COVID-19-ის 24 ახალი შემთხვევა: თბილისის ბაზრობები შესაძლოა, ვირუსის გავრცელების კერად იქცეს
22 ივლისის მონაცემებით, ბოლო 24 საათის განმავლობაში საქართველოში კორონავირუსით ინფიცირების 24 ახალი შემთხვევა დადასტურდა. ეს 31 მაისის შემდეგ covid-19-ით დაავადების ყველაზე მაღალი მაჩვენებელია.
კორონავირუსის გავრცელების ყველაზე ცხელი წერტილი ქვემო ქართლია. 24 ახალი შემთხვევიდან 10 გარდაბანში, გაჩიანის დასახლებაში გამოვლინდა. ინფექციის გავრცელების წყარო ძირითადად ორი სოფელია – ყარაჯალარი და ყარათაკლია.
გარდაბნის მუნიციპალიტეტში ახლა კორონავირუსით სულ 34 ადამიანია დაინფიცირებული. დაავადებათა კონტროლის ეროვნული ცენტრის ხელმძღვანელი აცხადებს, რომ ადგილობრივი მოსახლეობა ეპიდემიოლოგებთან არ თანამშრომლობს და შემოწმებისთვის ნაცხის აღებაზე უარს ამბობს.
- კარანტინი და ადამიანის უფლებები. საუბარი ანა არგანაშვილთან
- კარანტინი აზერბაიჯანში: სუიციდი, პოლიციის მხრიდან სექსუალური შევიწროება და სხვა შედეგები
როგორც გაირკვა, კორონავირუსი დაუდასტურდათ 20 ივლისს, covid-19-ით გარდაცვლილი 72 წლის კაცის ოჯახის წევრებსაც, რომლებიც ლილოს და ე.წ. დინამოს ბაზრობაზე მუშაობენ.
დაავადებათა კონტროლის ეროვნული ცენტრის ხელმძღვანელი, ამირან გამყრელიძე ადასტურებს, რომ გარდაცვლილის ახლობლებს, რომლებიც ბაზრობაზე მუშაობენ, კორონავირუსი დაუდასტურდათ და არ გამორიცხავს, რომ თბილისის ბაზრობები შესაძლოა, ვირუსის გავრცელების ახალ კერად იქცეს.
ეპდემიოლოგების რეკომენდაციით, ბაზრობებზე შემსვლელებისთვის წესები უნდა გამკაცრდეს და მოვაჭრეებსაც და ტერიტორიაზე შემსვლელ მყიდველებსაც თერმოსკრინინგი ჩაუტარდეთ.
