საქართველოში კოვიდინფიცირებულთა რიცხვმა ხუთასს გადააჭარბა
ბოლო 24 საათის განმავლობაში საქართველოში კორონავირუსით ინფიცირების 15 ახალი შემთხვევა გამოვლინდა.
28 აპრილის მონაცემებით, საქართველოში კორონავირუსით ინფიცირების 511 შემთხვევაა დადასტურებული. კარანტინის რეჟიმშია 5083 ადამიანი, ხოლო სტაციონარში მეთვალყურეობის ქვეშ – 558 პირი. კორონავირუსით ინფიცირებულთაგან 156 გამოჯანმრთელდა და 6 გარდაიცვალა.
უცხოეთიდან საქართველოში სამკურნალოდ გადმოყვანილია კორონავირუსით ინფიცირებული საქართველოს 3 მოქალაქე.
დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, 27 აპრილამდე საქართველოში კორონავირუსზე 11 942 ადამიანია შემოწმებული.
კორონავირუსი დაუდასტურდა ერთ-ერთ პაციენტს, რომელიც ქუთაისიც ცხელების ცენტრში იმყოფებოდა.
- მთავრობის ანტიკრიზისული გეგმა – ვინ რა დახმარებას მიიღებს
- ვის და რა შემთხვევაში შეუძლია მანქანით გადაადგილება – გამონაკლისების სია
- საქართველო: რა ბედი ელის ტურიზმს?
- როგორ მოიხსნება შეზღუდვები – მთავრობის გეგმა
covid-19 დაუდგინდა მერიის თანამშრომელს თეთრიწყაროშიც, სადაც კორონავირუსით დაინფიცირების წყარო ადგილობრივი საავადმყოფო გახდა. თეთრიწყაროში covid-19-ით სულ 21 ადამიანია დაავადებული, 100-მდე ადამიანი კი იზოლაციაში იმყოფება. თეთრიწყარო მარნეულისა და ბოლნისის შემდეგ უკვე მესამე რაიონია ქვემო ქართლში, რომელიც საკარანტინო ზონად გამოცხადდა და ჩაიკეტა.
კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.
