დღის ბოლოს ღარიბაშვილი სტოლტენბერგს მის საცხოვრებელ რეზიდენციაში შეხვდა
ღარიბაშვილის სტოლტენბერგს შეხვდა
საქართველოს მთავრობის ადმინისტრაციის ცნობით, პრემიერმინისტრი ირაკლი ღარიბაშვილი NATO-ს გენერალურ მდივანს, იენს სტოლტენბერგს მის საცხოვრებელ რეზიდენციაში შეხვდა.
როგორც მთავრობის განცხადებაშია ნათქვამი, შეხვედრაზე კიდევ ერთხელ ხაზი გაესვა საქართველოს ევრო-ატლანტიკურ მისწრაფებას, რაც ქვეყნის საგარეო და უსაფრთხოების პოლიტიკის უმთავრეს პრიორიტეტს წარმოადგენს.
“გენერალურ მდივანთან შეხვედრაზე კიდევ ერთხელ აღინიშნა საქართველოს, როგორც ალიანსის მტკიცე და სანდო პარტნიორის როლი და მისი მნიშვნელოვანი კონტრიბუცია როგორც გლობალური უსაფრთხოების უზრუნველყოფის პროცესში, ასევე შავი ზღვის რეგიონის უსაფრთხოების უზრუნველყოფაში.
შეხვედრაზე მხარეებმა იმედი გამოთქვეს, რომ საქართველოს პროგრესი და მისი მისწრაფება სათანადოდ იქნება ასახული ალიანსის შემდგომ გადაწყვეტილებებში როგორც ქვეყნის მისწრაფებების პოლიტიკური მხარდაჭერის, ასევე პრაქტიკული შესაძლებლობების გაძლიერების თვალსაზრისით.” – ვკითხულობთ განცხადებაში.
მთავრობა ასევე ხაზს უსვამს, რომ მხარეებმა მიმოიხილეს NATO-ს მადრიდის სამიტის მოსამზადებელი საკითხები და მოლოდინები. ადმინისტრაციის ცნობით, საუბარი შეეხო რეგიონში არსებულ უსაფრთხოების გარემოს და უკრაინის ომსაც, რაზეც პრემიერმინისტრმა ქართველი ხალხის სოლიდარობა კიდევ ერთხელ დააფიქსირა უკრაინელი ხალხის მიმართ.
“ალიანსის გენერალურმა მდივანმა კიდევ ერთხელ დააფიქსირა მხარდაჭერა საქართველოს სუვერენიტეტისა და ტერიტორიული მთლიანობის მიმართ.
საქართველოს პრემიერმა გენერალურ მდივანს მადლობა გადაუხადა პირადი ძალისხმევისთვის და ნატო-ში ინტეგრაციის გზაზე საქართველოს წინსვლაში არსებითი როლის შესრულებისთვის.” – აცხადებს საქართველოს მთავრობა.
დღეს დილით გავრცელდა ინფორმაცია, რომ ბრიუსელში NATO-ს გენერალურ მდივნის, იენს სტოლტენბერგისა და საქართველოს პრემიერმინისტრის, ირაკლი ღარიბაშვილის შეხვედრა გაუქმდა. ეს ინფორმაცია ჩრდილოატლანტიკური ალიანსის ოფიციალურ ვებგვერდზე დილით გამოქვეყნდა.
ქართულ სამთავრობო მედიაში განაცხადეს, რომ სტოლტენბერგთან პრემიერის შეხვედრა NATO-ს გენმდივნის ჯანმრთელობის გამო გადაიდო, იგივე თქვა პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემაც.
მოგვიანებით, NATO-მ განცხადება განაახლა, რომლის მიხედვითაც, გენერალური მდივანი, იენს სტოლტენბერგი ირაკლი ღარიბაშვილს შეხვდებოდა.
