშფოთებელი პრაქტიკას ხედავს, მიმართულს ამჟამინდელი მთავრობის ოპოზიციაში მყოფი პირების მიმართ”.
ხოლო საქართველოს ოთხი ოპოზიციური ტელევიზიის მენეჯერები მოუწოდებენ დასავლეთს, არ მისცეს საშუალება ოლიგარქიულ რეჟიმს საბოლოოდ მოკლას დემოკრატია ქვეყანაში.
