დეკანოზ მამალაძის ადვოკატი ამბობს, რომ "საუკუნის პროცესი" სტრასბურგში მოიგო

საუკუნის პროცესი სტრასბურგში

პატიმრობაში მყოფი დეკანოზის, ლევან მამალაძის ადვოკატი დავით ჯანდიერი ამბობს, რომ საუკუნის პროცესი – ციანიდის საქმე სტრასბურგის სასამართლოში მოიგო.

“სასამართლომ რამდენიმე წუთის წინ გამოაქვეყნა გადაწყვეტილება. სამიდან ორი საკითხი დამიკმაყოფილა. პალატამ ერთხმად დაადგინა, რომ დეკანოზ გიორგი მამალაძეს საქმის სამართლიანი განხილვის უფლება დაირღვა და შესაბამისად დაადგინა კონვენციის მე-6 მუხლის (6.1. და 6.2) დარღვევა. როგორც იურისტმა ამ ურთულეს საქმეზე მუშაობის ძალიან რთული ოთხი წელი გავიარე მარტო. ასეთი მნიშვნელობის პროფესიული გამარჯვება გირგვლიანის საქმის მოგების მერე სტრასბურგის სასამართლოში არ მქონია.” – წერს დავით ჯანდიერი.

სტრასბურგის  ადამიანის უფლებათა ევროპულმა სასამართლომ დეკანოზ გიორგი მამალაძის საქმეზე გადაწყვეტილება დღეს გამოიტანა. სასამართლომ დაადგინა, რომ დარღვეულ იქნა კონვენციის მე-6 მუხლის პუნქტები. სასამართლო საქართველოს მთავრობას აკისრებს, რომ მომდევნო სამ თვეში დეკანოზ მამალაძეს 9 418 ლარი გადაუხადოს.

კონვენციის მე-6 მუხლის 1-ლი პუნქტი გულისხმობს სამართლიანი სასამართლოს უფლებას, ხოლო მე-2 პუნქტი უდანაშაულობის პრეზუმფციას.

სტრასბურგის სასამართლო ადგენს, რომ დარღვევის დადგენა თავისთავად საკმარისია იმისათვის, რომ გამსაჩივრებლის ნებისმიერი მორალური ზიანი ანაზღაურდეს.

მამალაძე კონვენციის მუხლების დარღვევის გარდა ითხოვდა მატერიალური ზარალის ანაზღაურებას 376 405 ლარით და მორალური ზიანის ანაზღაურებას 150 000 ევროთი, რაც არ დაკმაყოფილდა. ასევე, ითხოვდა სასამართლოში იურიდიული წარმომადგენლობისთვის 6 360 ლარსა და პროცესისთვის გაწეული ხარჯების 3058 ლარით ანაზღაურებას, რაც დაკმაყოფილდა.

● “ვაგროვებთ კომპრომატებს” – გავრცელდა საიდუმლო ფაილები, სადაც სუს-ი მღვდელმთავრებს უსმენს
● დასავლეთი თუ რუსეთი? საით მიყავს ქვეყანა ქართულ ეკლესიას
● რა ხდება ქართულ ეკლესიაში? პატრიარქის ტახტისთვის ბრძოლა გადამწყვეტ ფაზაში შედის

მე-6 მუხლის 1-ელ პუნქტში წერია:

“ყოველი ადამიანი, მისი სამოქალაქო ხასიათის უფლებებისა და მოვალეობების, ან მისთვის წარდგენილი სისხლისსამართლებრივი ბრალდების საფუძვლიანობის გამორკვევისას, აღჭურვილია გონივრულ ვადაში მისი საქმის სამართლიანი და საქვეყნოდ განხილვის უფლებით კანონის საფუძველზე შექმნილი დამოუკიდებელი და მიუკერძოებელი სასამართლოს მიერ. სასამართლო გადაწყვეტილება ცხადდება საქვეყნოდ, თუმცა მთელ სასამართლო პროცესზე ან მის ნაწილზე პრესა და საზოგადოება შეიძლება არ იქნეს დაშვებული დემოკრატიულ საზოგადოებაში მორალის, საზოგადოებრივი წესრიგის ან ეროვნული უშიშროების ინტერესებისათვის, აგრეთვე, როდესაც ამას მოითხოვს არასრულწლოვანის ინტერესები, ან მხარეთა პირადი ცხოვრების დაცვა, ანდა, რამდენადაც, სასამართლოს აზრით, ეს მკაცრად აუცილებელია განსაკუთრებული გარემოებების არსებობის გამო, ვინაიდან საქვეყნოობა დააზარალებდა მართლმსაჯულების ინტერესს”.

მე-6 მუხლის მე-2 პუნქტში კი ვკითხულობთ:

“ყოველი ბრალდებული უდანაშაულოდ მიიჩნევა, ვიდრე მისი ბრალეულობა არ დამტკიცდება კანონის შესაბამისად”.

დეკანოზ გიორგი მამალაძის ძმა, თორნიკე მამალაძე Facebook-ზე წერს, რომ მნიშვნელოვანია, სახელმწიფომ გადადგას ნაბიჯები და გაათავისუფლოს მამა გიორგი მამალაძე.

“მოცემულ ეტაპზე მნიშვნელოვანია სახელმწიფომ გადადგას ქმედითი ნაბიჯები სამართლიანობის აღსადგენად, გამოუშვას მამა გიორგი პატიმრობიდან და მისცეს მას საშუალება იზრუნოს საკუთარ ოჯახსა და ჯანმრთელობაზე. უნდა გვესმოდეს, რომ ჩემი ძმის მდგომარეობა არის უმძიმესი! მისი პატიმრობაში დატოვებით შესაძლოა დადგეს უმძიმესი, ლეტალური შედეგიც კი! ეს კი არც სახელმწიფომ და არც საზოგადოებამ არ უნდა დაუშვას!” – ამბობს დეკანოზის ძმა.

ციანიდის საქმე

დეკანოზ გიორგი მამალაძეს საქართველოს უახლეს ისტორიაში ერთ-ერთი ყველაზე ბუნდოვანი და სკანდალური საქმე უკავშირდება.

მამალაძე 2017 წლის 10 თებერვალს თბილისის საერთაშორისო აეროპორტში მაშინ დააკავეს, როდესაც იგი გერმანიაში გამგზავრებას აპირებდა. მის პირად ნივთებში პოლიციამ მომწამვლელი ნივთიერება ციანიდი აღმოაჩინა.

• ციანიდის საქმე. რეალური თავდასხმა თუ საპატრიარქოს კარის თამაშები?  
• საპატრიარქოს კაპიტალი. რა ქონებას ფლობს ყველაზე გავლენიანი ინსტიტუტი საქართველოში?  

მამალაძე საქართველოს კათოლიკოს პატრიარქის ილია მეორის მოსანახულებლად მიდიოდა, რომელმაც იმ პერიოდში გერმანიაში ნაღვლის ბუშტის ოპერაცია გაიკეთა და მკურნალობის კურსს გადიოდა.

თავდაპირველად ითქვა, რომ მამალაძეს ციანიდი უმაღლესი რანგის სასულიერო პირის მოსაწამლად მიჰქონდა. ამ ვერსიას, როგორც ოფიციალურს, ახმოვანებდნენ როგორც მთავარი პროკურორი, ისე პრემიერ-მინისტრი, იუსტიციის მინისტრი და სხვა მაღალჩინოსნები. ისინი პირდაპირ მიანიშნებდნენ, რომ ციანიდი პატრიარქისთვის იყო განკუთვნილი.

თუმცა, მოგვიანებით, ეს ვერსია შეიცვალა.

თბილისის საქალაქო სასამართლომ მამალაძეს 9 წლით თავისუფლების აღკვეთა მიუსაჯა. მას ბრალად ედება არა თავად საქართველოს პატრიარქის, არამედ მისი მდივან-რეფერატის, საპატრიარქოს ერთ-ერთი ყველაზე გავლენიანი და ოდიოზური ფიგურის – შორენა თეთრუაშვილის მოწამვლის მომზადების მცდელობა.

თავად დეკანოზი თავს უდანაშაულოდ მიიჩნევს. იურისტები და არასამთავრობო ორგანიზაციების წარმომადგენლები “ციანიდის საქმედ” წოდებულ მრავალ ტომიან საქმეში ბევრ უზუსტობას ხედავენ და ბევრი კითხვა აქვთ.

ოჯახი ამბობს, რომ დეკანოზი უდანაშაულოა და საპატრიარქოს კარის თამაშების მსხვერპლი გახდა. მათი თქმით, ამ ხნის განმავლობაში მათ საქართველოში  ყველა სამართლებრივი და ასევე მორალური რესურსი ამოწურეს.