ენტონი ბლინკენი: (რუსულ) კანონზე პასუხისმგებელი პირებისთვის ვიზების შეზღუდვის ახალ პოლიტიკას ვაცხადებ
ენტონი ბლინკენი სანქციებს აცხადებს
აშშ-ის სახელმწიფო მდივანი ენტონი ბლინკენი რუსულ კანონზე პასუხისმგებელი პირებისთვის ვიზების შეზღუდვის ახალ პოლიტიკას აცხადებს. ამის შესახებ ის სოციალურ ქსელ X-ზე წერს.
“ვაცხადებ ვიზების შეზღუდვის ახალი პოლიტიკის შესახებ მათთვის, ვინც პასუხისმგებელია საქართველოში დემოკრატიისთვის ძირის გამოთხრაში, მათ შორის უცხოური აგენტების შესახებ ქართული ოცნების მიერ შემოთავაზებულ კანონთან დაკავშირებით”, – წერს ბლინკენი.
კონკრეტულს ვის შეიძლება შეეხოს ახალი სავიზო შეზღუდვა, სახელმწიფო მდივანი არ ასახელებს.
სახელმწიფო მდივნის განცხადება
სახელმწიფო დეპარტამენტი ენტონი ბლინკენის განცხადებას ავრცელებს.
ბოლო რამდენიმე თვის განმავლობაში ქართულმა ოცნებამ შეიმუშავა და მიიღო კანონი “უცხოური გავლენის შესახებ”, რომელიც ახშობს შეკრებისა და გამოხატვის თავისუფლების რეალიზებას, სტიგმას ადებს ორგანიზაციებს, რომლებიც ქართულ საზოგადოებას ემსახურებიან, და ხელს უშლის დამოუკიდებელ მედიაორგანიზაციებს, რომლებიც ქართველი ხალხის მაღალი ხარისხით ინფორმაციით უზრუნველყოფაზე მუშაობენ. რადგანაც ქართველმა ხალხმა უკმაყოფილება გამოთქვა კანონთან დაკავშირებით, ჩვენ დავინახეთ დაშინების კამპანიის აშკარა ნიშნები და ძალადობის გამოყენება მშვიდობიანი პროტესტის ჩასახშობად. როგორც “ეროვნული უსაფრთხოების კანონი”, ასევე რეპრესიული ტაქტიკა, რომელიც ლეგიტიმური განსხვავებული აზრის ჩასახშობად გამოიყენება, ძირს უთხრის საქართველოს დემოკრატიას და ფუნდამენტურ თავისუფლებებს, რომლებზეც უფლება აქვს ქართველს ხალხს, და ეწინააღმდეგება საქართველოს გაცხადებულ მიზანს – კონსტიტუციაში ასახულს – ევროატლანტიკურ ინტეგრაციასა და აშშ-სთან სტრატეგიულ პარტნიორობას.
ამ ქმედებების საპასუხოდ სახელმწიფო დეპარტამენტს შემოაქვს საქართველოსთვის ვიზების შეზღუდვის ახალი პოლიტიკა, რომელიც გამოიყენება იმ პირების მიმართ, რომლებიც პასუხისმგებელნი არიან ან თანამონაწილეები არიან საქართველოში დემოკრატიისთვის ძირის გამოთხრაში, ასევე მათი ოჯახის წევრების მიმართ. ეს მოიცავს პირებს, რომლებიც ძალადობის ან დაშინების კამპანიის გზით საქართველოში სამოქალაქო საზოგადოებისა და მშვიდობიანი შეკრების თავისუფლების ჩახშობაზე არიან პასუხისმგებელნი.
საქართველოს დემოკრატიისადმი აშშ-ის მხარდაჭერა ჩვენი ორმხრივი ურთიერთობებისთვის ურყევი და ფუნდამენტურია. ნებისმიერს, ვინც ძირს უთხრის საქართველოში დემოკრატიულ პროცესებს ან ინსტიტუციებს – მათ შორის საქართველოს 2024 წლის არჩევნებამდე, არჩევნების დროს ან მის შემდეგ პერიოდში – ამ პოლიტიკის მიხედვით, შესაძლოა, შეეზღუდოს აშშ-ის ვიზის მიღების უფლება და შეეზღუდოს ამერიკის შეერთებულ შტატებში მოგზაურობა. ეს შეზღუდვები, შესაძლოა, ასეთი ადამიანების უახლოეს ოჯახის წევრებზეც გავრცელდეს.
ასევე დღეს ვიწყებ შეერთებულ შტატებსა და საქართველოს შორის ორმხრივი თანამშრომლობის ძირეულ გადახედვას. იმედს ვიტოვებთ, რომ საქართველოს ლიდერები გადახედავენ კანონპროექტს და გადადგამენ ნაბიჯებს ერის დემოკრატიული და ევროატლანტიკური მისწრაფებებისკენ. ორ ქვეყანას შორის ურთიერთობების გადახედვის პროცესში, საკუთარ ქმედებების შესახებ გადაწყვეტილებებს საქართველოს ქმედებების გათვალისწინებით მივიღებთ.
სავიზო შეზღუდვის ეს პოლიტიკა ემორჩილება იმიგრაციისა და ეროვნული აქტის 212 (a)(3)(C) პუნქტს და საშუალებას აძლევს სახელმწიფო დეპარტამენტს განახორციელოს სავიზო შეზღუდვები ფიზიკური პირების მიმართ, იქნებიან ისინი ამჟამინდელი თუ ყოფილი სახელმწიფო თუ არასახელმწიფო აქტორები, რომლებც პასუხისმგებელნი არიან ან თანამონაწილეობენ საქართველოში დემოკრატიისთვის ძირის გამოთხრაში, მათ შორის, ძალადობის, ძალის ან იძულების გამოყენებით, რათა ხელი შეეშალოს სამოქალაქო ან პოლიტიკური უფლებების განხორციელებას, ისევე, როგორც მსგავსი პირების ოჯახების წევრების მიმართ.” – წერია ბლინკენის განცხადებაში.
ამასთან, ამერიკის შეერთებული შტატების სენატი საქართველოს წინააღმდეგ სანქციების ახალ, ორპარტიულ კანონპროექტს განიხილავს, რომლის ავტორები სენატორები ჯინ შაჰინი და ჯიმ რიში არიან.
პაკეტი “ქართველი ხალხის აქტი” სენატს დღეს წარედგინება, მისი სამიზნეები კი იქნებიან ის ადამიანები, რომლებიც პასუხისმგებლები არიან საქართველოს ევროინტეგრაციის პროცესის ხელშეშლაში, ასევე ისინი, ვინც ხელი შეუწყო რუსული კანონის მიღებას და დგანან კორუფციისა და ადამიანის უფლებების დარღვევის უკან.
როგორც გამოცემა Politico ხაზს უსვამს, რომ “ქართული ოცნების” მიერ შემოღებული რუსული კანონი მსგავსია იმ კანონისა, რომელსაც რუსეთი სამოქალაქო საზოგადოების გასაჩუმებლად და კრიტიკული ხმის ჩასახშობად იყენებს, ხოლო შსს-მ კანონპროექტის საწინააღმდეგო აქციების დაშლისას, ცრემლსადენ გაზსა და წიწაკის სპრეისთან ერთად, მომიტინგეების მიმართ ძალადობრივი ხერხები გამოიყენა.
აშშ-ს კონგრესს 23 მაისს წარედგინება კანონპროექტი, რომელიც საქართველოს ხელისუფლების იმ წარმომადგენლებისთვის აქტივების გაყინვას და სავიზო აკრძალვებს ითვალისწინებს, რომლებმაც “რუსული სტილის უცხოური აგენტების კანონს” მხარი დაუჭირეს.
კანონპროექტის დრაფტი, რომელსაც Politico-ს წყარო გაეცნო, მმართველ პარტიას აფრთხილებს, რომ ქართული ოცნება “მზარდად და სამწუხაროდ დაკავებულია რუსეთის ფედერაციასთან პოლიტიკის შეთანხმებით”.
ამავდროულად, დრაფტში ხაზგასმულია, რომ თბილისი “ღიად თავს ესხმის” აშშ-ს და სხვა დასავლური დემოკრატიის ხელშემწყობ ორგანიზაციებს, ისევე როგორც “ადგილობრივ და საერთაშორისო სამოქალაქო საზოგადოებას”, პარალელურად კი “აძლიერებს” კავშირებს რუსეთთან და ჩინეთთან.
