ექსპერტები ცხინვალში ძალაუფლებისთვის ბრძოლის ახალ რაუნდს ვარაუდობენ
ძალაუფლებისთვის ბრძოლა ცხინვალში
ექსპრეზიდენტმა ანატოლი ბიბილოვმა განაცხადა, რომ ყოფილი მმართველი პარტია “ერთიანი ოსეთი”, რომლის არაოფიციალური ლიდერიც ის არის, წინააღმდეგობას უწევს ამჟამინდელ ხელისუფლებას. შიდაპოლიტიკური ესკალაციის ფონზე ექსპერტები ამას მომავალ გაზაფხულზე დაგეგმილ საპარლამენტო არჩევნებზე რევანშის სერიოზულ მცდელობად თვლიან.
მას შემდეგ, რაც ანატოლი ბიბილოვი 2022 წლის საპრეზიდენტო არჩევნებში ალან გაგლოევთან დამარცხდა, მმართველმა პარტიამ “ერთიანმა ოსეთმა” და მაშინდელმა ოპოზიციურმა პარტია “ნიხასმა” – გაგლოევის ხელმძღვანელობით – „ადგილები გაცვალეს“. მაგრამ, ბიბილოვის განცხადებებით თუ ვიმსჯელებთ, ის არ აპირებს პოლიტიკური ასპარეზის დატოვებას.
- ცხინვალი: რომელი პრეზიდენტია ჩართული გახმაურებულ მკვლელობაში?
- ვინ და რატომ აპირებს შექმნას ახალი პარტიები ცხინვალში
- ნასოფლარების მხარე.რეპორტაჟი მიტოვებული, დაცლილი თრუსოს ხეობიდან, სადაც ოდესღაც ოსები და ქართველები ერთად ცხოვრობდნენ
ცოტა ხნის წინ ჟურნალისტების შეკითხვას, არის თუ არა პარტია „ერთიანი ოსეთი“ დღევანდელი ხელისუფლების ოპოზიცია, ბიბილოვმა დადებითად უპასუხა.
„თუნდაც არ გვინდოდეს, დღეს მაინც „ერთიანი ოსეთი“ სტანდარტულად ოპოზიციური პარტიაა. სწორედ ჩვენ ვართ სისტემური ოპოზიცია – არა ქუჩის, არამედ კონსტრუქციული, რაც აუცილებელია ქვეყნის განვითარებისთვის. შემიძლია ვთქვა, რომ ეს არის მართლაც ყველაზე მრავალრიცხოვანი პარტია და მჯერა, რომ “ერთიანი ოსეთის” მუშაობის ეფექტურობა ჩანს, ეს ხალხმაც ძალიან კარგად იცის“.
ამასთან, ექსპრეზიდენტმა თავი შეიკავა ცხინვალის რეჟიმის ახალი მეთაურის მიმართ ღიად კრიტიკისგან, თუმცა მათ შორის ურთიერთობას კარგს ნამდვილად ვერ ვუწოდებთ:
„არასწორად მიმაჩნია ჩემი მხრიდან რაიმე წინასწარი შეფასების გაკეთება დღევანდელი ხელისუფლების შესახებ. რა თქმა უნდა, არის სათქმელი, მაგრამ მაინც, ჯერჯერობით, თავს შევიკავებ შეფასებებისგან – კონკრეტულად შიდაპოლიტიკურ ვითარებაზე. ალბათ, იმ შეცდომებს, რაც არსებობს, ხელისუფლებამ უნდა მიაქციოს ყურადღება და პირველ რიგში ხალხმა უნდა მისცეს შეფასება.“
ბიბილოვმა ასევე განმარტა, რომ მისი თანაპარტიელები მას ლიდერად თვლიან, თუმცა ოფიციალურად ის პარტიის თავმჯდომარე არ არის.
რაში დაადანაშაულეს ბიბილოვი?
როდესაც ის პრეზიდენტი იყო, ანატოლი ბიბილოვი მაშინდელი ოპოზიციის მკაცრი კრიტიკის ქვეშ იყო.
მაგალითად, მას ბრალი 2019 წლის აგვისტოში საქართველომ სამხრეთ ოსეთის სოფელ წნელისში პოლიციის განყოფილების შექმნაში დასდო. გაგლოევი და მისი მომხრეები ბიბილოვს კონფლიქტის ზონაში საქართველოსთვის 200 კვადრატული კილომეტრი მიწის სავარაუდო დათმობაშიც ადანაშაულებენ, რაც ფაქტებით არ დასტურდება. თუმცა, ეს ბრალდებები საკმარისი აღმოჩნდა ოპოზიციისთვის, რომ საპროტესტო განწყობები შეექმნათ.
ბიბილოვის იმიჯს ასევე მძიმედ დაარტყა შინაგან საქმეთა ყოფილი მინისტრის მკვლელობის მცდელობაში ეჭვმიტანილის, ინალ ძაბიევის ტრაგიკულმა სიკვდილმა. 2020 წელს ჯაბიევი დაკითხვის დროს წამების შედეგად გარდაიცვალა. ოპოზიცია ბიბილოვის ხელისუფლებას ადანაშაულებდა და მის გადადგომას, გენერალური პროკურორის გადაყენებას, ძაბიევის სიკვდილის მიზეზების ობიექტურ გამოძიებას და ყველა დამნაშავის დასჯას მოითხოვდა. ძირითადად ამ მოთხოვნებმა უზრუნველყო არჩევნებში გაგლოევის გამარჯვება.
თუმცა, ძალაუფლების მოპოვების შემდეგ გაგლოევს ჯერ არც ერთი ეს პრობლემა არ გადაუწყვეტია.
წნელისში საგუშაგო არ გაუქმებულა და მისი პრეზიდენტობის ცხრა თვის განმავლობაში, თავად გაგლოევი ამ სოფელში არც კი ჩასულა.
“ადამიანები უკვე ნანობენ, რომ არასწორი არჩევანი გააკეთეს”
ექსპერტები ვარაუდობენ, რომ ანატოლი ბიბილოვსა და ალან გაგლოევს შორის დაპირისპირება საპარლამენტო არჩევნების მოახლოებასთან ერთად შესაძლოა მწვავე ფაზაში გადავიდეს.
ეს დაპირისპირება ძალიან მძიმე იქნება, ვინაიდან ცხინვალის ხელისუფლება უკვე ახორციელებს ზეწოლას ბიბილოვის მხარდამჭერებზე და “ერთიანი ოსეთის” წევრებზე. ბევრი მათგანი გაათავისუფლეს პრეზიდენტის ადმინისტრაციის, პარლამენტის აპარატის, ძალოვანი და სამხედრო დეპარტამენტების, ასევე რაიონის გამგეობებიდან.
2022 წლის სექტემბერში გაგლოევის მომხრეებმა მიაღწიეს პარლამენტის თავმჯდომარის, ალან თადთაევის ვადამდე ადრე გადადგომას და მის ნაცვლად აირჩიეს ალან ალბოროვი – დეპუტატი “ნიხასიდან.”
გარდა ამისა, პრეზიდენტად არჩევის შემდეგ, ალან გაგლოევმა არ დატოვა “ნიხასის” პარტიის თავმჯდომარის პოსტი და რჩება მის ხელმძღვანელად, რაც ეწინააღმდეგება კანონს. ახლა უკვე ამ პარტიას ხელისუფლების უზურპაციაში ადანაშაულებენ.
რაც შეეხება ანატოლი ბიბილოვს, ამ მომენტში ცხინვალის საზოგადოებაში მის შესახებ ორი პოლარული მიდგომაა: ზოგისთვის ბიბილოვი ეროვნული ლიდერია, ზოგისთვის კი ყველა უბედურების სათავე.
როგორც JAMnews-ს ცხინვალში მცხოვრებმა ზოგიერთმა რესპონდენტმა განუცხადა, „ხალხი ნელ-ნელა ნენობს, რომ თავის დროზე არასწორი არჩევანი გააკეთეს“.
მათი თქმით, ბიბილოვს ჰქონდა და აქვს კარგი კავშირები მოსკოვში, მას ჰქონდა სტაბილური დაფინანსება. მაგრამ გაგლოევი ჯერ არც კი მიუღია რუსეთის პრეზიდენტ ვლადიმირ პუტინს. პრობლემებია დაფინანსებასთან დაკავშირებით, სახელმწიფო აპარატის თანამშრომლებს ხელფასები უგვიანდებათ.
მაგრამ ბიბილოვი ჯერ კიდევ არ არის პოპულარული ახალგაზრდებში:
„ინსტაგრამის თაობა ბიბილოვს ვერ აპატიებს ძაბიევისა და წნელის საქმეს. ბევრი ჯერ კიდევ დარწმუნებულია, რომ ბიბილოვმა თავად აწამა ძაბიევი“.
ახლა ბიბილოვი დიდ დროს ატარებს დონბასში. პარალელურად, ის რეგულარულად ჩამოდის ცხინვალში ოჯახის მოსანახულებლად და მისი ეს ჩამოსვლები დღევანდელი ხელისუფლების უკმაყოფილებას იწვევს.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
