მაგნუს ბრუნერი: საქართველოს მზარდი დემოკრატიული ვარდნა ძალიან საგანგაშოა
ევროკომისარი მაგნუს ბრუნერი საქართველოზე
საქართველოს მზარდი დემოკრატიული ვარდნა სინამდვილეში ძალიან საგანგაშოა. ოფიციალურმა პირებმა ბოლო დროს რიგი კანონების შესწორებები აამოქმედეს, რომლებიც ფუნდამენტურ უფლებებს ზღუდავენ და ძირს უთხრიან დემოკრატიულ მმართველობას, – ამის შესახებ განაცხადა შინაგან საქმეთა და მიგრაციის ევროკომისარმა, მაგნუს ბრუნერმა ევროპარლამენტის პლენარულ სხდომაზე საქართველოზე დებატების დროს.
მისივე თქმით, ევროკავშირი კვლავ სოლიდარულია ქართველი ხალხის მიმართ და მოუწოდებს ოფიციალურ პირებს, სწრაფად იმოქმედონ, რათა მოხდეს დეესკალაცია.
ამასთან, მაგნუს ბრუნერმა საქართველოს ოფიციალურ პირებს მოუწოდა, განიხილონ ახალი არჩევნების ჩატარებისკენ ქართული საზოგადოების მოწოდება.
რა თქვა ევროკომისარმა
“50 დღეზე მეტია ქართველები ქვეყნის მასშტაბით ქუჩაში გამოდიან უპრეცედენტო პროტესტით, იბრძვიან დემოკრატიული მომავლისთვის თავიანთი ქვეყნისთვის, როგორც ევროპული ოჯახის წევრის ნაწილისთვის და იყენებენ თავიანთ ფუნდამენტურ უფლებებს, რომლებსაც დახვდნენ ძალადობრივი რეპრესიებით, დაშინებითა და დაკავებებით.
საქართველოს მზარდი დემოკრატიული ვარდნა სინამდვილეში ძალიან საგანგაშოა. ოფიციალურმა პირებმა ბოლო დროს რიგი კანონების შესწორებები აამოქმედეს, რომლებიც ფუნდამენტურ უფლებებს ზღუდავენ და ძირს უთხრიან დემოკრატიულ მმართველობას. ძალადობა და სიძულვილის ენა მშვიდობიანი პროტესტის მონაწილეების, პოლიტიკოსებისა და მედიის წარმომადგენლების წინააღმდეგ, საჯარო მოსამსახურეების პოლიტიკური მოტივებით გათავისუფლების შესახებ ცნობები, ისევე, როგორც სალომე ზურაბიშვილის წინააღმდეგ მუქარები, სრულიად მიუღებელია.
ბევრი დაკავებული რჩება პატიმრობაში და სისხლის სამართლით გასამართლება ემუქრებათ, თუმცა დღემდე არცერთი სამართალდამცავი ორგანოს წარმომადგენლის მიმართ არ არის წაყენებული ბრალდება პროტესტის ძალადობრივი დარბევისა და დაკავებული პროტესტის მონაწილეების წამების სერიოზული ბრალდებების მიუხედავად, რის შესახებაც საქართველოს ომბუდსმენმა გააჟღერა
მსგავსი ქმედებები არ შეეფერება ევროკავშირის კანდიდატის სტატუსის მქონე ქვეყანას. ევროკავშირი კვლავ სოლიდარულია ქართველი ხალხის მიმართ და მოვუწოდებთ ოფიციალურ პირებს, სწრაფად იმოქმედონ, რათა მოხდეს დეესკალაცია, გათავისუფლდნენ დაპატიმრებულები და გამოძიებული იქნას ძალადობის აქტები. ასევე, უნდა იყოს ანგარიშვალდებულება სამართალდამცველებისთვის, რომლებიც ჩართული იყვნენ ამ უკანონო ქმედებებში.
ასევე მოვუწოდებთ [საქართველოს] ოფიციალურ პირებს, მიიღონ ეუთო-ს არჩევნების შესახებ საბოლოო ანგარიშში გამოქვეყნებული რეკომენდაციები და ყველა ვარიანტი განიხილონ საქართველოს დემოკრატიულ ინსტიტუტებისადმი ნდობის აღსადგენად. რა თქმა უნდა, ყველა პოლიტიკურ ძალასთან და სამოქალაქო საზოგადოებასთან დიალოგში, მათ შორის [განიხილონ] ახალი არჩევნების ჩატარებისკენ საქართველოს საზოგადოების მოწოდება.
გასულ წელს ევროკავშირმა რიგი ზომები მიიღო, რათა რეაგირება მოეხდინა საქართველოს გაგრძელებულ დემოკრატიულ უკუსვლაზე. შევამცირეთ პოლიტიკური კონტაქტები და [საქართველოს] ოფიციალური პირებისთვის დახმარება შევაჩერეთ – 30 მილიონი “ევროპის მშვიდობის ხელშეწყობის ინსტრუმენტით” და 120 მილიონ ევროზე მეტი მთავრობისთვის პირდაპირი დახმარებით.
ამავდროულად, ვაგრძელებთ სამოქალაქო საზოგადოების ორგანიზაციებისა და დამოუკიდებელი მედიის გვერდში დგომას. 8,5 მილიონი ევრო უკვე გადანაწილდა მათთვის და მზად ვართ დამატებითი სახსრები გადავცეთ საკომუნიკაციო აქტივობებისთვის, ვინაიდან დეზინფორმაციაზე ჩვენი პასუხი უნდა გავაძლიეროთ.”
